Mateus 5 - Bíblia

Jesus Himriji Hinkaklewaxyawaka Piranapni

¹ Waneya hixolune rexiniklunu Jesus, himriji hkanka, htuplatatka. Waneya rasruklene yanwakatlu.

² Waneya Jesus yinuwaka hasruklewleta, wla htshina:

³ — Poyikowatatshinni hike mwikane riwejinri tshinanu, klu tshinanu tenhohne pohirewaxyawaka wannanutkani.

⁴ — Poyikowatatshinni xye hohne wamonuwatatshine Hoyakalu tshinanu poyikotahchinikanutshinepa.

⁵ — Poyikowatatshinni mayohone klu tshinanu Hoyakalu henekanna xye tshijne psoluka.

⁶ — Poyikowatatshinni Hoyakalu halujyawaka hijhapotutatshine natshitatshine hiyrunu honnuhatewatatshine pixka klu tshinanu jinanurune pixkalunepni Hoyakalu tshinanu.

⁷ — Poyikowatatshinni jetwamonuklerune klu tshinanu Hoyakalu hetwamonutanna wanna.

⁸ — Poyikowatatshinni powra hchinikanurune klu tshinanu retanruna Hoyakalu wale yehiya.

⁹ — Poyikowatatshinni jejine himat-hiykokakatshine kihle hwachlu rixkakna klu tshinanu wanna Hoyakalu whenene htshinkona.

¹⁰ — Poyikowatatshinni salewnatshine Hoyakalu halukanru hkamhiywaka tshinanna klu tshinanu tenhohne pohirewaxyawaka wannanutkani.

¹¹ — Poyikowatatshinephi hixa, pimrine hapaxiniklunhi, ho pimrine saletkajiniklunhi ho hma mixyawakanu hweyawyehixiniklunna, nomkahitjene hixyawaka tshinanu.

¹² Waneko pixka rix-salewnaletnina mitshikawa hiwekakanatatshinni Hoyakalu tokanu hinkakletatshinni. Hpoyikowatanu, himuwatan-koxa klu tshinanu himlujikolu tsru potuko hyoptotanu Hoyakalu yehiya.

Tuwu Piranapni

¹³ — Hixa xye tshijne tuwre pixkalunhi. Seyni hma tuwrenuklunutka tuwu, kluneru tuwutkotnaka? Hike kihleyatkalu seyni ruknokachatkatka yine katsrexyawaklu.

Katalu Piranapni

¹⁴ — Hixa xye tshiji katale pixkalunhi. Poktshi teno mriji hwatshri hi himukata yohimletka. Waneko pixka hix-hixa katalu pixkalunhi, hixa hi himukata yohimameroletka.

¹⁵ Hiyrun-koxa hikeklu yineru lamparina nikotatshri hachhaji hpuko hitakanro. Seyni halikaka lamparina hitajikowaka tutakka, ptowru yineru walepji hajene hapkathojixyawakapa tnikotle tshinanu.

¹⁶ Waneko pixka hixanu hixa, hiwejinri katalu pixka rixanu ptowru yineru yehiya rexyawakapluna hixa hkamrure kihleru, rimalwuxyawakapluna Hiru tenhohne hajeru.

Jesus Poyahokajyawaklu Moisés Hiykole Yonatkaluru Piranapni

¹⁷ — Hi hkahwakanru nuna xye tshijne Moisés yonreru pirana ho Hoyakalu tokanu hinkakletatshinni yonreru pirana nnikaxyawakapa seyni nuna npoyahokajyawakapna.

¹⁸ Halikaka ntshina, haté tenhohne hiyrun-koxa xye tshiji nikawninri hohne, hi pa yonhajiji — hi pa yonapi yonhajiji nikawnanu yonruru piranaya hma makanhiywakanupa ptowru potuko.

¹⁹ Hiyáhoni katukta majnakowaxinri satu hiykolejijipka, hiyrunu rasrujinri satu waneko pixka rix-majnakowlexini, wale jeji mujhapotkotu htshinko tenhohne pohirewaxyawakaya. Seyni katukta kamhajetlu hiyrunu rasrukjetlu xye hiykolukaka wale jeji hijhakalur-potu hkahwakka tenhohne pohirewaxyawakaya.

²⁰ Klu tshinanu wane ntshinhi, fariseu-ne hiyrunu kasruklewaklerune hinanchitkaluru pirana hasruklewatatshine kamrure yohnik-potuknurutu hma kamhaknuklunu tenhohne pohirewaxyawaka hi himukata jihlokleta.

Hahnanuwlu Piranapni

²¹ — Hixa jemlu mitshikawluru pirana wan-tshinatshri: “Hi puylalewatanu.” Hiyrun-koxa “hiylalewatatshri hikolukanuwnayehitko.”

²² Seyni hita wan-tshinhi katukta hahnanutlu himole hike mixkatuko rukolukanuwnanu Hoyakaluya. Hiyrun-koxa katukta heyiklu himole (wla htshininri himole: “Hike mkochpakkatyi”), jemahchinikankakjexikowaka ranikkotka. Hiyrunu katukta wla htshininri: “Mahchinikanutyi” salewaktshi nwaka rumukata yokanatkota.

²³ Hiyáhoni penekachle panijinri papko, puchinijinri satu pimole pa hixanu hektuwaka htshinanwakaxinyi,

²⁴ penekachle henekachalu yoxijikowaka hinaple putakachatanrutshi waneya mitshikananhapka pyanwakatanru pimole, pimatletapanutkalu. Wane pnute psatkapanu yoxijikowaka yehi, penekachle penekanru Hoyakalu.

