Diutronomi 22 - Buka Blahi Ka Cheke Holo

¹ “Jame ghotilo filoni kaisei nogna buluka ba kaisei nogna sipu ba nanigot mae kherami ghotilo te rikha na, ghotilo thofno ke hata fafigri ka mae khotogna na.

² Nu jame mae khotogna na au ka vido te khaba fara, ba ghotilo theome laseni mae ihei khotogna na, ghotilo ginauna hata ke pulo ka namonomi ghotilo na. Ghotilo reireghi fakeli buluka igne ghilei thokeni narane te mei te hironi mae khotogna na. Aonu ghotilo tangomana teke tusu fapulo ka mana na.

³ Eghuteuna jame te filoni ghotilo kaisei dongki ba kaisei pohe ba keha glepo te nogna mae kherami ghotilo na, ghotilo ginauna mala eni jateula tuana eghu mala keli tagna mana ka ghotilo.

⁴ “Jame kaisei nogna dongki ba kaisei nogna buluka mae kherami ghotilo, pala tahu fara khoko soru ka nabrou na, ghotilo tei toghoni mae kherami na mala pala hagheni buluka igne, mala fakegra hagheni.

⁵ “Gaꞌase na theome mala pipichi nogna pohe nalhaꞌu na, eghuteuna mae nalhaꞌu na theome mala pipichi nogna pohe gaꞌase na. Lord nomi God ghotilo na thono theome magnahagheni kaisei naikno te eni glepo igne.

⁶ “Jame ghotilo filoni gnokugna nanghaji na kligna ka gaju ba pari ka glose te opo nakredi ba ka thugna na, ghotilo thosei falelehe idogna na.

⁷ Ghotilo tangomana te hata thugna na, nu ghotilo lisani idogna na. Jame te eghu ghotilo na, ghotilo ginauna tangomana te au raugha na, eghuteuna ghotilo tangomana te au ka nakarha te keli na.

⁸ “Kate eni ghotilo kaisei vido ke kligna suga mala faghaghafa, ghotilo bara lithui ka thaba mala theome tangomana kaisei naikno te uka te lehe na, naugna jame te lehe naikno na ghotilo ginauna khale ka falehe naikno.

⁹ “Ghotilo thosei joꞌu keha nafnata sisi farihotei ka nomi nagare grep are. Jame te eni ghotilo igne na, gano te kotu nei sisidi gaju grep teu igre ginauna blahi, eghuteuna ghotilo theome tangomana nate hata na.

¹⁰ “Ghotilo thosei loku fodu buluka ghe dongki re mala korho masin mala dokha glose.

¹¹ “Ghotilo thosei pipichi ka pohe teke susuki fodu ka koten ghe khaklagna sipu.

¹² “Ghotilo mala susuki fodu keha gnarho kmoꞌei mala fagegefe ka fati khukrududi nomi pohere.”

Mae ihei teke tolaghila nu ke tirognani khetogna na

¹³ Mae Moses ne cheke eghu, “Jame kaisei mae tolaghi ka kaisei gaꞌase, nu ke leghugna te thuru balugna naꞌa na, mana ke tirognani gaꞌase igne.

¹⁴ Aonu mana cheke fadiꞌani gaꞌase igne, ne cheke eghu, ‘Iara neke tolaghi ka gaꞌase igne, nu kate tei thuru iara balugna na ne laseni nga iara te kaisei mae neke thuruhi balugna naꞌa.’

¹⁵ Jame te eghu na, idogna kmagna gaꞌase igne hata vido pohe te au dadara tagna na naugna repa neke ghiha kani teke thuru fodu repa na. Igne te mala laseni teke theo kaisei mae teke thuru fodu ka gaꞌase igne tifa na. Repa mala hata mei vido pohe igne ka hatimare mae lida rhegna grengathagna namono na.

¹⁶ Kmagna gaꞌase igne mala cheke eghu, ‘Iara neke snakre lao thugu na ka mae igne mala khetogna mana neku, nu mae igne tirognani naꞌa.

