Fapea Korin 13 - Buka Blahi Ka Cheke Holo

Cheke leghu lahu balu kubae

¹ Igne fatilo fata nate ari posa iara ka ghotilo na. Ghathoni u grioriso te blahi na ne cheke eghu, “Kate fathoethoke ihei eigna keha naikno na, phei ba thilo naikno teke filo tathadi puhi igne na mala au fanomho ka unha te chekeni mana na.”

² Ka fapea fata teke ari posa iara ka ghotilo ia, iara neke cheke faheta farahi ka naikno teke tapla jafra ka nakhibora. Eghuteuna gognaro na iara theome au balumi ghotilo, nu iara cheke ka naikno tuare baludi keha naikno ke lamnami ghotilo te tapla jafra ka nakhibo gognaro gre. Kate ari iara ginau ka ghotilo na, iara ginauna kafe fatedi gnafa naikno tuare.

³ Iara ginauna eni igne naugna ghotilo magnahaghei te filo glanini Kraes te loku ke lamnagu iara te mala toutonuni chekegna mana na. Ghotilo ginauna filoni Kraes na theome nigra kate loku ke lamnami ghotilo na. Theo. Mana ginauna fatakleni ka ghotilo nogna nolaghi biꞌo mana na ka iara.

⁴ Tutuani mana neke nigra ka teke tupijuruni mare ke kligna gaju fafatha na, nu gognaro na mana karha ka nogna nolaghi God. Tutuani ghehati nogna mae gloku Kraes gre jaola nigra. Nu ghehati karha balugna mana ka nogna nolaghi God. Eghuteuna ghehati ginauna ari jare mala fadogli ghami ghotilo ka nolaghi igne.

⁵ Ghotilo mala fariuriu ghami themi koba mala laseni ghotilo te thofno fatutuani ni Kraes ba theo. Tutuani, ghotilo thofno laseni mae Jisas Kraes te au ke lamnami na, na eghunu theome fatutuani ni mana ghotilo eghu!

⁶ Nu te rouronuni iara na ghotilo ginauna na filo ghami ghehati te kegra heta ka fariuriu na.

⁷ Ghehati toreni God mala togho ghami ghotilo mala thosei eni kaisei najafra. Ghehati theome eni igne mala thakle ka ghotilo te mae gloku keli ghehati na. Theo. Ghehati magnahaghe ghami ghotilo te kegra heta ka puhi te keli, neuba naiknore ne chekeni ne theome kegra heta ghehati kau fariuriu teuna.

⁸ Naugna ghehati theome tangomana te eni kaisei glepo te mala fanograni cheke te tutuani igne, nu ghehati tangomana te mala toghoni kolho cheke te tutuani igne.

⁹ Ghehati gleale'a fara jame te kegra heta ghotilo ka puhi te doglo na, neuba ghehati ne jateula te nigra neu kolho. Eghume ghehati tarai mala tangomana ghotilo te thofno naikno keli fara ke ulugna God na.

¹⁰ Iara riso ari letas igne kate theome au teu balumi ghotilo naugna kate ari iara te posa ka ghotilo na, iara theome magnahaghei te cheke faheta ranghi ghami ka nolaghi biꞌo teke tusu mei Lord ka iara igne. Mana neke tusu mei ka iara nolaghi igne mala toghodi nomi fatutuani ghotilo re mala heta, theome mala goigoni ghami ghotilo.

¹¹ Uve kheraguro, ghehati magnahaghe ghami ghotilo te gleale'a. Fariuriu edi unha te chekedi iara ka ghotilo gre mala thofno au klino. Eghuteuna ghotilo te gnafa na mala kaisei gaoghatho ngala nei mala kaisei au ngala kau pharikeli. Ka puhi igne God mae ihei te tusu ranghi ghita u namha nei pharikeli teu igne ginauna au balumi ghotilo.

¹² Kubae fari themi balu namha ghotilo te au ka namono Korin.

¹³ Naikno te gnafa nogna God kubae ghami ghotilo.

¹⁴ Iara toreni ka God nogna khokofakasai noda Lord Jisas Kraes, nei nogna namha God, nei nogna loku fodu mae Tharunga te Blahi mala au balumi ghotilo hui. Me gnafa. Iara, mae Pol.