Jajis 11 - Buka Blahi Ka Cheke Holo

¹ Kaisei mae nanghagna na Jefta, mana kaisei mae soldia keli. Nu idogna na kaisei gaꞌase vine eghuteuna kmagna na Gilead.

² Nu mae Gilead jaola au keha thugna nalhaꞌu teke karha ka khetogna na. Eghuteuna kate biꞌo haghe na, mare neke khini Jefta mala thosei au mana baludi. Mare ne cheke eghu ka mana, “Iagho ginauna theo kaisei nou glepo ka kmami ghehati gne naugna idomu iagho na kaisei gaꞌase vine.”

³ Aonu Jefta rikhadi mae thabusignare ne tei au ka namono Tob. Eghuteuna kate au teu mana ka namono igne, mae Jefta ne batudi keha mae te diꞌa mala leghuni mana. Eghuteuna mare tei magra nei blau.

⁴ Ka narane igre, armigna Amon mei ne magra ka naiknodi Israel.

⁵ Goro mae biꞌo ka vikegna Gilead igre tei ne toreni Jefta thugna Gilead igne mala ke pulo mei ka nodi namono mare na.

⁶ Eghuteuna mare ne cheke eghu ka mana, “Te keli na iagho ke pulo mei, eghuteuna iagho na batu ghami ghehati mala tei magra ka vikegna Amon.”

⁷ Nu mana ne cheke eghu ka mare, “Tore, tifa ia ghotilo neke theome magnahaghei ghau iara fara neke khi fajifla ghau iara ka namonogna mae kmagu iara na. Nu kate thoke ghami puhi biꞌo na, gognarona ghotilo ke mei hiro ghau iara!”

⁸ Aonu mare ne cheke eghu ka mana, “Tutuani fara, nu gognarona ghehati magnahaghei nigho iagho teke pulo mei mala batu ghami ghehati mala tei magra ka naiknodi Amon. Eghuteuna iagho ginauna funei fruni ghami ghehati naikno te gnafa agne Gilead.”

⁹ Jefta ne cheke eghu ka mare, “Jame teke pulo iara balumi ghotilo te mala magra ka vikegna Amon, eghuteuna Lord togho ghita te uluni magra igne, ba, ghotilo ginauna kelitami jame te funei fruni ghami iara na?”

¹⁰ Eghuteuna goro mae biꞌo igre ne cheke eghu, “Uve, ghehati te gnafa na kaisei gaoghatho ngala. Eghuteuna Lord la nomhidihi noda nhaꞌa cheke tahati igre.”

¹¹ Aonu mana neke pulo baludi mare ka namono Mispa. Eghuteuna naiknodi Gilead igre ne fakegra funeini mana nei mae mala komanda ka armi. Eghuteuna ka narane igre, mana ne nhaꞌa cheke baludi mare ka tathagna Lord.

¹² Ke leghugna igne Jefta ne kuru tei keha mae mala hata cheke tei ka funei ka vikegna Amon. Mana ne ghusna eghu, “Naugna unha si ghotilo te magnahaghei mei magra ka namonomi ghehati gnea? Unha si teke eni ghehati te thofno jafra ka ghotilo na ia?”

¹³ Funeigna Amon igne ne cheke eghu ka mare, “Tifa te mei na, kate jifla kuꞌemi ghotilo Ijep ra, mare mei neke hata nomi glose ghehati te funu ke mata khoꞌu biꞌo Anon, eghuteuna leghuni Khoꞌu biꞌo Jordan ke mosu, eghuteuna tei posa ke raru Khoꞌu biꞌo Jabok. Gognarona ghotilo ke tusu fapulo glose tuare. Jame te eghu ghotilo na, ghehati ginauna theome eni kaisei magra.”

¹⁴ Kate nomhini Jefta cheke igne, mana neke kuru teidi mare mala tei filoni funei igne.

