Fapea Kings 9 - Buka Blahi Ka Cheke Holo

Mae Jehu ne king gna Israel

¹ Kaisei narane, profet Elisa ne kilo meini kaisei mae profet majaghani, ne cheke eghu ka mana, “Iagho tarabana mala tei Ramot-Gilead. Eghuteuna iagho hata botol oliv oel igne.

² Kate posa lao iagho ka namono igne, iagho tei hironi mae Jehu thugna mae Jehosafat thugna mae Nimsi. Eghuteuna iagho kiloni mae Jehu mala jifla mei ka kheragna re, eghuteuna hatani mana tei lamna chogho.

³ Eghuteuna iagho tofa oel igne ka phaꞌugna mana na, eghuteuna iagho cheke eghu ka mana, ‘Igne unha te chekeni Lord na, iara vahi nigho iagho mala king gna Israel.’ Eghuteuna iagho tora grengatha na faghose rikha, thosei ofo!”

⁴ Aonu mae profet majaghani igne ne tei Ramot-Gilead.

⁵ Kate posa mana ka namono igne, mana ne filoni mae Jehu baludi keha mae komanda. Eghuteuna mana ne cheke eghu, “Komanda, iara hata mei kaisei nonomho mala toutonu ka iagho.” Mae Jehu ne cheke eghu ka mana, “Malagna ihei ka ghehati?” Mae profet ne cheke eghu, “Malamu iagho komanda.”

⁶ Eghume mae Jehu kegra haghe ne tei ruma ka suga na. Mae profet igne ne tofa oel ka phaꞌugna mae Jehu na ne cheke eghu, “Igne unha te chekeni Lord nodi God mae Israel na, ‘Iara vahi nigho iagho mala nodi king nogna naikno Lord Israel.

⁷ Iagho mala roꞌeni nou King Joram, nei iheire te gnafa ka vikegna mae Ehab, naugna tifa na Kuin Jesebel neke aknu falehedi mae profet nei keha nogu mae gloku iara ra. Ka puhi igne, iara ginauna nake tughu fapulo puhigna naꞌa te diꞌa ra.

⁸ Naikno te gnafa ka vikegna King Ehab, neubane naikno sneka ba snagla, naikno te gnafa igre mala kafe lehe.

⁹ Iara ginauna na fagnafani vikegna mae Ehab, jateula teke eni iara ka vikegna King Jeroboam, thugna mae Nebat, nei vikegna King Bahasa, thugna mae Ahaeja ra eghu.

¹⁰ Eghuteuna Jesebel gne, khuma ginauna ghamu thini gna na ka namono Jesrel. Eghuteuna theo kaisei naikno nate giugilui thinigna naꞌa na.’ ” Aonu mae profet majaghani igne jifla ka suga na ne rikha.

¹¹ Kate pulo mei mae Jehu ka keha mae komanda igre, mare ne ghusna eghu ka mana, “Ba, gobigna lepore keliu kolho? Unha eghu te chekeni mae te fameomekro ia ka iagho na?” Aonu mana ne cheke eghu, “Ghotilo lasedi nogna nafnata cheke mae igne ra.”

¹² Nu mare ne cheke eghu, “Tuana theome tutuani! Chekeni ka ghehati sagho!” Aonu mae Jehu ne cheke eghu, “Mana neke cheke eghu ka iara, ‘Igne unha te chekeni Lord na: Gognarona iara vahi nigho iagho mala king gna Israel.’ ”

¹³ Mare ghosei ne fasukha nodi pohe brahu re ne pakra soru ke parigna mana mala kegra mana ke klignadi. Eghuteuna mare ne eha eghu fabiꞌo, “Jehu na mae King!”

