Mateus 9 - Bíblia

Jesus Hitskalajyawaklu Jeji Hiktehatshri Piranapni

¹ Waneya Jesus kanawa pokownatka. Hkopruhatatka, hipoktshi hyatka.

² Waneya yine hanikanwakatlu satu jeji hiktehatshri, hijeko hikoluhatshri. Jesus hexinri wanna halixle, wane htshinru hiktehatshri: — Kihle hichinikanupyi. Mturu, pektunu puknojikatka.

³ Hiyáhoni satkaka kasruklewaklerune hinanchitkaluru pirana hasruklewatatshine wan-tshinahchinikanuta: — Hektuwaka htshinanwakatlu Hoyakalu.

⁴ Jesus himathetahchinikanutna waneya wane htshinna: — Klu tshinanhe wan-hixahchinikanuta xyekaka hektutu hichinikanrethajixyawaka?

⁵ Hanupothe kihle tshinko? Wla htshinikowaka hiktehatshri: “Pektunu puknojikatka”, ho wla htshinikowaka: “Pyotunotanu pkochtshekjekotanu pyanutka”?

⁶ Seyni himatjempotuxyawakaplu Jeji Whene tshinkaluru hitakkalurutkani xye tshijiya ruknokhektunuxyawakapna yine” — hiyáhoni Jesus wan-tshinru hiktehatshri: — Pyotunotanu, pkochtshekjekomtanu, pyanutka pipji.

⁷ Waneya hiktehatshri yotunomtatka, hkochtshekjekomtatka hipji nwaka hyatka.

⁸ Hixo yine hetakanatatshine pikatka. Rimalwutluna Hoyakalu klu tshinanu xye pixkalutu towuwlu renejyawakna yine.

Jesus Homkahjixlu Mateus Tshinkaluru Piranapni

⁹ Waneya Jesus pnute hyamxinixka retlu Levi tshinkaluru. Htuplakanata tuplawaka hwenuxikolu hyoptoxyawakapa. Waneya Jesus wan-tshinru: — Pomkahitanno. Waneya Levi palnamtatka, romkahitatkalu Jesus.

Jesus Hektune Himinjiywaka Piranapni

¹⁰ Waneya Jesus Levi-pji nijiniklunu, hixolune jijhawenruklerune, pimrin-koxa hektune Jesus hiyrunu rasrukleneyma tuplakanatatshine nikawakakwa yehi.

¹¹ Waneya fariseu-ne hetlu waneya repomhatkana rasruklene wla htshinna: — Kluneru tshinanhe wannayma hnika, rura wanna jijhawenruklerune, hektuneyma?

¹² Xye hjemini Jesus, wla htshinna: — Pomtalune hi haluklu kpinrewakleru seyni katshinomtalu haluklu.

¹³ Seyni hijha himatletanu hanu haluka tshinreta xye hima Hoyakalu piranaya: “Naluklu hetwamonrewlu. Hi henekachlu hiylatkaluru naluka.” Klu tshinanu hi nuna ntshanixyawakapna kihlerune seyni hektune ntshanixyawaka rehchinikanuxyawakapna.

Hohajirewlu Piranapni

¹⁴ Waneya João Batista hasruklene yanwakatlu Jesus waneya repomhaluna wane htshinruna: — Haklu tshinanhe hixa João hasruklenwu, fariseu-ne hasruklen-koxa hohajirewata seyni pasruklene nika?

¹⁵ Waneya Jesus hihitna, wane htshinna: — Rumukata natshretnahe hnunrowlu hetatshine hnunrowatatshriymalune? Hike. Seyni rapokhohnexinpatka hnunrowpiratatshri hixolune yehi hkochpajikoklunpatka. Waneklu papko halikaka rohajirewatanutkana wanna.

¹⁶ — Hi kihle hipxatkolu mkatshri hitsruka herotu samayma. Klu tshinanu herotu sama himutskirhanunru waneya herotu sama hiskakkakanunru htseruwaswapotutanuna.

¹⁷ Hi kihle tsrutsoleji mapa hitakhatkolo vinho-ha hekamhakolha. Wan-rixkoklunutka vinho-ha hipchekkakanunru sac-kakapni. Tuyokhatanuna vinho-hapni waneya sac-kaka koxapni salewnanuna. Seyni vinho-ha herotu, saco herotu tutakhatka. Waneya hi satukna salewnanu hi vinho-hako hi saco-ko.

