Fapea Kronikols 12 - Buka Blahi Ka Cheke Holo

Maedi Ijep mei Juda mala magra

¹ Kate funei fruni Rehoboam te kaisei king rheta gna Juda na, mana baludi nogna naiknore ne figri tagruni nogna Vetula Lord.

² Naugna mana ne theome ghatho tahuni Lord, ka falima finogha te king Rehoboam igre, King Sisak gna Ijep ne haghe magra Jerusalem.

³ Ka narane tuare, King Sisak au kaisei thogha phei gobi chariot mala magra, nei namno salei thogha soldia ka hose. Mae soldia te mei balugna mana funu Ijep igre theome tangomana te kahadi, soldia igre maedi Libia, Suki nei Kus.

⁴ Mare ne uludi namono rhetadi Juda te bara te ligoho ka thina igre ne ghilei tei posa Jerusalem.

⁵ Profet Semaea tei ne filoni King Rehoboam baludi mae lida di Juda teke rikhani Sisak te kafe au fodu teu Jerusalem. Mana ne cheke eghu ka mare, “Lord ne cheke eghu, ‘Ghotilo tei koko ghau iara, eghume, iara ginauna tei koko ghami ghotilo ka khamegna Sisak!’ ”

⁶ Aonu king baludi mae lida igre ne nhaꞌa faparidi thedi ne cheke eghu, “Tutuani, Lord na doglou kolho.”

⁷ Kate filoni Lord te nhaꞌa faparidi thedi mare na, mana neke cheke eghu ka profet Semaea, “Naugna tela nhaꞌa faparidi thedi mare na, iara ginauna na theome goigonidi mare. Kate mei magra King Sisak Jerusalem na, iara ginauna theome snakreni mana mala goigonidi mare. Tutuani, iara neke diꞌatagu fara ka mare, nu iara ginauna theome snakre lao namono Jerusalem ka khamegna Sisak mala goigonidi mare.

⁸ Neuba, iara ginauna snakreni Sisak king gna Ijep mala tapla faparidi mare mala au mare ke parigna nogna nolaghi mana. Eghuteuna ka puhi igne mare ginauna laseni, puhi te loku ranghi ghau iara na thofno keli fara, nu puhi te loku ranghini king gna nauthoglu igne na theome keli.”

⁹ King Sisak balu nogna soldia mei ne magra Jerusalem. Mare ne hata famane glepo te au ka nogna Sugablahi Lord nei ka nogna suga biꞌo king. Mare hata ne tei gobigna lepore. Mare jaola ne hata greoreo mala magra teke horo King Solomon ka gol.

¹⁰ Ke leghu, King Rehoboam neke horo greoreo ka bras mala ke tughudi greoreo teke hata maedi Ijep ra. Hatimare mae komanda te mala reireghi grengathagna nogna suga biꞌo na, mae igre te mala fiofilodi greoreo igre.

¹¹ Eghuteuna leuleghu fata na king tei ka nogna Sugablahi Lord na, mae sekiuriti igre mare pala greoreo igre mala reireghini mana, eghuteuna ke leghu mare ke lisei fapulo ka nodi chogho na.

¹² Naugna King Rehoboam te nhaꞌa faparini thegna na, Lord na theome diꞌatagna fara ka mana theome goigonini Juda. Eghume, ka narane igre naiknodi Juda gre ne leghuni puhi te keli na.

King Rehoboam ne lehe

¹³ Rehoboam thugna King Solomon, mana kaisei mae king gna Juda te kegra heta kate phiatutu kaisei finogha. Eghuteuna mana king nabotho fitu finogha Jerusalem, namono biꞌo teke vahi fadelei Lord ka namono te gnafa Israel mala tarai nei tufru soruni eghu Lord jare. Idogna king na Nama vikegna Amon.

¹⁴ Mae Rehoboam ne edi glepo te diꞌa ka tathagna Lord, naugna mana ne theome ghaoghatho heta te mala toreni Lord te mala batuni ka puhi te doglo.

¹⁵ Thoutonu eidi glepo teke edi King Rehoboam funu ka narane teke king mana te ghilei thoke ka narane teke lehe mana na, nei thoutonudi vikegna mana re eghu, mare neke rioriso soru ka phei buka te kilodi, nogna Thoutonu Profet Semaea nei nogna Thoutonu Profet Ido. Ka narane te king Rehoboam igre, nogna armi mana na magra koba ka nogna armi King Jeroboam.

¹⁶ Kate lehe King Rehoboam igne, mare ne giugiluni mana ka bekudi hatimare mae king ka nogna namono biꞌo King Devet. Eghuteuna mae Abaeja, thugna mana na neke king tughuni mana.