Tiago 2 - Bíblia

Pixkakaklune Wixkakanna Yine Piranapni

¹ Cristo tshinanu nmoletanune, Wutsrukate Cristo Jesus, ptowru potuko royaknu himwatshri halixikolu tshinanu, hi kakoje wixanna yine.

² Klu tshinanu wla rixini hapatjer-yehi hjihlojinipa satu jeji anel ouro kamhikaluru kwenuru hitakatshri, kihleru mkatshri hitakatshri waneya satu koxa hike mwikatu hiskamkatatshri wane jihlojinipa,

³ Waneya hixa kahwakpirpotuxinri kihleru mkatshri hitakatshri waneya wla htshininiplu — “hewi kihleru tuplawaka ptuplatanutshi” — htshininri seyni wla htshininri hike mwikatu — “hawla pyopkakachatanu” ho “tshiji, hewi nojixistsi ptuplatanu” — htshininri wale,

⁴ waneya wan-hixini hi pixkakaklu hikahwakkakanu seyni kjihyehrewaklerunhi hektutu chinikantshi tshinanni.

⁵ Cristo tshinanu nmoletanune nuchinikanune hislahtokanutanno. Hi he Hoyakalu nurrenni wanna hike mwikane xye tshijne hajeruya seyni halixlu tshinanu phurunni hiyrunu Hoyakalu pohirewaxyawaka yoptotatshinepni wanna, runkaklexyana ramotjene?

⁶ Hike mwikane mkahwakpiratkone hkahwakjeta. Seyni hi he phurunekni saletjethi hixa? Hi he jemahchinikanyehixikowakapji nwaka hanikjene wanna phurunekni?

⁷ Hi he reyikjetluna kahwakpiratkaluru hiwak-potuko hixa kochtshejexikolu hiwaka, wanna phurune? Hehe.

⁸ Hkamhiniplu towutlu Hoyakalu pohirewaxyawaka towre waneya kihleru Hoyakalu halujyawaka homkahjeta. Klu tshinanu Hoyakalu tokanu yonatkaluru wla htshina: “Puchinikanru pimwastsireru pix-nanuko pixka.”

⁹ Seyni pixkakaklu kahwakpirle hmixkanuklunna yine waneya hmajnakowata. Hiyáhoni yonruru hikolukanuwnayehjixhi pupjetatshinhi.

¹⁰ Klu tshinanu katuktako homkahixinri Moisés yonreru ptowruka seyni pa towutlujijipka tsonu tshinanu hpupjexini waneyakni yonruru pirana ptowruka pupjexikatshrini wale.

¹¹ Klu tshinanu wla tshinatshri: “Hi pimopatlewatanu,” wla htshin-koxa: “Hi puylalewatanu.” Hiyáhoni pma mimopatlewatkanuklunu seyni puylalewaxinipa waneyakni yonruru pirana pupjexikatshriyi.

¹² Hiyáhoni hyanumatanu hiyrunu ptowru potuka hkamhanu, heta mayxakletkalunemkaphi yonruru piranaya wane tshinatshri, ruchoxikowakatka yineru.

¹³ Klu tshinanu metwamonrene rapnokatkona metwamonutkonepni. Seyni hetwamonrewlu hitukkaklu hapnokatlewlu.

Halixlu Hiyrun-Koxa Kihleru Kamhalu Piranapni

¹⁴ Nomolene Cristo tshinanu, ha halixlu, hanhe rixa hepixletlu satu yineru ralixle hmunanhamka seyni hi kihle kamrurru? Rumukata hiwekkaklephutatkahe yineru wane pixka hixa halixletatshri?

¹⁵ Wale hohnekananu satu jeji ho sato suxo Cristo tshinanu moltshi mamkatu ho mnikletu rixini.

¹⁶ Seyni satkakhi hixa wla htshininri: “Pyanutka kihle hwachalpatkayi. Mkatshri kpixnuru hitakatshripyi. Jinanupatkayi.” Wane htshinachaxinri seyni hi psojikna himane hepixatshri hma menekkanuklunuplu, hanhe hixa hepixletatkalu wan-hixatshri yineru?

¹⁷ Seyni wla rixa halixlu, kihleru kamhalu mwaknuklunu waneya hipnatshri pixka rixa wan-hixatshri halixlu, klu tshinanu kihleru kamhalu mahata.

¹⁸ Hiyáhoni satu jeji himukata wla tshinreta: “Pixa halixlu hwiya seyni hita rawya kihleru kamhalu.” Waneya hita hihitanru wane tshinatshri. Wla ntshina: “Pekhitanno palixle, kihleru kamhalu mwikatyi seyni hita hekhitanyi nalixle nkamrureymako.”

¹⁹ Palixluhe satupkalutu Hoyakalu? Hikamturu wane pixa halixlexyawaka. Kamtshine koxa halixlu satupka rixyawaka Hoyakalu, seyni hpikle tshinanna rutatakanna wannani.

²⁰ Yineru mahchinikanutu pimatanu halikaka. Halixlumka, kihleru kamhalu mwikatu, hi psojikna hkochpaka.

²¹ Ha, hi he judeu-ne hitsrukatenni Abraão-ni tshinkalurni mitshi rukchikhihlenutka Hoyakalu hkamrure tshinanu, hiwhene Isaque tshinkaluru altar hoho rutajiniklunu mitshi henekachalu rixyawakamkapa Isaque tshinanu?

²² Hi he hetlu hanu rixa hepixkota halixlu Abraão kamhaleru kihleru tshinanu? Kihleru hkamhaleru tshinanu hike mmahaxikatni ralixle.

²³ Hiyáhoni Hoyakalu tokanu yonatkaluru tshinyawaka ruphujeta, wla htshinini: “Abraão halixatkalu Hoyakalu. Hiyáhoni ralixle tshinanu Hoyakalu hikchikhihlenutlu Abraão, hpotukatlu.” Hiyrun-koxa “Hoyakalu himatletleru” htshinka Abraão.

²⁴ Hiyáhoni wimathetlu hanu rixa hpotukaxikowaka yineru Hoyakalu hetanuya, hi halixlu tshinanu tsonu hpotukatka seyni kihleru kamhalu tshinan-koxa hpotukatka yineru.

²⁵ Hetanro kapoklewaklero Raabe tshinkaluro hanu tixa mitshi. Tshiji hetapatshine mitshi tepixa, pa hapoko tkochpajyana. Hoyakalu hikchikhihlenutlo tkamrure kihleru tshinanu.

²⁶ Hiyáhoni yineru mane riwejinri mwaknuklunu hipnatshritkani waneko pixka rixa halixlu. Kihleru kamhalu mwaknuklunu, hipnatshritkani halixlu.