Fapea Kronikols 27 - Buka Blahi Ka Cheke Holo

King Jotam gna Juda

¹ Jotam neke varadaki glima finoghagna neu neke king, eghuteuna mana neke king Jerusalem nabotho namno finogha. Idogna mana na Jerusa thugna gaꞌase Sadok.

² King Jotam edi koba glepo te doglo ka tathagna Lord jateula teke edi kmagna ra neu, nu mana theome ruma ka nogna Sugablahi Lord mala gahu insens jateula kmagna neu. Nu naiknore jateula teke tifa ra neu ne edi neu ngala thua nafnata puhi te diꞌa re.

³ Mana ke fakekheli fapulo grengatha ke rarugna glalabagna nogna Sugablahi Lord, eghuteuna mana edi kmana gloku ka gringni thina gna namono biꞌo Jerusalem ka vido te kiloi mare Ofel.

⁴ Eghuteuna mana horo suga ke klignadi thogeledi Juda, eghuteuna mana horo suga mata mala toetoe.

⁵ Ke leghu, Jotam baludi nogna soldia re tei ne magra ka king gna kantri Amon, eghuteuna nogna soldia Jotam igre ne uludi soldia di Amon. Aonu thilo finogha igre Jotam ne cheke ka naiknodi Amon mala foli takis ka mana. Leuleghu finogha na mare tufa ka mana glepo igre: thilo thogha fati gobi kilo silva, eghuteuna fitu salei phei thogha glima gobi baeg wit te biꞌo, eghuteuna fitu salei phei thogha glima gobi baeg bali te biꞌo.

⁶ Aonu Jotam ne rheta fara, naugna mana ghatho tahu te mala leghuni puhigna Lord nogna God.

⁷ Thoutonu eidi gobigna lepo teke edi mae Jotam funu ka narane teke king mana te ghilei lehere, mare neke rioriso soru thoutonu igre ka Buka Eidi Glepo teke Edi King di Israel ghe Juda.

⁸ Mana neke varadaki glima finoghagna neke king nga, eghuteuna mana neke king Jerusalem nabotho namno finogha.

⁹ Kate lehe mae Jotam na, mare neke giugiluni mana ka bekudi hatimare mae king ka nogna Namono Biꞌo King Devet. Eghuteuna thugna mana Ehas, neke tughuni mana.