Fapea Kronikols 33 - Buka Blahi Ka Cheke Holo

King Manase gna Juda

¹ Manase neke nabotho phei finogha gna neku neke kegra king gna Juda. Mana neke king Jerusalem glimafulu glima finogha.

² Mae king igne neke edi puhi te diꞌa re ka tathagna Lord na. Mana neke leghudi puhi te diꞌa teke edi naikno bongihehe tifa, iheire Lord teke khi fajifladi ka nodi namono naiknodi Israel.

³ Mana tei neke babana fapulo nodi vido blahi naikno bongihehe teke paꞌe soru mae kmagna mana King Hesekaea ra. Mana horo olta mala tarai ka Baal, eghuteuna mana horo kaisei mumuju gna god gaꞌase Asera. Eghuteuna mae Manase jaola tarai ka nathunu.

^4-5 Mana horo olta ka phei glalaba faligohoni nogna Sugablahi Lord. Mare edi olta igre mala tarai ka nathunu. Nu tifa na, Lord neke cheke eghu, “Nogu Sugablahi iara Jerusalem igne, vido mala tarai nei pogho soru ka iara.”

⁶ Mana gahu thugna thegna na ka glogu Ben-Hinom mala fafara ka mumuju god. Mana loku ka kuro, pophoji, khoraphaꞌu, fafara mala laseni unha nate thakle mei, eghuteuna mana tei filodi iheire te tangomana te cheke ka tharungadi naikno tela lehehi ra. Mana edi kmana glepo te thono diꞌa fara ka tathagna Lord, eghume Lord na thono diꞌatagna fara ka unha te edi mana igre.

⁷ Aonu mana lilisei kaisei mumuju ka nogna Sugablahi Lord. Nu Lord neke kulu chekehi ka King Devet nei ka King Solomon, neke cheke eghu, “Ghotilo nabotho phei vikegna Israel ra, ghotilo nogu naikno iara. Ka nomi namono te gnafa ghotilo igre, iara neke vahini Jerusalem mala babana ghotilo nogu Sugablahi iara na, eghuteuna Sugablahi igne vido mala tarai nei pogho soruni eghu fabrahu nanghagu iara na. Eghume ghotilo mei mala pogho soru ka iara.

⁸ Eghuteuna jame te leghudi ghotilo nogu cheke iara gre, nei tajidi vetula teke tusu lao mae Moses ka kuꞌemi ghotilo tifa ra teuna. Iara ginauna theome snakredi keha naiknore mala khi fajifla ghami ghotilo ka kantri teke tusu lao iara ka kuꞌemi ghotilo ra.”

⁹ Nu King Manase neke batu fadiꞌadi naiknodi Juda nei Jerusalem ka nakhibo te thono biꞌo fara salaꞌudi nakhibodi naikno bongihehe teke goigonidi Lord ka narane teke hata meidi mana naiknodi Israel teke au ka kantri igne.

King Manase neke figri gaoghathogna na

¹⁰ Neuba Lord ne cheke faheta ka King Manase nei ka nogna naiknore neu, nu mare tirodi fanomho kolho ka mana.

¹¹ Aonu Lord ne snakredi komandadi armi gna Asiria mala mei magra ka mare. Mare ne lokini Manase, ne fachakhi lao thagho ka nehugna mana na. Mare haruni mana chen teke horo ka bras, eghuteuna mare hatani mana ne tei Babilon.

¹² Mana au papara ne diꞌanagnafagna fara, aonu mana ne tarai ne toreni God mala toghoni. Mana nhaꞌa faparini thegna neke figri ka Lord nodi God kuꞌegna tifa ra.

¹³ Lord nomhini nogna tharai mana na ne kokhoni nognani, aonu Lord snakreni mana mala ke pulo funei fruni Jerusalem. Naugna igne King Manase thofno laseni te Lord ngala God na.

¹⁴ Ke leghudi igre, Manase neke babana fapulo gringni thinagna namono biꞌo Jerusalem ka vido te kiloni mare nogna Namono biꞌo King Devet. Mana neke eni haghe kligna gringni thina igne. Mana neke fufunu loku fei ke mosu glogu glokha khoꞌu Gihon ne tei thoke ka Grengatha Sasa ne lithui ne tei ka thogele Ofel. Aonu mana ne vahidi mae komanda di armi mala au ka namono te gnafa Juda.

¹⁵ Mana ne hata koko ne gnafa mumuju god di delei nei mumuju gna god gaꞌase Asera teke lilisei mana ka nogna Sugablahi Lord. Eghuteuna mana hata ne tei koko mumuju igre ke kosigna namono na. Eghuteuna mana jaola ne paꞌe soru nodi olta mae bongihehe teke horo mare ka thogele aheva te kegra Sugablahi na, nei ka keha vido ka namono na, igre mana ne jaola ne koko.

¹⁶ Mana jaola neke babana fapulo nogna olta Lord te mala gahu fafara te mala laseni mare te au fakeli balugna Lord, nei mala tegioni mana. Aonu mana ne cheke ka naiknodi Juda mala tufru soruni kolho Lord nodi God mae Israel.

¹⁷ Neuba naiknore ne fafara koba ka keha vido blahi jare Juda, nu mare fafara kolho ka Lord nodi God.

King Manase ne lehe

¹⁸ Keha glepo teke edi King Manase re, tharai teke edi mana ka nogna God na, chekedi mae profet teke cheke mare ka king ka nanghagna Lord nodi God mae Israel teu igre, mare neke rioriso soru ka Buka Eidi Glepo Teke Edi King Di Israel.

¹⁹ Eghuteuna keha glepo la ngau teke edi Manase re, Hosae neke rioriso soru ka nogna buka na. Ka buka igne, au thoutonu eigna nogna tharai mae Manase nei nogna cheke tughu God ranghini mana. Eghuteuna ka buka igne jaola au thoutonu eidi glepo te diꞌa teke kulu edi mana re, nei thoutonu eidi puhigna mana te diꞌa re, nei thoutonu eidi vido aheva teke horo mana vido blahi re, nei thoutonu eigna mumuju gna god gaꞌase Asera nei keha mumuju god teke lisei haghe langau mana re eghu. Igre glepo teke edi mana ame nhaꞌa faparini nga thegna teku na.

²⁰ Aonu kate lehe mae Manase na mare ne giugiluni mana rhegna nogna suga na. Eghuteuna thugna mana mae Amon neke tughuni mana neke kegra king.

King Amon gna Juda

²¹ Ka narane te king mae Amon Juda igne, mana varadaki phei finogha gna. Eghuteuna mana king Jerusalem phei finogha kolho.

²² Mae Amon neke jaola neke edi glepo te diꞌa re ka tathagna Lord, jateula teke edi kmagna mana King Manase ra neku. Mana tarai koba ka mumuju teke edi kmagna re.

²³ Nu mana theome jateula mae kmagna neku, naugna mana neke theome nhaꞌa faparini thegna ka Lord. Mana edi koba glepo te diꞌa re, eghume nabagna te thokeni papara biꞌo na.

²⁴ Eghuteuna nogna mae biꞌo thegnare ne majorani mana, eghuteuna mare tei ne aknu faleheni mana ka nogna suga na.

²⁵ Aonu naiknodi Juda gre tei ne aknu falehe goro mae biꞌo teke aknu faleheni mae Amon igre, eghuteuna mae Josia thugna mae Amon igne ne king tughuni mana.