Diutronomi 29 - Buka Blahi Ka Cheke Holo

¹ Igre chekegna nhaꞌa cheke teke eni Lord baludi nogna naiknodi Israel. Cheke igre neke cheke mana ka mae Moses kani au teku mare Moab mala toutonu ranghidi naiknore. Nhaꞌa cheke igne neke nhaꞌa lao mae Moses ka nhaꞌa cheke teke eni Lord baludi mare tifa ka Thogele Sanai.

Lordfalalaseni te nodi God mae Israel

² Mae Moses ne kilo meidi naiknodi Israel, aonu mana ne cheke eghu ka mare: “Ghotilo la filodihi gobigna lepo teke edi Lord ka king gna Ijep, nei nogna mae gloku te gnafa, nei naikno te gnafa ka kantri Ijep.

³ Ghotilo neke filodi puhi biꞌo, nei kofubobhoi, nei glepo biꞌo eghu teke fakakhana Lord nogna nolaghi na.

⁴ Nu mei te posa gognarogne, Lord theome tothora gaoghathomi ghotilo re mala lasedi ghotilo glepo teke edi mana re. Mana neke theome tothora tathami ghotilo re mala filo glanidi ghotilo glepo igre, eghuteuna mana jaola neke theome tothora khulimi ghotilo re mala nomhi glanidi ghotilo glepo tuare.

⁵ Lord neke cheke eghu ka ghotilo, ‘Phiatutu finogha iara neke batu ghami ghotilo ke lamna namono nagou, eghuteuna nomi pohe nei nomi slipa teu ghotilo re neke theome breku ba neke theome diꞌa.

⁶ Ka narane tuare, ghotilo neke theome ghamu bret, nei neke theome koꞌu kaisei waen ba kaisei beer, nu iara neke reireghi ghami ghotilo mala laseni ghotilo te iara Lord nomi God ghotilo na.’

⁷ “Kate thoke mei ghotilo ka namono igne na, King Sihon gna namono biꞌo Hesbon, ghe King Og gna namono biꞌo Basan, phei mae igre neke mei magri ghami ghotilo, nu ghotilo neke uludi phiamare.

⁸ Eghuteuna ghotilo neke hata nodi glose phia mae igre. Aonu ghotilo neke tufa ka vikegna Ruben, nei ka vikegna Gad, nei ka vido vikegna Manase.

⁹ “Eghume, leuleghu fata na ghotilo thofno leghuni chekegna nhaꞌa cheke igne mala tangomana ghotilo te au ka nakarha te thofno keli fara.

¹⁰ Gognarona ghotilo kafe kegra haghe ke ulugna Lord. Ghotilo mae mala baubatu te gnafa ra, mae funei ra, mae biꞌo ra, mae khuekuꞌe ra, baludi mae te gnafa Israel ra.

¹¹ Ghotilo goro gaꞌase ra, goro sua ra, naikno phosa te mala uge nomi gaju nei mala pala khoꞌu mei teu ka ghotilo ra.

¹² Gognarona ghotilo kafe kegra haghe agne mala eni nomi nhaꞌa cheke na ka Lord nomi God. Mana neke eni nhaꞌa cheke igne balumi ghotilo, eghuteuna ghotilo lasedi nogna cheke mana te thofno rheta fara igre.

¹³ Mana magnahaghei cheke ka ghotilo gognarogne mala glola fakeli ka ghotilo te nogna naikno mana na, eghuteuna mana nomi God ghotilo, jateula teke nhaꞌa chekeni mana ka thilo kuꞌemi ghotilo tifa ra, mae Ebraham, mae Aesak nei mae Jekop.

¹⁴ Lord neke cheke eghu ka ghotilo, ‘Nu iara neke theome eni nhaꞌa cheke igne balumi ghotilo kolho, eghuteuna theome ghotilo kolho te mala leghuni nogna cheke te nheta mana igne.

¹⁵ Tutuani, iara neke eni nhaꞌa cheke igne balumi ghotilo te kafe kegra ke ulugu iara agne igre, eghuteuna iara jaola eni igne baludi iheire nate karha mei ke leghumi ghotilo ginaure.’

Ghotilo naiknomi Israel ra thosei tei ka keha god delei

¹⁶ “Tutuani, ghotilo laseni unha nafnata nakarha te ninhigrana teke au tahati tagna Ijep tifa ia. Eghuteuna ghotilo jaola laseni teke tei salaꞌu tahati ka nodi glose keha naiknoi te mala mei thoke ka namono igne.