Tsru Hitakkaluru Hanjireru Piranapni

¹⁸ Waneya hyanumsakanaxiniwa Jesus, runa satu tsru hitakkaluru hanjihohnewakapji hajeru. Hyoptsojityehitlu Jesus waneya wla htshinru: — Xawakni potuko tupnanatka nchítshoni. Punanu wala hoho putakamyotanu tutskalhiywakapa tiwejyawakapa.

Mpomtato Rutskalajyawaka Jesus Piranapni

¹⁹ Jesus hiyrun-koxa rasruklene waleyma wane hya.

²⁰ Waneya waneklukawa sato suxo doze hwalapu hihrahawatatshro Jesus tjimne sretako tunya waneya tkamrukamkatlu.

²¹ Wala wla tshinnawa: “Nkamrukamkachaxiniplu, nutskalhanutka.”

²² Waneya Jesus heknojtata, retatkalo. Waneya wane htshinatkalo: — Chrima, kihlehchinikanupyi. Palixle hitskalakyi. Waneya waneklukawhapka potuko tutskalhatka.

Jairo Hchitsho Riwekkajyawaka Jesus Piranapni

²³ Waneya Jesus jihlokapjixiniklunru Jairo-pji, retlu sejirtshi, saplewjepotutatshine hiyrun-koxa kowi tokaxikatshine,

²⁴ wane htshinatkana: — Hyanutka. Mturo hi hipna seyni tumkachata. Seyni rutsolhitatluna Jesus.

²⁵ Waneya ptowru yineru maleka hyinixkana, Jesus pantshi jihloka. Waneya Jesus kosemyoxininatkalo mtúroni, tyotunotatka.

²⁶ Wale pirana pohiwatatka wale sreta psoluyaka.

Jesus Hitskalajyawakna Hepi Jejine Mtsawa Piranapni

²⁷ Waneya Jesus wane hichpajinixka, hepi jejine mtsawane wale hatjini hyana waneya wla htshin-sapletna: — Petwamonutanunwu, Davi-ni klopicha!

²⁸ Pantshi hjihlojini Jesus, mtsawane yanwakatlu waneya Jesus hepomhatkana, wla htshinna: — Halixluhe numukata hitskalaklexyawakhi? Waneya ruhitluna: — Hehe walixlu, Tsru Hixikatshriwa.

²⁹ Waneya Jesus kamrukayhaletna, wla htshinna: — Halixyawaka tshinanu, hkamhako.

³⁰ Waneya retatkana. Waneya Jesus hijretpotutna, wla htshinna: — Hike hinkakanu.

³¹ Seyni ruchpakatkana, hkopalpiranatatkaluna wale tshijne psoluka.

Jesus Hitskalajyawaklu Myanumatkatu Piranapni

³² Waneya hyinixkana jejine, satu kkamtshiteru myanumatkatu ranikyehitluna Jesus.

³³ Waneya Jesus hali hiknoklexinixkalu kamtshi, myanumatkatu yanumatatnaka. Waneya hixolune yine wane hajene himyekahchinikanutatka. Wla htshinna: — Hikeklu hohne wane pixkalutu rexika Israel tshijneya.

³⁴ Seyni fariseu-ne wla tshina: — Tsru kamtshi himukatleyma tshinanu hetko maleka ruknokna kamtshine.

Jesus Hetwamonuxyawakna Yine Piranapni

³⁵ Waneya Jesus ptowru poktshikaka hyapa, hanjihohnewakapjikaka rasruklewaxya, kihle piranalu potuko Hoyakalu pohirewaxyawaka pirana runkakletna. Ptowru hixatshri yeyixlu hiyrunu hahijewnalkaka rutskalaka.

³⁶ Waneya hixolune yine rexiniklunu, retwamonutatkana klu tshinanu hkaheknanuwatna, hiknokkalune carneiro-ne ruslahjerna mwikane pixkalunni.

³⁷ Waneya wla htshinatkana rasruklene: — Hamkaluru halikaka hix-potuko. Seyni kamrurewatatshine hi hixo.

³⁸ Hiyáhoni hanjitanru Tsru Hixikatshriwa hamkaluru towutatshri, kamrurewatatshine hyokanaxyawakapa ramyawakapluna.