^14-15 Ka narane tuana, King Joram au neu Jesrel, naugna mana au kmu mala ke keli fapulo ke leghugna narane teke ghoreho ka magra balugna King Hasael gna Siria ka namono Ramot-Gilead. Mae Jehu ne ghaoghatho mala tei faleheni King Joram. Eghuteuna mana ne cheke eghu ka hatimare mae komanda, “Jame te kaisei gaoghatho tutuani ghotilo te togho ghau iara te mala king na, ghotilo tei toutonu nonomho igne Jesrel.”

¹⁶ Aonu mae Jehu saghe ka nogna chariot na ne tei Jesrel. King Joram au kmu neu Jesrel, eghuteuna King Ahasaea gna Juda mei ne sighoni mana, eghuteuna King Joram au neu ka namono igne.

¹⁷ Aonu kaisei mae kegra neu kligna ka gringnigna namono biꞌo na ne filo tei fagaꞌu, eghuteuna mana ne filo teini mae Jehu baludi nogna mae soldia re. Aonu mana ne eha eghu, “Ei, iara filodi keha mae soldia mei au!” Aonu King Joram ne cheke eghu, “Iagho kuruni kaisei mae soldia mala tei ka hose, mala ghusna eghu, ‘Ba, ghotilo mei ka pharikeli’?”

¹⁸ Aonu kaisei mae soldia ne tei ka hose mala tei thafodi mare. Aonu mana ne cheke eghu, “King ne cheke eghu, ‘Ghotilo mei ka pharikeli sia’?” Nu mae Jehu ne cheke eghu, “Unha site magnahaghei laseni iagho pharikeli gnea? Mei sagho balumi ghehati.” Aonu mae te reireghi teu igne ne eha eghu, “Ei! Mae soldia ia thokehi ka mare, nu mana theome ke pulo mei!”

¹⁹ Aonu king neke kuru tei keha mae soldia na. Eghuteuna kate tei namo ka mare na, mae soldia igne ne cheke eghu, “King ne cheke eghu, ‘Ghotilo mei ka pharikeli sia’?” Nu mae Jehu ne cheke eghu, “Unha site magnahaghei laseni iagho pharikeli gnea? Mei sagho balumi ghehati.”

²⁰ Aonu mae te reireghi teu igne neke eha eghu, “Ei! Mae soldia ia thokehi ka mare nu mana jaola theome ke pulo mei! Sei! Nodi lida mare ka chariot na umhu mei jateula kaisei mae te fameomekro ra eghu! Jateula mae Jehu thugna mae Nimsi eghu filogna na!”

²¹ Aonu King Joram ne cheke eghu, “Ghotilo tarabana nogu chariot iara ia.” Kate tarabana mare hata te mei na, King Joram ne saghe ka nogna chariot na, eghuteuna King Ahasaea jaola ne saghe ka nogna chariot na, aonu phiamare tei ne thafoni mae Jehu ka nogna vido glose mae Nabot maegna Jesrel teke lehe tifa na.

²² Eghuteuna King Joram ne ghusna eghu ka mae Jehu, “Jehu, iagho mei ka pharikeli?” Nu mae Jehu ne cheke eghu, “Faꞌunha tangomana te au ka pharikeli na? Idomu iagho na batudi naiknore mala pogho soru ka mumuju nei loku ka naitu!”

²³ Aonu kate nomhini igne, King Joram figri nogna chariot na mala rikha neu, aonu mana ne eha eghu fabiꞌo, “Ei, King Ahasaea, kaisei phighoro!”

²⁴ Eghuteuna mae Jehu hata nogna phaloho na ne fadi leghuni mae King Joram. Eghuteuna jata te fada mana igne tei ne kahi farihoteidi phei khekleghogna mae King Joram re ne tei suplu ka nagnafagna mana na. Eghuteuna mana khoko soru ke lamna chariot ne lehe.

²⁵ Mae Jehu ne cheke eghu ka mae Bidka nogna mae soldia na, “Iagho hata thinigna king ana mala tei koko ka teke nogna vido glose mae Nabot tifa ia. Ghathoni sagho kani teke saghe tapa ka hose balugna mae King Ehab, kmagna mae Joram. Eghuteuna ka vido igne Lord neke cheke faparini King Ehab.

