Tiago 1 - Bíblia

¹ Hita Tiago-no, Hoyakalu hiyrunu Tsru Hixikatshriwa Jesus Cristo towrerno. Nalikna Hoyakalunerune doze xkehkaka ptowru tshijne sreta hipalatatshine.

Halixlu Hiyrun-koxa Himatkalnutshi Piranapni

² Cristo tshinanu nmoletanune, himuwatanu ptowru hixatshri yohnirewlu hexini.

³ Klu tshinanu himatanru xye, halixle yahotalexikolu hiknohinipa htserutahchinikanutanhi yahtaletlewlu hakotachaxyawakapa.

⁴ Seyni hi hchiretanu seyni hkahwakachatanru chinikantshi hihletatshri kamrure. Wan-hixatshinephi hike mmahaxikane hixinripa, poyahokakatshinephi. Hike hma mahaxyawakanupa.

Himatkalnutshi Hanjixyawaka Piranapni

⁵ Seyni satkakhi hixa himatkalnutshi hmahaxini, Hoyakalu hanjitanu waneya renekanhi. Klu tshinanu Hoyakalukni kchinikanuru, ptowru yine ranjitjene renekachata ptowruko hiyrunu rukchikhihlenutlu renekachalewaxyawaka.

⁶ Seyni halixluyma hanjitanru. Hi hma menekkonu hkahwakanu. Klu tshinanu hma menekkonu hkahwajini teno plojhawaka mar powha hwatshri pixka hixatshinhi, kanniphalu hanikanune pixkalune ptowru sretako hanikalunni.

⁷ Wan-hixatshri yineru hi kahwakanru pa hixanu renejikolupa Tsru Hixikatshriwa Hoyakaluya.

⁸ Klu tshinanu wan-hixatshri hi poyehihchinikanu, hiyáhoni hi rimatlu hanur-potu romkahitanu.

Hike Mwikatu Hiyrunu Pohirtshi Piranapni

⁹ Hike mwikatu, Cristo tshinanu moltshi, hpoyikowatanu Hoyakalu pohirewnakajyawaklu tshinanu.

¹⁰ Hiyrun-koxa waneko pixka raluk-hixleta phuru, mturu rixkakkoklunupa, hpoyikowatanu. Klu tshinanu phuru hipnanu kaptsheru hwu pixka.

¹¹ Tkatshi nikoxini pixka, ramnu hiprihkaklu kchana waneya kchana hwu hijrukanahonuka, hihwu hihlenu hnikata. Waneko pixka rixa nikawnaleta phuru hkamhanrukaka tshinanu.

Hektuntshi Hichpajyawaka Piranapni

¹² Poyikowatatshrini yineru yohnixikolkaka hetatshri kihleru kamrurtshi hmuchotkanuklunu. Klu tshinanu yohnixikolu hiknohiniplu wan-hixatshri hiwejikaluru hyoptotanu, rumlujikolu sahyi hiwejikaluru hyoptotanu. Hoyakalu honukla hinkaklexyalu wan-hixatshri yineru.

¹³ Satu yineru yohnitkoklunu, hi wla htshinanu: “Hoyakalu yohnitno.” Klu tshinanu Hoyakalu hi hektutu hyohnirewaxya. Hiyrun-koxa hi hyohnitlu yineru.

¹⁴ Seyni ptowru yineru yohnitka, hyokchatkoklunupa waneya rutsekletkoklunupa waleko ret-sotanrewle tshinanu.

¹⁵ Waneya ret-sotanukanatanru rujhiniklunupa rakanhakakanru hektuntshi. Hektuntshi hali hakanhalexinixka hipuktshi hwanutka.

Kihle Kamruru Menu Piranapni

¹⁶ Cristo tshinanu nmoletanune nuchinikanune hi hyokwijexinwa.

¹⁷ Ptowru hixatshri kihleru wyoptoleru hiyrunu ptowru hixatshri hike mmahaxikatu tenhohne ruchpajya. Xye ptowruka Hoyakalu hiyakaxya. Hoyakalu honukla katalune tenhohne hajene hiyakotatshrini. Hi kakojerni Hoyakalu. Rixannuni. Hi psojikna hyokmanya Hoyakalu.

¹⁸ Waleko ralujyawaka tshinanu rawkakwu, htokanu halikakalutu tshinanu, Hoyakalu hiyakoleru ptowru potuko tsru potu wixikowakapa.

Hoyakalu Tokanu Hepixle Piranapni

¹⁹ Cristo tshinanu nmoletanune nuchinikanune, hichinikanretanru xye. Ptowrunek-yine yijnakhapkatatshinephi seyni hi yanumhapkatatshinephi, hi jihekanuwhapkatatshinephi.

²⁰ Klu tshinanu yine jhekanu hi Hoyakalu halujyawaka potukalni rakanhakaka.

²¹ Hiyáhoni hiknokanru ptowru hixatshri hektutu himtuklewatatshri hiyrun-koxa ptowru hixatshri hektuntshi hiknokanu. Seyni hmasaxinwa hyoptoxyawakaplu Hoyakalu tokanu, hix-haji hitakkalurutka. Klu tshinanu wale himukata hiwekkakletanru hixa hiwejinri.

²² Hi hyokwijexinwa. Hi tokantshi yijnakochatatshinephi seyni tokantshi kamhatshinephi halikaka.

²³ Klu tshinanu yineru tokantshi hyijnakochaxini hiyrunu hma kamhaknuklunuplu tokantshi, yineru waleko hmayawle hetatshri hanihapiya pixka hixatshrini wale yineru.

²⁴ Klu tshinanu retpotuxnawa waneya ralimta. Seyni chinpotukawa ramtaklu hanu rixa mayawletatka.

²⁵ Seyni katuktako hislahpotuxiniplu potukalu tokantshi yokanatkaluru mimaletkotu pirana hiyrunu romkahpotuxiniplu tokantshi, xye yineru tokantshi hihnanutatshrini hiyrunu tokantshi kamhatshri koxni wale. Wan-hixatshri yineru hepixko Hoyakaluya hkamrure tshinanu.

²⁶ Satu yineru Hoyakalu halujyawaka homkahitatshri hikahwajinipwa seyni hinru hma mimata potshkewkakkanuklunu waneyakni Hoyakalu halujyawaka romkahle hike hkochpaka. Seyni hyokwijechaxnawa halikaka.

²⁷ Hoyakalu Hirtshi himalwuxikolu rukchikhihlenreru kihleru potukalu waleni murune hepixikolu hiyrunu hipnahnurutatshrone hepixikolu hsalewnalna tshinanu hiyrun-koxa rimrexinwa powra hchinikanuru xye tshijne hajeruya.