Tiago 3 - Bíblia

Nrutshi Piranapni

¹ Cristo tshinanu nmoletanune hi xako hixophi Cristo pirana hasruklewatatshinhi. Klu tshinanu himatanru hixa hasruklewatatshinwu potu hikolukanuwnanu.

² Hixa ptowrunek-yinwu hixo pirana tshinanu pupjetatshinwu. Satu yineru mmayxakkanumka htokanuya, xye jejimka potukalu, hike mmahaxikatumkapni. Wan-hixatshri yinerumka himane psoluka potukatatshri himukatatshrini.

³ Yomuwatpo yochmaknamatkalune tsonu cavalo-ne yijnakolewata. Himanna psoluka wkoprotaka tshipetapi tsonu tshinanu.

⁴ Hetan-koxlo tsro kanawa kanniphalu haniklero. Tsrokakpotna kanawane hiyrunu tsru kanniphalu hanikjetna. Seyni kanawa potukatapi mtserutu tpotukaxika hanuktako raluka yaleta hanikatshri, wane tya.

⁵ Waneko pixka rixa winama wimane psojiteko. Himka tsruru seyni hi psokananu pirana ralixkoxinwa. Hetanru tshitshmero. Hi psokananu hyoxika mtser-merojijitu.

⁶ Nrutshi tshitshmero pixkalutni. Psol-tshijneko hektutu tsepotkakatshrini winru. Wimane psojitni winru seyni hpitshotlu wimane psoluka. Ptowru potuko wixjexyawaka, xye tshijne hajeru ratawna. Xye hakpahatshri mero hamhikowak-yehi hichpajikatshrini.

⁷ Ptowru hixatshri nikalu hocha hajeru, kamejirune, himnune, mar powha hajerune himukata puratkota hiyrunu puratkalurutkani yineya.

⁸ Seyni hike yineru himukata puratletlu nrutshi. Hektupotlu nrutshi, katseplu kamaklewatatshri.

⁹ Winruyma wimalwutlu Hoyakalu, Wuru honukla. Wanepnawaka winruyma wkamakpiratna yine, Hoyakalu yáholu potuko hiyakoxikalune.

¹⁰ Walerutu namtshi ruchpajya himalwuru hiyrunu kamakalu. Cristo tshinanu nmoletanune wan-hixatshri hi halukkalurni.

¹¹ Rumukathe kihlehalu hiyrunu kapsahalu walerutu hakopha hichpakhaxyawakapa? Hike.

¹² Cristo tshinanu nmoletanune, rumukathe figueira muna azeitona-ji hwaleta? Hike. Rumukathe hahapitsa hwaleta figueira sahi? Hike. Hiyahokni ktuwrehalu hiyrunu kihlehalu hi himukata hichpaklexyalu walerutu hakopha.

Himatkalnutshi Tenhohne Hichpajikatshri Piranapni

¹³ Hanunhe satu hixa tskala hwatshri yineru jimatkaleru? Wan-hixatshri himathetka jimatkaleru rixyawaka, rixjexyawaka tshinanu. Rimatkalnu tshinanu hiyrunu hmayohnu tshinanu kihleru kamhatshripni.

¹⁴ Seyni hahxalu, chinikantshi himtuklewatatshri hiyrunu kamnirewlu hwahajixiniphi hi halixkoxinwa hiyrun-koxa halikakalutu piran-yehi hi hweyatanu.

¹⁵ Xye pixkalutu himatkalnutshi hi tenhohne hichpajikatshrini seyni xye tshijne hajerni, hixako wimane hchinikanu hichpajikatshrini, kamtshi haluklerni wale.

¹⁶ Klu tshinanu hanuktako rukchijika hahxalu hiyrunu kamnirewlu, wane koxlu kaheknanuwlu hiyrun-koxa ptowru hixatshri kamrurtshi hektutu wane hwa.

¹⁷ Seyni himatkalnutshi tenhohne hichpajikatshri waleni mitshikananu powra hchinikan-menu. Waneya walestsi hajeru, kihle hwachluni, mayohnutshi, kihle hepomhakolu, jetwamonukleru, kihle kamrurewleru potu, myokmakahchinikanutkatu, mixachatkatu.

¹⁸ Kamrurtshi Hoyakalu hikchikhihlenreru, kihle hwachalu hwakaklu. Kihle hwachalu homkahitatshine hakanhakaklu.