Mateus 8 - Bíblia

Hijirohitutatshri Rutskalajyawaka Jesus Piranapni

¹ Waneya Jesus himriji serpika, hixolune yine homkahitlu.

² Waneya satu hijirohitutatshri yanwakatlu Jesus. Hyoptsojityehitlu Jesus, tshiji rutspakhojita waneya jeji wan-tshinru Jesus: — Palujiniplu pumukata hitskalakletno.

³ Waneya Jesus homyokanwakatlu. Hkamruklu. Waneya Jesus wan-tshinru: — Hehe, naluka. Putskalakkatka. Waneklukawa potuko rujirhitle ramhiyatka, rutskalhatka.

⁴ Waneya Jesus hijretlu wla htshinru: — Petanu. Hike punkakanu seyni pyanutka. Sacerdote pekhimantapinwa putskalhinrixka. Waneya panikanru henekachalu henekawaka nwaka Moisés yonreru tshinyawaka pixka pimrine himaxyawakaplu putskalhiywakatka.

Jesus Hitskalajyawaklu Soldado Pohire Towreru Piranapni

⁵ Jesus Cafarnaum poktshi hapojiniklunu, satu soldado-ne pohire yanwakatlu, ranjitlu repixyawakaplu.

⁶ Wla htshinru Jesus: — Tsru Hixikatshriwa, ntowreru hiktehatshri hikóluha nopjiya. Hsalewnapotutana.

⁷ Waneya Jesus wan-tshinru: — Wane nyanu, nutskalajyawakaplu.

⁸ Waneya soldado-ne pohire wla tshina: — Tsru Hixikatshriwa, hita hike kochpakatshrino nopji potuko pjihlojyawakapa. Seyni pyanumanwakachatanru, ntowreru hitskalhanu.

⁹ Klu tshinanu hit-koxa k-chefe-tno, towutkalurno. Wanepnawaka soldado-ne ntowuta. Satu wane ntshina —“pyanutka” — hiyáhoni hya. Satutnaka wane ntshinru: — “puna” — hiyáhoni runanwakatno. Ntowreru koxa wane ntshininri: — “xye pkamhanu” — hkamhanru.

¹⁰ Waneya xye pirana hjemini Jesus, rimyeka. Waneya wane htshinatkana hixolune yine romkahikanatjene: — Halikaka wane ntshinhi hi israel-nerune tskalako nexyalu xye pixkalutu halixlu.

¹¹ Wane ntshinhi hixolune yine hinanu, tkatshi hichpajyawaka sreta, rimxijyawaka sreta, ruchpajinna. Nikjexikowak-yehi tenhohne pohirewaxyawaka hwatshri htuplatanna Abraão-ni, Isaque-ni, hiyrunu Jacó-niyma tenhohne pohirewaxyawaka.

¹² Seyni pohirewaxyawaka whenene hiknokkalunenapni maleka sreta hwininapa mapchahawakaya waneya rawanu tsru tshiyahlu haskiyhiru koxa.

¹³ Waneya Jesus wla tshinru soldado-ne pohire: — Pyanutka! Palixle tshinanu panjireru hakanhanu. Waneya waneklukawa potuko rutskalhatka htowreru.

Jesus Hitskalajyawaklo Pedro Himajiro Piranapni

¹⁴ Jesus Pedro-pji jihlojinixka, retlo Pedro himajiro, tukoluhakanata tpatshwapotuta.

¹⁵ Waneya hkachimyotlo tutuk-patshwalemtatka, tyotunomtatka tyinuwaka yomhaletlu.

Pimrinkaka Rutskalajyawaka Jesus Piranapni

¹⁶ Kayi rixinixka rimxijinixka tkatshi hixolune kkamtshiterune ranikanwakatluna. Waneya Jesus kamtshine maleka ruknoka htokanu tsonuyma hiyrunu ptowruneka yeyixatshine rutskalaka.