¹⁵ Eghuteuna mare ne cheke eghu, “Igne nogna cheke Jefta na. Mana ne cheke eghu: Kuꞌemi ghehati tifa ra neke theome hata nodi glose vikegna Moab ba vikegna Amon. U cheke ne chekeni iagho igne theome tutuani.

¹⁶ Thoutonu eigna glepo te chekeni iagho igne e eghu agne, kani teke jifla Ijep kuꞌemi ghehati ra, mare neke tei salaꞌu fei namono nagou neke tei kasa ka Thongna Ukru na eghuteuna mei ka namono Kades.

¹⁷ Mare ne fatei cheke ka king gna Idom neke toreni mana mala snakredi mana naiknodi Israel igre mala tei salaꞌu Idom, nu mana neke theome snakreni. Eghuteuna mare jaola neke toreni king gna Moab mala snakredi mare mala tei salaꞌu Moab, nu mana jaola neke theome snakredi. Aonu mare neke au neku kolho Kades naugna theo kaisei naikno te snakredi mare te tei salaꞌu ka namono igne.

¹⁸ “Leghu lahu na, mare tei salaꞌu fei namono nagou neke lithui ke maghati Idom ghe Moab, eghuteuna mare neke lisei haghe nodi suga tapuale re ka keha phile khoꞌu Anon te nohigna Moab, eghuteuna mare neke theome tei kasa ka nohi igne.

¹⁹ “Mare neke kurudi keha mae tei ka namono Hesbon mala filoni King Sihon mae ihei te funei fruni ka vikegna Amoa. Mare toreni mana mala snakredi mala tei salaꞌu ka nogna glose mana na mala tangomana mare te tei ka nodi namono na.

²⁰ Nu king igne ne theome snakreni naugna mana theome fatutuani mare. Aonu mana neke kilodi nogna soldia re mala kafe mei ka namono te kiloi Jahas. Eghuteuna mare tei ne magridi kuꞌemi ghehati re.

²¹ “Nu Lord, nodi God maedi Israel igne toghodi kuꞌemi ghehati re neke uluni King Sihon balugna nogna armi na. Eghuteuna ka narane tuana, maedi Israel igre ne hata kasa nodi glose vikegna Amoa.

²² Nodi glose vikegna Amoa te hata naiknodi Israel igre, funu ke mata khoꞌu biꞌo Anon soru posani Thongna Ukru nei ke mosu Khoꞌu biꞌo Jordan tei posa ke raru Khoꞌu biꞌo Jabok eghuteuna tei posa ke maghati namono nagou.

²³ “Gobigna lepo igre Lord neke eni ranghidi nogna naikno mana Israel igre. Mana neke brue fajifladi vikegna Amoa. Eghume naugna unha sagho te magnahaghei hata glose teke theome nomi ghotilo tifa igrea?

²⁴ Kemos gne nomi god ghotilo na, eghuteuna jame hata mana keha glose te tusu ari ka ghotilo na, uve ghotilo tangomana te khotodi re. Eghuteuna jateula tuana eghu, Lord na nomi God ghehati, eghuteuna kate hata kasa mana glose igne te tusu mei ka ghehati na, uve, ghehati te khotogna na.

²⁵ Ba, iagho gaoghathomu na iagho nheta salaꞌuni King Balak thugna Sipoa, mae ihei teke king tifa ka vikegna Moab ia? Mana neke theome fapholai ba mei magra ka kuꞌemi ghehati tifa ra!

²⁶ Ghehati khotodihi phei namono Hesbon ghe Aroa, baludi namono ikodi te au faligohodi phei namono igre, nei baludi namono te gnafa te au ka keha philegna khoꞌu biꞌo Anon nabagna thilo gobi finogha gognarona. Igne thofno raugha farahi, eghume naugna unha ne theome mei hata ka ghehati tifa?

²⁷ Ghehati theome eni kolho kaisei glepo te diꞌa ka ghotilo! Nu ghotilo kolho te edi glepo te diꞌa te mei ghotilo te magri ghami ghehati! Lord mae ihei te fate naikno ka puhi te doglo na, mana ginauna laseni ihei ka tahati te au nogna nolaghi ka glose igne.”

