Mateus 3 - Bíblia

João Batista Hinkaklewaxyawaka Piranapni

¹ Waneklu papko João Batista hapoka, runkaklewakanata kahnete poktshiya, Judeia tshijneya.

² Wane htshinamta: — Hehchinikanutanu hektunu tshinanu klu tshinanu hi howukatkalu tenhohne pohirewaxyawaka!

³ Hoyakalu tokanu hinkakletatshri, Isaías tshinkalurni yonatlu João pirana, wla htshina: “Kahnete poktshiri saplewaxikatshri tokanu: Halpokotanru Tsru Hixikatshriwa hatnu hapote. Hpotukatanru hatnu hapotkaka. Wale tshinanu hpotukatanru hatnu hapkaka.”

⁴ João mkalu camelo pixi kamhikolni, kpixnuru h-cinturão-te couro-mta kamhikolu. Hnijitu tsetseru, wrolha hocha hajeru.

⁵ Jerusalém hajene, Judeia tshijne hajene, hiyrun-koxa ptowruneka Jordão wennestsi hwatshinetka yanwakatlu, hyijnak-tokanuxyawakluna João Batista.

⁶ Waneya ruphujetluna rektunna. Waneya João batiza-tna yine Jordão wenneya.

⁷ Rexinixka João híxona fariseu-ne, saduceu-ne koxa hinanwakamtlu batiza-xikowak-yehi, waneya wane htshina: — Hixa himnu pixka hixatshinhi, katshinolunhi! Kathe hinkakhi hiwejyawaka Hoyakalu hapnokatle hinatshripa?

⁸ Hkamhanru xako kihleru himaxikowakapa hehchinikanutatka.

⁹ Seyni hi hkahwakanu hixa himukata hihlerexnawa wane htshinamxyawaka: “Abraão-kni wutsrukate”; klu tshinanu nunkakhi Hoyakalu himukata haté xyekaka sotlu kamhalexyalu Abraão klopichane.

¹⁰ Heptshi honra halpokotka hahmunkaka hkastajikowakapa haté hitskihi. Klu tshinanu ptowru hahmuna hektu sahiwleru, kaykako, tshitshmero ruknokko.

João Hiphujetlu Cristo Piranapni

¹¹ Hita batiza-jethi honhaya himaxikowaka hixa hehchinikanutatka, seyni wale, hapkatatatshri batiza-tanhi Hoyakalu Hiwejikaluruya, tshitshmeroya koxa. Wale hinatshripa hita pnute himukatatshrini. Hikenno hita h-sandalha-te nanijyawaka.

¹² Ruplokapre ralpokota ruplojyawaklu hitataji hkotspalaxyawakapa hipata. Hitataji himrexikowaka hruko rimretakjixinri seyni hipatapni yoxikkona tshitshmeroya hikeklu hohne mnikawnakatupa.

Jesus Batiza-xikowaka Piranapni

¹³ Waneya Jesus Galileia tshijne runya Jordão wenne rapoka João batiza-xyawakaplu.

¹⁴ Seyni João wan-tshinru: — Hita haluklu n-batiza-xikowaka pixaya seyni pixlahe hinanwakatno n-batiza-xyawakapyi pixa?

¹⁵ Waneya Jesus hihita. Wane htshinru: — Petachatanutshi pchini hohnejiji, hpoyaho hakanhalexyawaka ptowruka Hoyakalu halukanru. Waneya João koxa hikchikhihlenutlu wan-rixyawaka.

¹⁶ Waneya hajeyri h-batiza-tkawa Jesus, honha ruchpajyatka waneklukawa tenhohne kotpukka. Waneya Jesus hetlu Hoyakalu Hiwejikaluru motkokoji pixka rixmanemta, rujrukamta, wale hohwaka rapoka.

¹⁷ Waneya satu tokantshi tenhohne hichpajya, wan-tshinatshri: — Xyekni Noturu namotleru. Wale poyikowkakno.