¹⁷ Eghuteuna ghotilo neke filodi mumuju teke horo ka thaba, nei ka thina, nei ka silva, nei ka gol teu te thono diꞌa fara ra.

¹⁸ Eghume ghotilo fiofilo ghami eghuteuna thosei snakreni kaisei naikno mala figri thagrugna na ka Lord nomi God. Neuba kaisei mae, ba kaisei gaꞌase, ba kaisei tharakna, ba kaisei vikemi ghotilo, theo kaisei naikno te tangomana te tei tarai nei pogho soru ka nodi god keha naiknore. Theome keli kaisei ka ghotilo te biꞌo haghe jateula kaisei gaju te ure sisi poesen ra eghu.

¹⁹ “Iheire teke nomhini eigna nhaꞌa cheke igne, nu mana patu gama fara nei leghuni kolho fabrahu puhigna thegna na. Eghume puhi biꞌo igne ginauna goigonini mana nei naikno te gnafa Israel neubane naikno keli ba diꞌa, mare ginauna kafe lehe hui.

²⁰ Lord ginauna theome tangomana nate hata fadelei nakhibogna nafnata mae igne. Diꞌa tagna Lord na ginauna mei ka mae igne jateula kaisei khaꞌaghi eghu. Eghuteuna thibri te gnafa teke rioriso mare ka Buka vetula igre ginauna soru ke kligna gna mana, eghuteuna Lord ginauna ghiha koko nanghagna mana na mala theome tangomana kaisei naikno ka nauthoglu igne nate ghathoni mana na.

²¹ Lord ginauna hata fadelei mae igne ka vike te gnafa Israel, mala koko soru ke kligna gna thibri teke nhaꞌa cheke ni ka Buka vetula igne.

²² “Aonu unha nate eni ginauna, thumi ghotilo re, baludi iheire nate mei ke leghumi ghotilo re, nei naikno phosadi keha kantri te khaba are, mare ginauna filodi puhi biꞌo nate nhaꞌa mei Lord ka namonomi ghotilo are, eghuteuna mare ginauna jaola filodi fogra nate thoke ghami ghotilo.

²³ Heva heva ka nomi glose ghotilo are ginauna krogha, eghuteuna ginauna na theo kaisei glepo nate karha tagna na. Ghotilo ginauna theome tangomana te joꞌu kaisei glepo tagna na. Naugna khaꞌaghi ghe solt ginauna thafru tagna. Neubane kaisei buburu kolho, theome tangomana te jaola te karha tagna na. Nomi namono ghotilo re ginauna diꞌa jateula namono biꞌo Sodom, nei Gomora, nei Adma, nei Seboim eghu teke goigoni Lord tifa kani teke diꞌatagna fara mana ka mare ra eghu.

²⁴ Eghuteuna naiknodi keha namono are ginauna ghusna eghu, ‘Naugna unha si Lord te goigoni glose ignea? Naugna unha si mana te diꞌatagna fara gnea?’

²⁵ “Eghuteuna naiknore ginauna cheke tughu eghu, ‘Naugna mare neke theome leghuni u nhaꞌa cheke teke eni mare balugna Lord nodi God mae kuꞌedi ra, kani teke hata fajifladi ka kantri Ijep.

²⁶ Naiknore figri ne tarai nei pogho sorudi neu keha god teke theome lasedi mare tifa re, eigna Lord theome snakredi nogna naiknore te tarai nei pogho soru teu ka god igre.

²⁷ Naugna igne, diꞌatagna Lord na ne gnubra nodi glose mare igne, eghuteuna thibri te gnafa teke rioriso soru ka Buka gna Vetula na igne ne thoke mei tutuani ka nodi namono re.

²⁸ Lord ne thofno diꞌatagna fara, aonu mana brue fajifladi ka nodi namono re jateula ihei te rathu koko buburu te diꞌa re ka nogna nagare na ia eghu. Eghuteuna koko teidi ka keha kantri delei, aheva te au teu mare tela ghilei mei posa ka narane gognaro gre!’

²⁹ “Lord noda God tahati na au keha nogna gaoghatho poru te theome tangomana kaisei naikno te laseni. Nu mana cheke ranghi ghitahi ka nogna vetula na, nei ka iheire nate karha mei ke leghuda, eghume tahati mala leghudi fabrahu nogna cheke te gnafa mana re.”