Famane Khoje 3 - Buka Blahi Ka Cheke Holo

¹ Kaisei bongi kate fadoglo soru teu iara ka sape na, iara leheni fara kheragu na, nu naꞌa theome au balugu iara.

² Aonu iara kegra haghe ne tei hironi kheragu na heva heva ka nabrou nei ka glalaba gna namono na. Iara hironi kheragu te namhani iara na nu iara theome tangomana te deni.

³ Mae greireghi gna namono igne ne lhoti ghau iara. Aonu, iara ne ghusna eghu ka mare, “Iara hironi kheragu te namhani iara ia. Ba? Ghotilo filoni naꞌa?”

⁴ Nu theome raugha kate jifla kokoni iara mae greireghi igre, iara ne megeinga ne filoni kheragu na! Uve, iara loku famaku ne theome snakre teini, ne ghilei tathalei ne tei ka sugagna idogu na, ka nogna chogho ihei teke fakarhi ghau iara na.

⁵ Goro gaꞌasedi Jerusalem. Ghotilo eni kaisei nhaꞌa cheke te rheta balugu iara Te mala thosei farhana ghami ghepa kate thuru fodu teu ghepa na.

Fatilo khoje

⁶ Ihei site jifla mei funu ka namono nagou jateula gagahu khaꞌaghi biꞌo teu gnea? Sisirigna gna thofno famane fara, jateula sisirigna famane insens, teke atha teke mei mae bisnis funu ka vido khaba fara.

⁷ Ei! King Solomon! Mana gnokro ka nogna sape nafnakno, teke atha neke mei nogna mae glokure. Namno salei soldia nhetadi Israel neke reireghini mana.

⁸ Mare te gnafa na lase fakelini fara puhigna magra na. Mae te gnafa ka mae igre sara bae naflahi fei soro, eghuteuna mare tarabana mala magra baludi iheire te mei magra ka mare bongiro.

⁹ King Solomon neke eni sape nafnakno igne ka thofno famane thaba funu Lebanon.

¹⁰ Mare ghiha tafru ghahegna sape nafnakno igne ka silva, eghuteuna mare ghiha tafru gerigna re ka gol. Mare toku tafru kokhogu gna na ka pohe ngonge. Eghuteuna goro gaꞌasedi Jerusalem loku heta fara te lalaoni lamna na, mala famane fara filo gna na.

¹¹ Mei, ghotilo goro gaꞌasemi ka Thogele Saion! Mei filoni King Solomon! Mana fahaghe nogna khepi nafnakno king teke nhaꞌa lao idogna na ka phaꞌugna mana na, ka narane teke tolaghi mana, igne kaisei narane glealeꞌa biꞌo fara ka nagnafa gna mana na.