Jajis 15 - Buka Blahi Ka Cheke Holo

¹ Ke leghu, kate hata gano ka nagare wit na, Samson hata kaisei sua nanigot ne tusu lao ka tharaknagna gaꞌase igne jateula nogna namha eghu. Mana tei ne tore ka ivagna na ne cheke eghu, “Iara magnahaghei te tei filoni khetogu na.” Nu kmagna gaꞌase igne theome snakreni naꞌa te tei lamna chogho na.

² Mana ne cheke eghu, “Tutuani? Iara jau iagho la tirouni hila naꞌa neu ne snakreni kaisei mae ka nou gaghamu iagho ia mala hata mana. Nu naꞌa au kaisei greghagna majaghani teke famanegna naꞌai. Iagho tangomana te tolaghi ka naꞌa na.”

³ Samson ne cheke eghu, “Tore, gognarona iara doglou kolho te mala goigonini ghami ghotilo naiknomi Filistia.”

⁴ Aonu mana tei ne hata thilo gobi khuma mata, eghuteuna mana ne haru fodu phei eghu sekodire, eghuteuna mana ne haru famaku khakla gaju moja ka sekodi khuma igre.

⁵ Mana fakasa khaꞌaghi ka khakla gaju igre, eghuteuna lisa lao khuma mata igre chari ne tei farihoteidi nodi nagare wit naiknodi Filistia. Khaꞌaghi igre ne gnubra wit teke uklihi bubukrei tekure nei theome ukli nga tekure. Eghuteuna mana jaola gnubra nodi nagare grep nei nagare oliv.

⁶ Keha mae biꞌodi Filistia gre ne ghusna eghu, “Ihei site eni puhi te diꞌa ignea?” Ke leghu, mare laseni Samson te eni igne naugna ivagna mana Timna igne neke snakre lao khetogna Samson na ka kaisei mae teke gnokro balugna mana ka gaghamu tholaghi ia. Aonu maedi Filistia tei ne gnubra gaꞌase igne balugna kmagna na.

⁷ Samson ne cheke eghu ka mare, “Naugna ghotilo ne eni puhi te diꞌa igne ka iara, iara cheke fadoglo ari ka ghotilo, iara ginauna theome gnafa ghilei tughu fapulo gobigna lepo igre.”

⁸ Aonu Samson magridi mare balu diꞌatagna fara ne ghilei aknu falehe kmana ka mare. Ke leghu, mana jifla ne tei poru ka gluma lamna thina jare namono Etan.

Samson ne aknu falehe kaisei thogha mae

⁹ Theome raugha armigna Filistia mei ne au Juda mala magra ka namono Lehi, gaoghathogna na nhubra gagama.

¹⁰ Maedi Juda te au ka namono igne ne ghusna eghu ka mare, “Naugna unha si ghotilo te mei magri ghami ghehati gnea?” Eghuteuna maedi Filistia igre ne cheke eghu, “Ghehati mei mala lokini Samson mala ke tughu fapulo unha teke edi mana ka ghehati ra!”

¹¹ Aonu thilo thogha soldia di Juda tei ka gluma Etam ne cheke faheta eghu ka Samson, “Theome lasedi sagho maedi Filistia te funei fruni ghita tahati grea? Unha sagho te eni ka ghehati gnea?” Nu Samson ne cheke eghu, “Iara eni igne mala ke tughu fapulo unha teke eni mare ka iara na.”

¹² Nu mare ne cheke eghu ka mana, “Ghehati mei mala haru nigho iagho mala hata nigho iagho tei ka mare.” Aonu mae Samson ne cheke eghu ka mare, “Keli, nu ghotilo kulu eni kaisei nhaꞌa cheke ka iara, te mala thosei falehe ghau iara na.”

¹³ Mare ne cheke eghu ka mana, “Uve, ghehati ginauna theome falehe nigho iagho nu khogla haru nigho eghuteuna hata tei nigho ka mare.” Aonu mare haruni mana ka phei gnarho majaghani. Aonu mare hata fajiflani mana ka gluma Etam.

¹⁴ Kate mei Samson Lehi na, soldia di Filistia igre chari ne mei balu eha fabiꞌo. Ka narane tuana, Tharunga gna Lord na ne mei ka Samson, neke farhetani mana. Mana ne kusu phei gnarho teke haru ka mana igre, jateula mae ihei te lolhopa buburu moja ra neu.

¹⁵ Samson ne filoni kaisei nhubra gagama gna dongki teke lehe majaghani na, aonu mana hata haghe nhubra gagama igne ne aknu falehe kaisei thogha soldia gna Filistia.

¹⁶ Aonu mana ne koje eghu, “Ka nhubra gagama gna dongki, iara bubukrei kmana mae igre! Ka nhubra gagama gna dongki, iara aknu falehe kaisei thogha soldia!”

¹⁷ Kate gnafa koje na, mana koko ne tei nhubra igne. Eghuteuna mare ne kiloni namono igne Thogele Nhubra Gagama.

¹⁸ Samson roi koꞌu, eghuteuna mana ne tanhi eghu ka Lord, “Lord, God! Iagho togho ghau iara neke uludi soldia di Filistia, ba iagho magnahaghei ghau iara te lehe ka khamedi naikno bongihehedi Filistia igre?”

¹⁹ God ne piphike thina na Lehi ne jateula dis neu eghuteuna kaisei khoꞌu ne jifla mei tagna. Kate koꞌu te gnafa na, Samson neke rheta fapulo. Mare ne kiloni glokha khoꞌu igne “Nogna Glokha Khoꞌu Mae Ihei te Tanhi.” Glokha khoꞌu igne au ngala Lehi gognarona.

²⁰ Samson batudi naiknodi Israel nabagna varadaki finogha, nu maedi Filistia funei fruni ni Israel.