²⁸ Nu king gna Amon igne tirogna au gloloni nogna cheke Jefta igne.

Jefta ne eni kaisei nhaꞌa cheke

²⁹ Ka narane igne Tharunga gna Lord na mei ka Jefta ne tusu lao nolaghi ka mana. Aonu mana tei ka nogna glose Gilead nei ka nogna glose Manase ne kilo meidi mae te mala magra re. Eghuteuna mana neke pulo mei Mispa jare Gilead, eghuteuna funu jare mana ne batuni kaisei armi ne tei magra ka vikegna Amon.

³⁰ Mana ne eni kaisei nhaꞌa cheke ka Lord. Mana ne cheke eghu, “Jame snakreni iagho te uluni iara nogna armi mae Amon na,

³¹ eghuteuna kate pulo mei iara na, iara baubahu mala tusu ari ka iagho ihei te kulu jifla mei te thafo ghau iara na. Iara ginauna gahu jateula fafara eghu ka iagho.”

³² Aonu Jefta batuni nogna armi na ne tei ka vikegna Amon mala magradi mare. Eghuteuna Lord toghoni Jefta ne uluni mare magra igne.

³³ Mana ne fufunu namono Aroa eghuteuna mana falehedi mare ne ghilei tei posa ka rijon te au namono Minit, eghuteuna mana ne goigonidi nabotho phei nodi namono mare ne ghilei tei posani namono Abel-Keramim. Ka narane tuana, Jefta ne aknu falehe kmana naiknodi Amon. Ka puhi igne naiknodi Israel igre te uluni vikegna Amon.

³⁴ Jefta au kaisei thugna gaꞌase kolho, mana theo kaisei thugna nalhaꞌu. Kate pulo mei Jefta Mispa ka nogna namono na, thugna gaꞌase mana na jifla mei ne thafoni mana. Naꞌa ragi ne jifla mei balu nogna tamborin.

³⁵ Kate filoni thugna na, Jefta thofno diꞌanagnafa fara ne rerheku nogna pohe na tanhi ne cheke eghu, “Thuguo, iara diꞌanagnafagu fara ka iagho! Puhi igne goigoni ghau iara fara! Naugna iara neke enihi kaisei baubahu ka Lord te theome tangomana iara te lopini!”

³⁶ Eghuteuna naꞌa ne cheke eghu, “Mama, Lord ne eni glepo te keli kate fakarhi nigho ka nou naokare. Naugna iagho neke nhaꞌa chekehi ka Lord, eghume iagho eni ka iara unha teke nhaꞌa chekeni iagho na.”

³⁷ Aonu naꞌa toreni kmagna na ne cheke eghu, “Mama, iara au kaisei glepo te magnahaghei toreni ka iagho. Iara magnahaghei nigho iagho te snakre ghau iara mala jifla tei nabagna phei nhigra mala tei iara ka thogele ro mala au baludi kheragu gaꞌase ra mala kafe tanhi fodu naugna iara ginauna theome tangomana na teke tolaghi na.”

³⁸ Kmagna na ne cheke eghu, “Uve, iagho tangomana te tei na.” Aonu mana snakreni thugna na ne tei nabagna phei nhigra. Aonu naꞌa baludi kheragna gaꞌase igre ne tei ka thogele ro ne tanhi naugna naꞌa ginauna theome tolaghi ne ghilei thoke mei nogna narane te mala lehe na.

³⁹ Ke leghugna te gnafa phei nhigra igre, naꞌa neke pulo ka kmagna na. Mana ne eni unha teke nhaꞌa chekeni ka Lord. Aonu gaꞌase igne ne theome tolaghi nei au thugna neu ne ghilei lehe.

⁴⁰ Naugna igne leuleghu finogha na gaꞌasedi Israel igre jifla tei tanhi nabagna fati narane ke ghatho fapuloni thugna gaꞌase Jefta maegna Gilead.