Diutronomi 18 - Buka Blahi Ka Cheke Holo

Nodi glepo mae pris

¹ Mae Moses ne cheke eghu, “Mae pris nei keha mae la ngau teu ka vikegna Livae igre ginauna theome khotogna kaisei vido ka glose ka keha vikemi ghotilo maemi Israel. Nu mare ginauna karha ka glepo blahi te hata te mei fafara ka Lord. Glepo blahi igre te nodi mare re.

² Mare ginauna na theome khotogna kaisei vido glose jateula ghotilo kheradi mare igre eghu. Naugna gobigna lepo te magnahaghedi mare re, Lord ginauna tusu ranghidi mare leghuni unha teke nhaꞌa chekeni mana na.

³ “Kate fafara ghotilo buluka ba sipu ba nanigot hata te mei naiknore, ghotilo tufa keha vidogna na ka mae pris. Te nafnata vido igre: fafragna, nei gagama na nei butugna.

⁴ Eghuteuna ghotilo jaola tufa ka mare keha glepoi eghu ka vikegna mae Livae. Glepo ululahu ka gano nei grep nei oel teke hata ghotilo ka nomi nagare are, nei vido ululahu ka khakla sipu teke kuchi ghotilo are.

⁵ Ghotilo eni igne naugna Lord neke vahi fadelei vikegna Livae igne ka keha vike ghotilo are. Tutuani, Lord neke vahi fadeleidi mare ka keha vikere mala loku ranghini mana fabrahu ka vido blahi na.

⁶ “Jame kaisei mae ka vikegna Livae jifla ka namono gna na jare Israel, eghuteuna mana magnahaghei te tei au ka nogna vido blahi Lord na.

⁷ Jame te eni mana igne na, mana tangomana te loku ka vido blahi na ka nanghagna Lord nogna God na, jateula te edi mae kheragna ra eghu.

⁸ Eghuteuna mana tangomana te au thufagna ka gano teke fafara re jateula keha mae pris gre eghu, neuba mana ne hata thotogho ka kheragna re.”

Thosei leghudi puhidi naikno te diꞌadi Kenan

⁹ Mae Moses ne cheke eghu, “Kate tei ghotilo ka glose aheva Lord nomi God teke tusu lao ka ghotilo na, ghotilo thosei leghudi puhidi naikno te diꞌa te au ka vido tuana.

¹⁰ Ghotilo thosei snakreni kaisei naikno mala gahu fafara thugna nalhaꞌu ba thugna gaꞌase na. Ghotilo thosei snakreni kaisei naikno mala fafara mala laseni eigna unha nate thoke mei ke leghu na. Ghotilo thosei snakreni kaisei naikno mala loku ka neilehe ba poesen.

¹¹ Ghotilo thosei snakreni kaisei naikno loku ka khakla gaju ba fadofra naitu ba cheke ka tharungadi naikno tela lehehi ra.

¹² Ihei te edi nafnata glepo igre, thono diꞌa fara ka tathagna Lord na. Uve, naugna igne mana na kulu tei brue fajifladi naikno te au ka glose tuana.

¹³ Ka glepo igre, ghotilo mala thofno keli fara fabrahu ka tathagna Lord nomi God.”

Lordnhaꞌa cheke mala kuruni mei kaisei mae profet ka mare

¹⁴ Mae Moses ne cheke eghu, “Naikno nate brue fajifladi ghotilo ka nodi glose re igre mare tangomana te leghudi nodi cheke mae te falehe naikno ba mae iheire te fafara te mala lasedi unha nate thoke mei. Nu nomi Lord God ghotilo na theome snakre ghami ghotilo te leghuni nafnata puhi te diꞌa igne na.

¹⁵ Mana ginauna kuruni kaisei mae profet jateula iara eghu mala mei ka ghotilo. Mae profet igne kaisei mae kherami ghotilo, eghuteuna ghotilo ginauna mala leghuni mana.

¹⁶ Tifa, ka narane teke au ghotilo ka Thogele Sanai ia, ghotilo neke theome magnahaghei te nomhini naoglagna Lord nomi God ba filoni khaꞌaghi biꞌo na, naugna ghotilo neke mhaghu nomi fara na eghunu lehe nomi neku gaoghathomi na.

¹⁷ “Eghume Lord neke cheke eghu ka iara, ‘Unha te chekeni mare igne tutuani ngala.

¹⁸ Uve, iara ginauna kuru mei kaisei mae profet jateula iagho eghu, eghuteuna mana ginauna kaisei mae kheradi thedi. Iara ginauna cheke lao ka mana nogu chekere, eghuteuna mana ginauna cheke ka naiknore gobigna lepo teke chekedi iara ka mana ra.

¹⁹ Mana ginauna cheke ka nanghagu iara, eghuteuna ihei te theome leghuni mana na, iara ginauna parani mae igne.

²⁰ Nu jame kaisei mae profet cheke ka nanghagu iara unha teke theome chekedi iara ka mana re, ghotilo faleheni mana. Eghuteuna jame kaisei mae profet cheke ka nanghadi keha god delei, ghotilo jaola faleheni mae igne.’

²¹ “Nu jame ghotilo cheke eghu, ‘Faꞌunha eghu laseni ghehati cheke igne neke theome mei funugna ka Lord teuna?’

²² Uve, puhi te mala laseni nafnata glepo igne na eghu agne, jame kaisei mae profet cheke ka nanghagna Lord, nu glepo te chekedi mana igre theome thoke mei tutuani teuna, ghotilo laseni cheke igne theome nogna Lord. Profet igne fiti cheke kolho, eghume ghotilo mala thosei mhaghuni mana.”