¹⁷ Wan-rixa hpoyahokajyawakapa ptowruka htshinyawaka Hoyakalu tokanu hinkakletatshri Isaías-ni, mitshikawluru tokanu wla htshina: “Wanepnawaka wahijewaklu ranikkatka, raniklu wwamonnu.”

Satkaka Jesus Homkahpiratatshinemka Piranapni

¹⁸ Waneya Jesus hixolune yine walestsi hajene rexiniklunu, wenu hkopruhajixatkana rasruklene.

¹⁹ Waneya satu kasruklewakleru hinanchitkaluru pirana hasruklewatatshri yanwakatlu Jesus, wla htshina: — Kasruklewakleru, hanuktako pyanu pixa nimotsatanyi hita.

²⁰ Waneya Jesus wla tshinru jeji: — Kaweretshine kapna rawjetna. Kochitshin-koxa tenhohne yapatshine waneyna rawyawakna. Seyni Jeji Whene tshinkaluru tsonu hi jimkawakleru, hi rawya rapnanuwakle.

²¹ Waneya satu jejitnaka wla tshinru Jesus: — Tsru Hixikatshriwa, pitshitanno mitshikananhapkatshi nsatkapamtanu. Nurutshi nkapnamtanu.

²² Seyni Jesus wla tshinru: — Pomkahitanno hita. Petachatanna hipnatshinekakluko kapnakajyawaka.

Jesus Hitukkajyawaklu Tsru Kanniphalu Tsru Powhaya Piranapni

²³ Waneya kanawa hpokowna Jesus, rasruklene homkahitlu.

²⁴ Chinpotukawa tsru kanniphalu yopyoka tsru powhaya. Hiplojha tsepohjetlo kanawa. Seyni Jesus himkakananumta.

²⁵ Waneya rasruklene yanwakatlu Jesus, hkomyekluna wane htshinruna: — Tsru Hixikatshriwa, pepixanunwu. Wupnahetkotanuna!

²⁶ Waneya Jesus wla tshinna: — Klu tshinanhe hpikatka hixa pso halixle jijirunhi? Waneya hyotunota htshihetjetlu kanniphalu. Pokokha rixatka hipowha.

²⁷ Hiyáhoni hi rimat-hichinikanuwatna waleymalune waneya wane htshinna: — Han-hixatshri koxni xye jeji? Haté kanniphalu hipowha koxa yijnakotlu.

Jesus Yokanaxyawakna Kamtshine Kkamtshiterune Ruchpajyawakna Piranapni

²⁸ Waneya Jesus pa sreta wnahlu Gadara tshijne rapojinixka hepi jejine kkamtshiterune hyoptota. Wanna yomletsh-yehi ruchpajyatkana. Hike himukata hiknohlehapota hmatsyinna tshinanu.

²⁹ Waneya wane htshin-saplewletna kkamtshiterune: — Klu pimalukwu, Hoyakalu Whene? Puna psaletkajyawakanapwuhe wapnokaxikolu hohnepa minjeko?

³⁰ Hi howukatkana hixoluru porco, hnikakanatna.

³¹ Waneya kamtshine hipokananu hanjitlu Jesus wane htshinruna: — Porco-ne mane pyokanatanunwu wanna mane wjihlojyawakanapa.

³² Hiyáhoni Jesus wan-tshinna: — Hichpakanutka! Waneya ruchpakamtatkana kamtshine. Porco-ne mane hitokote hjihlokamtatkana. Waneya hixolunni porco-nni hipjita hijrujyanatka. Hipowha rapokanna waneya hipowha rahyejyanna.

³³ Waneya porco-ne hinotatshine hasukamta tsru poktshi rapokna. Runkaklewatna ptowruka kkamtshithixapatshine pirana.

³⁴ Hiyáhoni wane poktshi hajene ptowruneka hinamta retapyawakapluna Jesus. Seyni rexiniklunruna, hipokananu ranjitluna wanna tshijne ruchpajyawakapa.