Mateus 7 - Bíblia

Hma Jihyehixyawakanuplu Satu Yineru Piranapni

¹ — Hi hjihyehirewatanu waneya Hoyakalu koxa hi hikolukanuwnakakanhi hixa.

² Klu tshinanu hanu hix-jihyehirewlexyawakna pimrine waneko pixka rixanhi Hoyakalu. Hiyrun-koxa yahotapi hixa hyahotapre pimrine tshinanu, walako hyahoxika Hoyakaluya.

³ Haklu tshinanhe petlu kapopejiru mtserutu pimole yhale hwatshri seyni piyhale hwatshri kaknalu psolutu hi pimatheta?

⁴ Hanhe pumukata wan-tshinretlu pimole: “Nomole, hitatshi pitshitanu kapopejiru piyhale hwatshri nkochpajyawakapa,” pma mimathetkanuklunru piyhale hwakanatatshri?

⁵ Hixachatatshrini wan-hixatshri! Mitshikananhapka puknokanrutshi kaknalu piyhale hajeru. Waneyapa petpotutanutkalu pkochpajyawakaplu pimole yhale hwatshri kapopejiru.

Kluneruktako Hoyakalunu Wma Menejyawakanupna Kawene Pixkalune Piranapni

⁶ — Kluneruktapni Hoyakalunu hi penekanna kawene pixkalune. Klu tshinanu wane pixini, kawene hiprotakanwakatanyi, rachkaxyawakapyina. Tuwutu kwenuru pérola tshinkaluru hi puknokanu porco-ne pixkalune yehi klu tshinanu wane pixini, porco-ne pixkalune katsrehohochatanru.

Hoyakalu Chinikannu Piranapni

⁷ — Hanjitanro henekko; hijhanu hikchikanu; hitpehiphaptotetanu, hkotpukko hiphapto.

⁸ Klu tshinanu ptowru hanjitatshri yoptotanru. Hiyrun-koxa ptowru hijhatshri hikchikanru. Ptowru yineru hiphapto hitpetatshri hkotpukyehitko hiphapto.

⁹ Hixlahe hirtshinhi, hituru pão ranjixinhi, sotluhe henekanru hituru?

¹⁰ Ho chima ranjixinhi, himnurhe henekanru?

¹¹ Hixa hektutu kkamhaklerunhi himata kihleru henekawheneta hiyáhoni wane yohnik-rixa heneklewleta Hirtshi tenhohne hajeru ranjitjeru.

¹² — Hiyáhoni hanukta paluk-hixletko yine tshinanuya, waneko pixka pixanna wanna ptowru potuko tshinanu. Klu tshinanu walekni Moisés yonreru pirana hiyrun-koxa Hoyakalu tokanu hinkakletatshinni yonatkaluru pirana tshinyawaka potuko.

Mtseruswa Hiphaptotetu Piranapni

¹³ — Pjihlokanru mtseruswa hiphaptotetu. Klu tshinanu tsru hiphaptoteru tsru hapolu hamhikowaka hapni hiyrun-koxa hi heppikna yine tsru hiphaptoteru jihlokatshinena.

¹⁴ Seyni mtseruswa hiphaptotetu hiyrunu kyapre hapolu hiweklu mnikawnakatu haniklewatatshri! Hi hixo yineru hikchiklu.

Hahmuna Hiyrunu Hisahi Hyapkakleta Jesus

¹⁵ — Xako Hoyakalu tokanu hinkakletatshine yahole! Runyehithina carneiro hike mixlewatkatu pixka seyni halikaka hocha hajeru lobo tshinkaluru kmatsyiru pixkalunetkani.

¹⁶ Rimathetkana hkamrurna tshinanu. Kawchipiri chehirahe hjijrujiko uva sahi? Ho kawchipiri chehirahe hjijrujiko figo sahi?

¹⁷ Ptowru hahmuna kihleru, kihle sahiplu hiyrun-koxa hahmuna hektutu, hektu sahiplu.

¹⁸ Hahmuna kihleru hi hektu sahiplu hiyrun-koxa hahmuna hektutu hi kihle sahiplu.

¹⁹ Ptowru hixatshri hahmuna hektu sahiwleru hkayika, tshitshmero ruknokka.

²⁰ Hiyáhoni waneko pixka rixna Hoyakalu tokanu hinkakletatshine yahole, hkamrurna tshinanu rimathetkana.

²¹ — Hi ptowru yineru “Nutsrukate, Nutsrukate” ntshinjene jihlokanru tenhohne pohirewaxyawaka. Seyni tenhohne pohirewaxyawaka jihlokatshri tsonu Nuru tenhohne hajeru halujyawaka kamhatshriko.

²² Hapnokaxikolu hohnepa hixo yine wla htshinanno: “Wutsrukate, Wutsrukate, hi he Hoyakalu tokanu wunkakletatka pixa hiwakaya? Hi he kamtshi wuknokatka pixa hiwaka tshinanu? Hi he hixo hetkalurkaka wkamhatka?”

²³ Hiyáhoni nunkakpotutanna: “Hikeklu hohne nimathethi. Hyachatanutka, hektuwaka kkamhaklerunhi!”

Sotlu Hoho ho Ksatu Hohowak-Panawaxikatshri Piranapni

²⁴ — Hiyáhoni ptowru yineru ntokanu jematshri hiyrunu ntokanu homkahitatshri, satu jeji jimatkaleru sotlumta hoho panawaxikatshri pixkalutni wale.

²⁵ Waneya hinatkani, rapohamxinixka wenu, kanniphalu koxa herutpiratlu. Seyni hi hyawnapjita klu tshinanu sotlu hoho hkamhika pantshi.

²⁶ — Seyni katukta ntokanu hjema seyni hi hkamhalu ntokanu wale satu jeji jipukaleru mchiko wakan-tshiji panawaxikatshri pixkalutni wale.

²⁷ Hinatkani, rapohamta wenu, kanniphalu koxa herutpiratlu pantshi. Waneyakni hyawnamtanatka pantshini. Tsru yawnalu rixana walepjini.”

Jesus Tsru Hitakkaluruyma Rasrukjetna Yine PIranapni

²⁸ Waneya Jesus hali tshinrexinixkalu xyekaka pirana, hixolune yine himyekahchinikanpotutatka rasrukle tshinanu.

²⁹ Klu tshinanu hi rasrukjenna kasruklewaklerune hinanchitkaluru pirana hasruklewatatshine pixka rix-hasrukleta seyni tsru hitakkaluruyma rix-hasrukleta.