Tiago 5 - Bíblia

Phurune Hijrexikolu Piranapni

¹ Xako. Kajnakophi hixa phurunhi! Htshiyahatanu hiyrunu hsaplewatanu hwamonnu tshinanu klu tshinanu hi heppika salewnalu hkayatanu.

² Hpohirewnale himtuwnatka. Himkalu kasapra nikatka.

³ Ouro hiyrunu prata himretachaluru htsalawata. Hiyrunu htsalawle hetamayxakletanunhi hiyrunu hihitu hnikatan-honuka tshitshmero pixka. Pohirewnalu hapatjephutaxnawa, hix-potuko, hipnal-hohne hnapu tshinanumkapa.

⁴ Seyni hixa hkamrurewaxijene, hisanat-kaka kamrurewaxikatshine hi hwenuta seyni hwenuxikolumkapna htshowhuxyana. Hjemanru ruhjekakanna hma wenuxikowakanna tshinanu! Honantshi hamatshine saple hyijnakotatka Tsru Hixikatshriwa Hoyakalu ptowru potuko himukatatshri.

⁵ Hixa phurunhi kihle hiweklu potuko hixa xye tshijneya. Ptowru hixatshri kihleru hetatshinhi. Hixownatshinhi boi-ne hixownakakalune ruylaxikowakapna pixkalunhi.

⁶ Hixa phurunhi hikolukjetlu hiyrunu hiylajetlu hike mixkatuko. Hiyrunu hi hkamnithi.

Mchiretanunephi Piranapni

⁷ Hiyáhoni Cristo tshinanu nmoletanune hi chiretatshinephi Tsru Hixikatshriwa Cristo hapojinri tshinanu seyni kahwakachatatshinephi. Hetanru susanateru. Hkahwakachatlu tshiji hiptshekkajyawaklu honantshi halukkaluru. Hkahwakachatlu hina hapojyawakapa rehinewle haté ramikolu papko hinne.

⁸ Hix-koxa mchiretanunephi. Hmixkotahchinikanuxinwa. Klu tshinanu Wutsrukate Cristo hapokle hi howukatka.

⁹ Cristo tshinanu nmoletanune hi hihjekakanu Hoyakalu mapnokaxyawakanuphi. Jetamayxaklerewakleru hi hohamokpatkalu hix-yehi rapojyawakapa.

¹⁰ Cristo tshinanu nmoletanune hichinikanretanna mitshikawlunni Hoyakalu tokanu hinkakletatshinni rixjekanaxyawakna. Rakotachatluna salewnalkaka kihle hchinikanurune. Wan-hixatshine hyimanu.

¹¹ Salewnalu hakotachatatshine kihle hchinikanurune wkahwakna wan-hixatshine. Hixa jemlu Jó tshinkaluru hakotachale pirana hiyrunu hetlu hsalewnale hali hiknohlexinixka Tsru Hixikatshriwa Hoyakalu hepixpotutatkalu. Hoyakalu honra kchinikanur-potni, jetwamonukleru potni.

Hanjihohneru Himukatatshri Potuko Piranapni

¹² Cristo tshinanu nmoletanune hislahpotuxinwa hi tshinachatatshinephi, hi Hoyakalu hiwaka hkochtshekachatanu. Hi tenhohne hkochtshekanu, hi tshijiko hkochtshekanu, hi kluneru hiwakaymaktako htshinachatanu. Seyni hehe htshininipa, hi pnute pujhanru ptokanu mixkotatshripa. Hike htshininpatka, hike pnute pujhanu hiyrunuko. Wan-hixanu hma mukolujnawakanupwa.

¹³ Satu hixa salewnini, ranjihohnetanu. Satu hixa poyikowaxini, himalwuru hchikaletanu.

¹⁴ Satu hixa hyeyixini, Cristo halixatshine kosekatshine repukanu ranjihohnetanna wale tshinanu. Nhihtshiha hijiw-hoho ruyokanna Tsru Hixikatshriwa Cristo hiwaka tshinanu.

¹⁵ Hanjihohneru Hoyakalu munanhaleru, hitskalakanru yeyixatshri. Tsru Hixikatshriwa Hoyakalu hitskalakanru. Hiyrun-koxa majnakowatatshri rixini ruknokahchinikanyehitko rektunuya.

¹⁶ Hiphujetkajinwa hmayxaklekaka. Wan-hixatshinhi hanjihohneyehikakanu hitskalhinripa. Yineru potuka hchinikanuru hanjihohnere himukatatshri potukni.

¹⁷ Hetanru Elias tshinkaluru. Yinerukananni hixa yinwu pixka. Seyni hi rutuk-hanjihohnereta. Hoyakalu ranjijeta hina hmixyawakanupa hiyáhoni mapa mhale hanikaji mhale pejnu hi rinnewata tshij-hoho ranjire tshinanu.

¹⁸ Waneya ranjihohnetatnaka rinnewatatka. Hiyáhoni tshiji ruptshejyatnaka hitaklukaka.

¹⁹ Cristo tshinanu nmoletanune, satu yineru halikakalutu tokantshi hpupjexini, waneya satu satkajinri,

²⁰ himatanru xye, katukta satkajinri majnakowatatshri halikak-potuko hatnu hapo nwaka hsatokanutnaka, hatnu hapo pupjeyehitatshri riwekle riwekkakanu hiyrunu rektunu hix-potuko hamtakahchinikanyehixyalu.