Tiago 4 - Bíblia

Xye Tshijne Himatlexikolu Piranapni

¹ Hanhe ruchpajya hiylakaklu? Hanhe ruchpajya yahotkaklukaka hixkakluko? Hi he hahxalu hix-mane psojitkaka hwatshri kamnirewatatshrini wale?

² Het-sotanutmaklu seyni hike waneyhi. Hiylalewata, hhahxata seyni hike hwiya. Hyahotkakjeta, hkamnirewjeta seyni hi hwiya. Wan-hixa klu tshinanu hi Hoyakalu hanjijeta.

³ Hanjitmaka seyni hi hyoptotlu hanjire hektutu tshinanu. Hanjijetlu hixako hichinikanu poyikowkakatshripa tshinanu tsonu.

⁴ Hoyakalu hiknokachatatshinhi! Hi he himatlu xye tshijne hajerkaka himatlexini Hoyakalu hkamnita? Hiyáhoni katuktako himatlexiniplu xye tshijne hajerkaka Hoyakalu hkamnita.

⁵ Hix-hetko kahwaklu Hoyakalu tokanu yonatkaluru wla htshinachata: “Hiwejikaluru hix-hitokote hwatshri hahxalewjeta ramotle tshinanwu.”

⁶ Seyni Hoyakalu hepixle repixachaxyawu pot-himukatatshrini. Hiyáhoni wla htshina Hoyakalu: “Hoyakalu satkakanna halixkoxikatshriwa seyni ruhlenu hepixlewatatshri repixikna kpoyikonerune.”

⁷ Hiyáhoni Hoyakalu hyijnakotanu. Hi hitshitanru kamtshi waneya hix-yehi rasujini.

⁸ Hoyakalustsi hapokanu, waneya hixastsi hyanu Hoyakalu. Hixa hektuwaka kamhatshinhi heromyohinwa! Hixachatatshinhi, hepi hchinikanurunhi hpowrathajixinwa!

⁹ Hsaletahchinikanuxinwa, hwamonuwnanu hiyrunu htshiyahatanu. Hitsolhu, tshiyhalupatkani. Hiyrun-koxa hpoyikowle hiknokanu, hino hajirunephi.

¹⁰ Mayohone hixinwa Hoyakalu hetanuya. Wan-hixatshinephi Hoyakalu tserutahchinikanutanu.

Hmapatakajyawakanu Piranapni

¹¹ Cristo tshinanu moletkakatshinhi hi hapatkakanu. Klu tshinanu katukta moltshi Cristo tshinanu hapata ho hjihyehita, yonatkaluru pirana rapata hiyrunu hjihyehitlu yonruru pirana. Hiyáhoni yonruru pirana jihyehitatshri hi yonruru pirana hkamhajeta seyni yonruru pirana jihyehtatshrini.

¹² Satupkalu yonruru kamhatshri, jiykolewakleru. Himukata hiwekkaklerewatatshri hiyrun-koxa himukata hamhakaklerewatatshri. Hiyáhoni katyihe pixa pimwastsireru pjihyehixyawakapa?

Hi Wimatlu Hixako Wipirana Hinatshripa Piranapni

¹³ Xako. Kajnakophi hixa wla tshinatshinhi: “Xawakni ho yetshikawa tujra poktshi wyanu. Pa mhale wane wiknokajini, wane wmaronewaxini, wuchanrewatanu, tiyiro wkayatanu.”

¹⁴ Klu tshinanu hixa hi himatlu yetshikawa hohnepa. Klu tshinanu hanhe rixa wiwejinri? Hi he tshitshipha pixka rixa? Pchini tsonu hiphujewnatshrini waneya ramhachata.

¹⁵ Seyni hix-yinhi haluka wla tshinreta: “Hoyakalu halujiniplu, wiwekanu, ho xye ho wale wkamhanu.”

¹⁶ Seyni xawakni hixa poyikowata halixkowlu tshinanu. Wla hixatshri halixkowlu hektupotu.

¹⁷ Hiyáhoni katuktako kihleru himat-kamhatshri seyni hma kamhaknuklunru waneya wan-hixatshri yineru majnakowamtatshri.