¹⁷ Uve, mana neke cheke famamajani naꞌa neke chekeni naꞌa neke thuru balugna kaisei mae ngau teuna. Nu igne pohe teke thuru repa kani teke thuru fodu repa tagna na. Filo si ghotilo! Au dadara tagna. Igne fagaglana gna te theo kaisei mae teke thuru balugna thugu iara tifa na.’

¹⁸ Eghume mae lida gna namono na mala puphuri mae igne.

¹⁹ Mare jaola chekeni mana mala faen kaisei gobi vido silva. Mare ginauna tusu lao sileni igne ka kmagna gaꞌase igne, naugna mae tuana ne famamajani kaisei gaꞌasegna Israel. Gaꞌase igne ginauna khetogna mae tuana fabrahu eghuteuna mana theome tangomana nate koko gaꞌase igne ka nakarhagna na.

²⁰ “Nu jame mae tuana cheke tutuani, eghuteuna mare theo kaisei vido pohe te mala laseni te gaꞌase igne neke theome thuru balugna keha maei tifa na neke tolaghi nga teuna.

²¹ Jame te tutuani na, hatimare mae lida mala hata tei gaꞌase igne ka grengatha gna nogna suga mae kmagna na. Aonu mae nalhaꞌugna namono na fadini naꞌa ka thina ghilei lehe naꞌa. Gaꞌase igne neke jafra kani au teku ka suga gna kmagna na eghuteuna naꞌa ne famamajadi naiknodi Israel. Eghume ka puhi igne, ghotilo koko puhi te diꞌa igne.”

²² Mae Moses ne cheke eghu, “Jame ghotilo filoni kaisei mae tapla jafra ka khetogna keha mae na, ghotilo fadidi repa ka thina mala ghilei lehe repa. Ka puhi igne ghotilo ginauna koko puhi te diꞌa igne agne Israel.

²³ “Jame kaisei mae tei ka kaisei namono eghuteuna mana thafoni kaisei gaꞌase, gaꞌase igne la paruhi eghuteuna mana eni puhi te diꞌa na ka gaꞌase igne.

²⁴ Jame te eghu na, ghotilo hatadi repa tei ke kosi grengathagna nomi namono na mala fadi thinadi mala ghilei lehe repa. Gaꞌase igne mala lehe, naugna kate eni mae igne puhi te diꞌa na ka naꞌa na, naꞌa au nekeu ka nomi namono ghotilo na eghuteuna naꞌa neke theome ehani kaisei naikno mala mei toghoni. Eghuteuna mae tuana nabagna te lehe naugna mana ne goigonini khetogna keha mae na. Eghume te keli na ghotilo koko puhi te diꞌa igne ka ghotilo.

²⁵ “Jame kaisei mae eni puhi te diꞌa na ka kaisei gaꞌase ka vido te theo ihei nga te au namo teu jare na, mae igne nabagna te lehe.

²⁶ Nu ghotilo thosei eni kaisei unha nga ka gaꞌase igne, naugna gaꞌase igne neke theome eni kaisei glepo te diꞌa naba te mala lehe naꞌa na. Puhi igne nogna najafra mae nalhaꞌu gne kolho, jateula nafnata puhi te eni mana te aknu faleheni mae kheragna ia eghu kolho.

²⁷ Naugna mae tuana ne eni puhi te diꞌa na ka gaꞌase igne ka vido te theo kaisei naikno te au namo jare na, eghuteuna neuba gaꞌase igne ne eha, nu theo kaisei naikno te tangomana te nomhini te mei toghoni naꞌa na.

²⁸ “Jame ghotilo filoni kaisei mae te huhuruni kaisei gaꞌase majaghani mala thuru balugna naꞌa, eghuteuna gaꞌase igne theome paru ngau,

²⁹ uve, te eghu na, mae tuana tusu lao glima fulu vido silva ka kmagna gaꞌase igne. Eghuteuna mana tolaghi ka gaꞌase igne eghu, naugna mae tuana neke goigonini naꞌa. Eghuteuna mana theome tangomana teke kokoni gaꞌase igne.

³⁰ “Blahi fara kaisei mae te tolaghi ka teke khetogna ulu lahu mae kmagna na, naugna puhi igne famamajani mae kmagna na.”