²⁵ — Satu yineru jihyehixinipyi waneya jemahchinikanjexikowak-yehi hyamtkako pchini puhlehapkamtanru wale pirana, heta mayxaklerewatatshri hetanu hma manikkanuklunupyi waneya heta mayxaklerewatatshri kapna yochmaklewjetatshri hma menejyawakanupyi, kapna hitaklewjetatshri kapna mutajyawakanupyi.

²⁶ Halikaka ntshinyi, kapna putakkoklunupa hi puchpakanu tiyiro ralujyawaka pso pma menekkanuko pchinika.

Himopatlewlu Pirana

²⁷ — Hixa jematkalu mitshikawluru pirana wan-tshinatshri: “Hi pimopatlewatanu.”

²⁸ Seyni hita wan-tshinhi: katukta sato suxo hexini waneya ret-tsotanuxinro, rimopatlewatatka hihchinikanuya.

²⁹ Piyhale tshinanu pumtuwnini, poplikanru, puknokanru. Klu tshinanu pimane psojite pamtajini pot-kihleyi psol-maneko tshitshmero yehi hma muknojyawakanupa.

³⁰ Hiyrun-koxa pimyo tshinanu pumtuwnini, pkastakanru, puknokanru. Klu tshinanu kihle potlu pimane psojite pamtajini, psol-maneko tshitshmero yehi hma muknojikowakanupa.

³¹ — Hixa himatlu Hoyakalu tokanu wan-tshinatshri: “Katukta hichohnunroxini, renekanro papel-mta ruchohnunroxyawaka piran-yehi.”

³² Seyni hita wan-tshina: Katukta hichohnunrota, hapoklewlu tshinanu minje, rimopatkaklo hhanunro. Hiyrun-koxa katukta hhanunrotlo hichotkaluro rimopatlewata.

Hinkaklexyalu Pirana

³³ — Hiyrunukotnaka hixa himatlu Hoyakalu wan-tshinna wutsrukatenni, wla htshinna: “Hi pkachrijetanru ptshinyawakatka seyni halikaka pkamhanru ptshinyawakatkalu Tsru Hixikatshriwa Hoyakalu.”

³⁴ Seyni hita wan-tshinhi: Hike hiwakako hmunanhanu. Hi tenhohne hiwakako hmunanhanu klu tshinanu tenhohne honra Hoyakalu tuplaxyawakni.

³⁵ Hi tshiji hiwakako hmunanhanu klu tshinanu tshiji honra Hoyakalu hitspakajixiwakleni. Hi Jerusalém poktshi hiwakako hmunanhanu klu tshinanu tsru phuru potuko Hoyakalu poktshitekni wale.

³⁶ Hi hixako hijiwu tshinanu halixkowata klu tshinanu hixa hi himukata klatalu hixkakletlu pa jiwutsakna, ho hsajiwkaklu.

³⁷ Seyni hehe ho hike htshinini, hi satu pa hixanu hyokajinri. Klu tshinanu pa hixanu hyokajinri kamtshi runya.

Hi Hahnanutanna Hmukchikhihlenutjene Piranapni

³⁸ — Hixa jematkalu mitshikawluru pirana wla tshinatshri: “Yhaltshi, yhaltshikakluko. Yhitshi, yhitshikakluko.”

³⁹ Seyni wla ntshinhi hixa: Hi hapnutanru hkamnitjeru. Satu yineru himpakhojixinipyi, pa sreta hoji koxa pumpakjixachatanu.

⁴⁰ Hiyrun-koxa satu haluk-haniklexinipyi hetamayxaklerewatatshri yehi p-capa-te hkonyawakapa pimkal-koxa hi ptshipexinri.

⁴¹ Ho satu soldado romano-neru hwunru hitjijixinipyi satu quilômetro pchini, hiyrunu satu quilômetro putjitanru.

⁴² Satu yineru pa hixanu hanjixinyi, penekanru. Hiyrun-koxa katukta pa hixanu haluk-haniklechaxyayi, penekanru.

Hkamnitjene Hamoxyawaka Piranapni

⁴³ — Hixa jematkalu mitshikawluru pirana wla tshinatshri: “Puchinikanru pimwastsireru hiyrun-koxa pahnanutanru pkamnitjeru.”

⁴⁴ Seyni hita wan-tshinyi: Hichinikanna hkamnitjene. Hanjihohneyehitanna hsaletjene.

⁴⁵ Pimrine himaxyawaka tenhohne hajeru hiru Hoyakalu whenenetkahi. Klu tshinanu Hoyakalu hichpakaklu htkatshne muhlene tshinanu, kihlerune tshinan-koxa. Hiyrun-koxa hyokanatlu hina poyahokakatshine yehi, mpoyahokkakane yehi koxa.

⁴⁶ Ha puchinikjene tsonu pamoxinipa, kluneru pkahwaka yoptolexnawa Hoyakalu yehiya? Hi he waneko pixka rixjetna jijhawenruklerune?

⁴⁷ Ha himolepka halijinipa, hike hkamha pimrine pnute. Hi he moyakaluten-koxa wan-rixjetna?

⁴⁸ Hiyáhoni potukalunephi, hixa hiru tenhohne hajeru pixka.