Tito 3 - Bíblia

Werotexikolu Tshinanu Hoyakalu Halukanru Himukata Kamhaletatshinwu Piranapni

¹ Puchinikkakanna yine, towutatshine, himukatatshine hiyrun-koxa tsru hitakkalune hyijnakoxyawakna. Rujhaluna ptowru kamrurtshi hepixlewatatshri jmerene rixyawakapna.

² Hiyrun-koxa hi hektutu htshinanwakatanna yine, hi satuknako yineru nwaka. Hi kyahotkaklerunepni, seyni kchinikanurunepni. Kpoyikonerunepa halikak-potu ptowru yineru hetanuya.

³ Klu tshinanu hix-koxa mahchinikanunekananwu mitshikananu. Hektuwaka kamhatshinekananwu, pupjetatshinekananwu. Ptowru hixatshri xye tshiji halukanru hiyrunu poyikowlu womkahjekanata. Hektutu womkahjekanata, wet-sotanrewjekanata. Wahnanuwjekanata. Hixkakluko wahnanutkakjekanata.

⁴ Seyni wane pnute Hoyakalu Wiwekkakjeru potshwanu hiyrun-koxa ruchiniklewle yin-yehi hiphujewniyatka.

⁵ Riwekkakwu hi hixako wkamhaleru kihleru tshinanni seyni rixa hetwamonrewlexyawaka tshinanni. Herokakalunwu herotu matuxikolu tshinanu rerotetwu Hoyakalu Hiwejikaluru himukatle tshinanwu.

⁶ Hi psojikna rimaletlu Hiwejikaluru seyni wale renekpotutwu Hoyakalu, Jesus Cristo Wiwekkakjeru tshinanuya.

⁷ Potukalunwu waleko ruhlenu tshinanu, hiweklu hike rixiniko mnikawnakatupa yoptotatshinepa wixyawakapa wkahwakachale tshinanupa.

⁸ Xye pirana munanhakalurni. Naluklu pkojirexyawakaplu xyekaka pirana ptowru hohneruka. Hoyakalu halixatshine hijhalu hmixkowaxyawakapna hma muchoxyawakanuplu kamrurtshi Hoyakalu halukanru. Xyekaka kamrurtshi kihlerni hiyrunu hijhakalurni yine tshinanupa.

⁹ Seyni hepomsalkaka hipukalnu pasujini. Tsrunni pirana, hihjekaklucha, yahotkaklu Moisés yonreru pirana tshinanu pasujini klu tshinanu xyekaka hike hkochpaka seyni mahijerutatshripni.

¹⁰ Jeji kkotspalahchinikanrewakleru, satu ho hepi kata hiykotkaluru hi riyanko.

¹¹ Klu tshinanu himatanru wan-hixatshri yineru yotkakahchinikanuxikatshriwa, hektuwaka kamhatshrini. Hikolujikatshriwa wale nanuko.

Paulo Hepujyawaklu Tito Tshinkaluru Piranapni

¹² Ártemas tshinkaluru ho Tíquico nyokananwakaxinipyi, Nicópolis tshinikowaka nwaka punhapkatanu hyoptoxyawakapno. Klu tshinanu wanekni katshikleru papko niknokajini.

¹³ Hikolukkaluru hihlewatatshri Zenas tshinkaluru hiyrunu Apolo tshinkaluru panikanu. Pepixanna wkata runyawakna wanna, petpotutanna hike hma mahaxyawakanupna.

¹⁴ Waneyakni Cristo tshinanu wayinetene hijhalu kamhiywaklu kamrurtshi kihleru, yine mahaxinri hikchikatshri, kihleru htserutkajnawa Hoyakalu hetanuya.

¹⁵ Hitaymalune ptowruneka halikyi. Palikanna wamotjene halixlu tshinanu. Hoyakalu hepixle hixaymapa. Seyoka.