²⁶ Lord neke cheke eghu, ‘Gnora na iara neke filodi dadaragna mae Nabot baludi thugna ra. Eghume, te chekeni iara ka iagho na, iagho ginauna nake foli fapulo nodi glose mare igne.’ Iagho tei hata thinigna king ia mala tei koko ka glose tuana jateula teke chekeni Lord ia eghu.”

King Ahasaea gna Juda ne lehe

²⁷ King Ahasaea filoni Jehu te aknu faleheni King Joram igne ne figri nogna chariot na rikha ne tei Bet-Hagan. Nu mae Jehu ne ngolho leghuni mana ne cheke eghu ka nogna mae soldiare, “Fadi faleheni!” King Ahasaea ne leghu nabrou ne tei Gua, eghuteuna kate tei namo ka namono Ibleam igne, mare ne fadini King Ahasaea. Nu mana rikha ne tei thoke Megido ne lehe jare.

²⁸ Nogna mae biꞌo mana re hata thinigna mana na ka nogna chariot na neke pulo Jerusalem mala ke giugiluni mana ka bekudi mae kuꞌegna ra ka nogna namono biꞌo King Devet.

²⁹ Ka fabotho kaisei finogha te king mae Joram, thugna King Ehab, mae Ahasaea neke kegra king Juda.

Kuin Jesebel ne lehe

³⁰ Mae Jehu ne tei thoke Jesrel. Eghuteuna kate nomhini Kuin Jesebel nonomho igne, naꞌa ne lalaoni phei tathagna re, eghuteuna pore fakeli khaklagna re. Aonu naꞌa kegra ka wida gna nogna suga na ne filo soru ka nabrou biꞌo na.

³¹ Kate ruma mei mae Jehu ka grengatha gna namono na, Jesebel ne eha eghu ka mana, “Iagho jateula mae Simri eghu! Iagho mae mala faleheni nou funei na! Naugna unha site mei iagho agne gnea? Iara lase nigho iagho theome magnahaghei te au ka pharikeli!”

³² Mae Jehu filo haghe ne eha eghu fabiꞌo, “Ihei te phile ka iara na? Ihei?” Aonu phei ba thiloi mae gloku ka sugagna king na ne filo soru ka wida na.

³³ Aonu mae Jehu ne eha eghu ka mare, “Ghotilo koko soru mei pari agne naikno biꞌo tuana!” Aonu mare tei ne lolhoku ne koko soruni naꞌa pari ka glose na, eghuteuna dadara gna naꞌa re ne sridi tafri ka gringni gna suga na, nei jaola ka hose nei chariot eghu te saghe mae Jehu te tei ke kligna gna thinigna naꞌa na.

³⁴ Aonu mae Jehu tei ka sugagna King Joram na ne ghamu nei koꞌu neu jare. Gnafa teuna, mana ne cheke eghu ka nogna mae glokure, “Hata thinigna naikno biꞌo teke tibri Lord igne mala tei giugilu, naugna naꞌa neke thugna kaisei mae king.”

³⁵ Nu kate tei mare te mala giugilui teuna, mare ne theome filoni thinigna na. Mare ne filoni kolho nhubra phaꞌugna na baludi nhubra khamegna nei ghahegna teure.

³⁶ Kate mei te cheke mare ka mae Jehu na, mana ne cheke eghu, “Igne unha teke chekeni Lord na, kani teke cheke eghu mana ka nogna mae gloku Elija tifa ia, khuma ginauna ghamu thinigna Kuin Jesebel na ka nohi Jesrel.

³⁷ Thinigna na ginauna naga tafri jateula chara eghu pari ka glose na, mala theome tangomana kaisei naikno te cheke eghu na, ‘Igne Jesebel na.’ ”