Fapea Korin 2 - Buka Blahi Ka Cheke Holo

¹ Eghume te ghathoni iara eigna igne na, iara na theome ariu ka ghotilo naugna iara neke theome magnahaghei mala ke fadiꞌa nagnafami ghotilo.

² Eigna jame te fadiꞌa nagnafami iara na, ihei gne nate fakeli nagnafagu iara ginauna? Naugna ghotilo ngala tangomana te mala faglealeꞌa ghau iara na. Nu ghotilo theome tangomana te gleale'a na jame te fadiꞌa nagnafa ghami iara na.

³ Ka gaoghatho tuana teke riso arini iara letas na ka ghotilo tifa ia. Neuba iara neke magnahaghei te ari filo ghami ghotilo na, iara theome magnahaghe ghami ghotilo naikno te tangomana te mala faglealeꞌa ghau iara ra te fadiꞌa nagnafa ghau iara na. Te thofno ghathoni iara na, ghotilo te gnafa na mala gleale'a balugu iara.

⁴ Tutuani fara, kate riorisoni letas tifa ia, iara neke diꞌanagnafa fara balu tanhi fabiꞌo kolho. Eghuteuna iara neke theome risoni letas tuana mala diꞌanagnafa ghotilo neku, nu mala laseni ghotilo hui te thofno namha ghami fara iara na kolho.

Mae Pol ne hata fadeleidi nakhibogna kaisei mae

⁵ Mae ihei ka ghotilo te fadiꞌa nagnafadi keha naiknore igne theome thofno eni ranghi ghau iara, nu mana jateula te fadiꞌa nagnafa ghami ghotilo hui eghu kolho. Iara theome magnahaghei te toutonuni kaisei glepo te thono goigoni naikno na.

⁶ Puhi te eni ghotilo naikno kmana ranghini mae tuana la nabagnahi.

⁷ Nu gognaro na ghotilo hata fadeleidi nakhibogna mana re nei toghoni eghu mana mala thosei diꞌanagnafa mana. Na eghunu diꞌanagnafa fara mana me ghilei babaꞌo eghu.

⁸ Eghume iara tore ghami ghotilo mala namhani fara mana, mala laseni mana te namhani mana ghotilo na.

⁹ Iara neke riso ari kaisei letas ka ghotilo tifei naugna iara neke magnahaghei fariuriu ghami ghotilo mala laseni te leghudi koba ghotilo unha te chekedi iara ka ghotilo ra.

¹⁰ Ihei te hata fadeleidi ghotilo nakhibognare, iara jaola hata fadeleidi nakhibo tuare ka mana, eghu te edi mana unha te naba iara te hata fadeleidi ka mana re. Iara hata fadeleidi nakhibogna mana re ke ulugna Kraes, naugna iara magnahagheni te togho ghami ghotilo.

¹¹ Ka puhi igne Satan ginauna theo nogna nolaghi te mala saosagro ke klignada, naugna tahati lasedihi nogna gaoghatho mana re.

Na au kmoꞌei mae Pol Troas

¹² Kate posa iara Troas te toutonuni u Nonomho te Keli eigna Kraes na, iara laseni Lord na neke tarabana kaisei nabrou malagu iara te togho ghau mala edi kmana gloku te keli jare.

¹³ Nu iara neke thono nanga nogu fara, naugna iara neke theome ludeni mae kherada Taetus. Aonu iara kubaedi kolho naiknore doglo nga me mei Masidonia.

Kraes na la uluhi

¹⁴ Nu ghehati ne cheke fakelini God, mae ihei te togho ghami fabrahu balugna Kraes te mala uluni ghehati u magra na ka vido aheva mana teke kuru lao ghami na. God ne loku ke lamnami ghehati mala tangomana glalase eigna Kraes na te tei tongana heva heva jateula insens te siri keligna fara.

¹⁵ Ghehati na jateula nogna insens Kraes eghu mala kilo fnaknoni God ke lamnadi iheire God teke fakarhidi nei iheire te snivi fabrahu.

¹⁶ Ka iheire te snivi fabrahu re, sisiri igne siri diꞌagna fara, eghuteuna hata mei glehe ka mare. Nu ka iheire teke fakarhidi God re u sisiri igne thofno keli fara eghuteuna hata mei karha ka mare. Eghume ihei te nabagna na gloku igne?! Iara theome nabagu!

¹⁷ Ghehati theome jateula kmana naikno te magnahaghei sileni kolho kate toutonuni chekegna God na ia eghu sia. Theo. God neke vahi ghami ghehati, eghuteuna ghehati chekeni koba ka nagnafa te tutuani ke ulugna mana. Ghehati toutonuni chekegna mana na naugna ghehati nogna mae gloku Kraes.