Fapea Kings 24 - Buka Blahi Ka Cheke Holo

¹ Ka narane te king mae Jehoiakim Juda igre, King Nebukadnesa gna Babilonia neke haghe magra neke hata kantri Juda. Aonu King Nebukadnesa ne vahini mae Jehoiakim mala kaisei nogna mae gloku, eghuteuna mana ne loku ranghini king gna Babilonia nabagna thilo finogha. Nu ke leghudi thilo finogha igre, mana ne funu tirognani King Nebukadnesa.

² Aonu Lord ne kuruni armi gna Babilonia, armi gna Siria, armi gna Moab nei armi gna Amon mala mei magra ka King Jehoiakim. Armi igre mei ne goigonini Juda leghuni nogna cheke Lord teke chekeni hatimare mae profet tifa ra.

³ Hoholo te thokedi naiknodi Juda igre leghuni unha teke chekeni Lord na. Naugna King Manase neke edi kmana glepo te diꞌa tifa na.

⁴ Mana neke aknu falehe kmana naikno te theo nakhibodi igre Jerusalem, eghuteuna Lord na theome tangomana te hata fadelei nakhibo igre.

⁵ Keha glepo teke edi King Jehoiakim igre, mare neke rioriso soru ka Buka Eidi Glepo Teke Edi Hatimare Mae King Di Juda.

⁶ Ke leghugna te lehe mana igne, mae Jehoiakin thugna mana na neke king tughuni kmagna na.

⁷ Ke leghugna igne, king gna Ijep balugna nogna armi na ne theome jifla ka nogna kantri na, naugna king gna Babilonia kela hata kasahila nohi thongana teke khotogna king gna Ijep te funu ka khoꞌu ikoi ka nohigna Ijep tei posa ke raru Khoꞌu biꞌo Iufretis.

King Jehoiakin gna Juda

⁸ Mae Jehoiakin neke nabotho nhana finogha gna neke king gna Juda, eghuteuna mana neke king Jerusalem thilo nhigra kolho. Eghuteuna idogna mana na neke Nehusta thugna mae Elnatan maegna Jerusalem.

⁹ Mae Jehoiakin neke edi unha te diꞌa ka tathagna Lord, jateula kmagna neku.

¹⁰ Ka narane te king mana igre, nogna armi King Nebukadnesa gna Babilonia igne haghe snura ne magra Jerusalem.

¹¹ King Nebukadnesa thegna jaola ne mei ka narane te hata nogna armi na namono biꞌo igne.

¹² King Jehoiakin ghe idogna, nogna mae gloku, nogna komanda, nei nogna mae biꞌo teure ne kafe lisa laodi thedi ka khamedi mae Babilonia. Ka fahana finogha te king Nebukadnesa Babilonia igne, mana hata King Jehoiakin ne tei sosolo Babilonia.

¹³ King Nebukadnesa ne jateula teke kulu chekeni Lord tifa ra neu ne hata ne tei gobigna lepo te keli teke au ka nogna Sugablahi Lord, nei sugagna king teure. Mana ne hata koko gol teke lilisei King Solomon ka Sugablahi na.

¹⁴ Eghuteuna King Nebukadnesa ne hata naikno te gnafa Jerusalem, baludi mae biꞌo, mae komanda, mae iheire te lase loku ka aean ba thaba. Khaputudi naikno igre thokeni nabotho thogha. Naikno te kuma re kolho te au fapulo ka kantri Juda.

¹⁵ Mae Nebukadnesa hata King Jehoiakin ne tei sosolo Babilonia, balu idogna, khetogna re, goro mae biꞌo ka sugagna nei mae nafnaknodi Jerusalem.

¹⁶ Mana jaola ne hata fitu thogha soldia nei kaisei thogha mae te lase loku ka aean nei thaba.

¹⁷ Eghuteuna mae Nebukadnesa ne vahini mae Matanaea, kaisei nebugna King Jehoiakin mala king gna Juda. Aonu mana ne tughu nanghagna mana na ne kiloni mana, Sedekaea.

King Sedekaea gna Juda

¹⁸ King Sedekaea neke varadaki kaisei finoghagna neke king, eghuteuna mana neke king Jerusalem nabotho kaisei finogha. Idogna mana na neke Hamutal, thugna mae Jeremaea maegna ka namono Libna.

¹⁹ Nu mae Sedekaea ne eni unha te diꞌa ka tathagna Lord, jateula teke eni mae Jehoiakim ia neu.

²⁰ Naugna igne, Lord ne diꞌatagna fara ka naiknodi Jerusalem ghe Juda, ne ghilei leghu lahu na, mana ne kuru teidi ka sosolo mala thosei au mare balugna.