Fapea Tesalonika 1 - Buka Blahi Ka Cheke Holo

¹ Iara mae Pol baludi mae Silas ghe mae Timoti, te riso ari letas igne ka ghotilo naikno khiloau te au Tesalonika nogna God Kmada nei Lord Jisas Kraes.

² Ghehati toreni nogna khokofakasai nei pharikeli God Mama nei nogna mae Jisas Kraes noda Lord te mala au balumi.

Fate kate meigna mae Kraes

³ Ghehati cheke fakelini God leghu rane eimi ghotilo kheraguro. Nabami ghehati te eni igne, naugna nomi fatutuani ghotilo na bruara fara. Eghuteuna namha te sopa au ka ghotilo te gnafa na jaola bruara.

⁴ Eghume ka keha khiloau gre, ghehati fahaehaghe ghami ghotilo naugna ghotilo kegra maku nei fatutuani fabrahu kate fakokhoana ghami ba para ghami ka kmana puhi biꞌo.

⁵ Glepo igre thofno falalase puhigna God mala fatedi naiknore thofno doglo fara. Eigna God magnahaghei ghami ghotilo naba te mala au baludi naikno God te funei frunidi. Tuana gaoghathogna te au papara ghotilo gne.

⁶ Eghuteuna God ginauna eni unha te doglo fara. Mana ginauna foli fapulo puhi biꞌo fara ka iheire te ei puhi biꞌo ranghi ghami ghotilo.

⁷ Eghume te chekeni iara ka ghotilo iheire te au papara fara ra, God ginauna fagnafa ghami ghotilo balumi ghehati kate thakle meigna Lord Jisas funu kligna balu nogna tothoghei engel te nolaghi.

⁸ Mana ginau mei funu kligna balu khaꞌaghi ngaja mala fatedi iheire te theome laseni God, nei iheire te tirodi leghuni u Nonomho te Keli eigna noda Lord Jisas Kraes.

⁹ God ginauna paradi fabrahu naikno tuare. Mana ginauna theome snakredi iheire te theome laseni God nei iheire te theome magnahagheni thofno karha te mala au balugna Lord, nei lisei fadeleidi ka nogna nolaghi te biꞌo.

¹⁰ Kate mei ka narane biꞌo tuana, mana ginauna hata nafnakno ka nogna naikno blahire. Eghuteuna naikno teke fatutuani ni mana tuare ginauna kilo fnaknoni mana. Ghotilo ginauna au ke lamnagna tothoghei naikno fatutuani tuana, naugna ghotilo ne fatutuanidi unha te chekedi ghehati ra.

¹¹ Naugna igne, ghehati tarai koba eimi ghotilo, nei toreni noda God mala togho ghami nei nabami te au ka nakarha te keli teke kilo ghamihi mana. Eghuteuna ghehati jaola toreni God ka nogna nolaghi mala togho ghami ghotilo mala leghudi gaoghathomi nei loku fahui gloku teke edi ghotilo naugna te fatutuani ni God.

¹² Jame eni ghotilo igne na, nanghagna noda Lord Jisas Kraes na ginau fnakno ke lamnami. Eghuteuna ghotilo tangomana te hata nafnakno ka mana. Nafnakno tuana mei funu ka nogna namha noda God nei Lord Jisas Kraes.