Mateus 4 - Bíblia

Jesus Yohnixikolu Piranapni

¹ Waneyakni Hoyakalu Hiwejikaluru haniklu Jesus kahnete poktshiri tsru kamtshi Satanás yahotalexyawakaplu Jesus.

² Waneya riknohinixka quarenta hohne, quarenta yetshno hi hnikawa Jesus, hnatshita.

³ Waneya tsru kamtshi Satanás Jesus-stsi hapoka wane htshinru: — Hoyakalu whene pixinipakni, ptowutanru xye sotlukaka pão rixinwa.

⁴ Seyni Jesus hihitlu: — Klu tshinanu Hoyakalu tokanu potukalu yonatkaluru wan-tshina: “Yine hi pão mixkonu tsonu hiwejya seyni wale ptowruka htshintokanuxyawaka Hoyakalu riwejya yineru.”

⁵ Waneya wane pnutetka tsru kamtshi Satanás haniklu Jesus haté Jerusalém poktshi, Hoyakalu nurreru poktshi waneya Jesus Hoyakalupji tenonwaka rutaklu tsru kamtshi Satanás.

⁶ Waneya tsru kamtshi Satanás wan-tshina: — Hoyakalu whene pixinipakni hewi puknojinwa teno wakaya klu tshinanu Hoyakalu tokanu potukalu yonatkaluru wan-tshina: “Hoyakalu towutanna htowrene hiwejikalune tenhohne hajene hinoxyawakapyi. Himyoymana ruchatkapanyina, pma mutshlixyawakanupa sotlu pijixiya.”

⁷ Seyni Jesus wan-tshinru: — Seyni Hoyakalu tokanu yonatkaluru koxa wan-tshina: “Hi pyahtaletanru Tsru Hixikatshriwa Hoyakalu Poyakalute.”

⁸ Waneya tsru kamtshi Satanás haniklu Jesus satu mriji tenolu hyiywakapa, rekhitlu Jesus ptowru tshijnekaka pohirewaxyawaka hiyrun-koxa ruhlenkaka.

⁹ Waneya tsru kamtshi Satanás wan-tshina: — Xyekaka ptowruko nenekanyi pyoptsojityehixinipno, pimalwuxinipno.

¹⁰ Waneya Jesus wan-tshinru: — Pyanutka Satanás! Wane htshina hinkakleta Hoyakalu tokanu potukalu yonatkaluru: “Tsru Hixikatshriwa Hoyakalu Poyakalute tsonu pimalwutanu hiyrun-koxa wale tsonu pomkahitanu.”

¹¹ Hiyáhoni tsru kamtshi Satanás hichomtlu Jesus waneya hiwejikalune Hoyakalu towrerune tenhohne hajene hapokyehitlu Jesus. Rinotatkaluna Jesus.

Jesus Yinuwaka Kamrurewlexyawaka Piranapni

¹² Waneya Jesus jempiranyehixinri preso-tkalu João, Galileia tshijne hsatkapa.

¹³ Waneya Nazaré poktshi ruchpajinixka Jesus, Cafarnaum poktshi hya waneya wane rawatka. Cafarnaum poktshi hipowhastsi rawa, Zebulom hiyrunu Naftali tshijnestsi rawa.

¹⁴ Hpoyahokajyawakapa Hoyakalu tokanu hinkakletatshri Isaías-ni tokanu htshinyawaka mitshi wla tshinatshri:

¹⁵ “Zebulom hiyrun-koxa Naftali tshinikowaka tshijne hajene, Jordão wenne mar powha nwaka sreta hajenhi, judeu mixkane Galileia tshinikowaka tshijne hajenhi,

¹⁶ mapchahawaka hwatshine tsru katalu hetatshinhi; mapchahawaka hwatshine hipuktshi yehi pixkalutu hwatshinhi Hoyakalu hiwekkakle nikotyehitatkahi hohi himrekle pixka.”

¹⁷ Waneya wane pnute Jesus yinuwaka hinkaklewleta, wla htshinamta: — Hehchinikanutanu hektunu tshinanu klu tshinanu hi howukatkalu tenhohne pohirewaxyawaka!

Jesus Nuretna Satkaka Rikamrurewatjenepa Piranapni

¹⁸ Waneya Galileia powha wnaha hyapamxini Jesus, retlu Simão tshinkaluru repuruyma André. Ruknokamtatkaluna h-tarrafa-tna hipowhaya klu tshinanu wanna mariskatatshine kchimahaklerune.

¹⁹ Waneya wane htshinna Jesus: — Hinanu hwahatjinitanno, yine kmariskahohoklerune nixkakanhi.

²⁰ Waneya waneklukawa potuko ruknokamtatkaluna h-tarrafa-tna, romkahitatkaluna.

²¹ Wane pnutejiji hyapamtatnaka, retlu Tiago tshinkaluru, Zebedeu whene repuruyma João. Wanna koxa kanawa hwakanata rurnayma, ripxatluna tarraf-kaka. Waneya Jesus tomhana.

²² Waneya waneklukawa potuko ruknokamtluna rurna Zebedeu kanawaya, romkahitatkaluna Jesus.

Jesus Hinkaklewjeta Hiyrun-koxa Rutskalaklewjexyawaka Piranapni

²³ Waneya Jesus Galileia tshijne psoluka hyapamta, rasruklewjeta hanjihohnewakapjikakaya, kihle piranalu potuko Hoyakalu pohirewaxyawaka pirana runkaklewjeta. Yeyixatshine hiyrun-koxa hahijewnalkaka rutskalaka.

²⁴ Jesus pirana Síria tshijne psoluka rupalpiranyehita. Ranikanwakatluna ptowru hixatshri yeyixatshri, satkaka tsru tshino jematshri, kkamtshiterukaka, satkaka hipukalewatatshine, hiyrun-koxa satkaka hiktehatshri waneya Jesus hitskalakna.

²⁵ Hixolune yine homkahitatkalu Jesus, Galileia tshijne hichpajikatshine, Dez Cidades hajene, Jerusalém poktshi hajene, Judeia hajene hiyrun-koxa Jordão wenne pa sreta wnahlu hajene homkahitlu.