Mateus 27 - Bíblia

Pilatos Renejyawakapluna Jesus Piranapni

¹ Yetshpotukawa tsru hixikatshinwa sacerdote-ne hiyrun-koxa tsrukakalune judeu-ne ptowruneka hikchikahchinikanuta Jesus ruylaxyawakapna.

² Rostutluna Jesus, waneya ranikluna Phuru Pilatos renejyawakapluna.

Judas-ni Hiylaxnawakwa Piranapni

³ Waneya Judas, Jesus hiphujtatjeru, rexinixkalu rukolukanuwninritka Jesus, rehchinikanutatka hkamrure tsru hektutu tshinanu. Waneya trinta proji prata hsatkakatka tsru hixikatshinwa sacerdote-ne hiyrun-koxa judeu-ne tsrukakalune tiyirote.

⁴ Waneya wla htshina Judas: — Hektuwaka kamhatshrino hita! Klu tshinanu hike mixkatuko nenekna hkamnitjene. Seyni wanna wan-tshinru: — Seyni hike wix-hixa. Waleni pixako ptshinanni.

⁵ Hiyáhoni Judas hiknokatkalo proji tiyiro Hoyakalupjiya waneya ruchpakatka. Wane pnute rostuplaxnanwa.

⁶ Waneya tsru hixikatshinwa sacerdote-ne hapatjetlo tiyiro projkaka. Waneya wla htshinna: — Hinanchitkalurni Hoyakalupji tutajikowaka tiyiro proji klu tshinanu jeji hraha wenrutkani.

⁷ Hiyáhoni rukchikahchinikanutna ranjixyawakapluna Kajpako Kamni tshinkaluru tshijne. Walekni pnu tshijne hichpajikatshri kapnaxikowaka.

⁸ Wale tshinanu haté xawakni “Jratshijneru” htshinikowakatka wale tshiji.

⁹ Hiyáhoni wan-rixatka hpoyahokajyawakaplu Hoyakalu tokanu hinkakletatshrini Jeremias tshinkalurni tshinyawaka, wla htshina mitshi: “Rawlona trinta proji tiyiro prata kamhikaluru rutakwenruxikolu wenru, pimrine israel-nerune klopichane hitakwenrutanru,

¹⁰ ranjixyawakapluna Kajpako Kamni tshijne, Tsru Hixikatshriwa tshinyawakno.”

Pilatos Yehi Ranijyawakluna Jesus Piranapni

¹¹ Waneya Jesus tsru hixikatshriwa Pilatos tshinkaluru hetanu hyopkaka waneya Pilatos hepomhalu: — Pixlahe judeu-nerune pohiryi? Jesus hihitlu, wla htshinru: — Pixako wan-tshina.

¹² Waneya tsru hixikatshinwa sacerdote-ne hiyrun-koxa tsrukakalune judeu-ne jihyehixinixkalu Jesus, hike htshina.

¹³ Waneya phuru Pilatos hepomhalu: — Hi he pjemlu hjihyehixyayina?

¹⁴ Seyni Jesus hike tshina, hi satukna hjihyehixikolu ruhita. Waneya phuru himyekahchinikanuta wan-rixyawaka tshinanu.

¹⁵ Tsru niklu hohne tshinanu phuru Pilatos hasruhlu satu preso hajeru hichoxyawaka, yine nurrer-potuko.

¹⁶ Waneklu papko satu jeji ptowru yineru himatyehreru Barrabás tshinkaluru preso hwa.

¹⁷ Hiyáhoni hixolune hapatjexinixka, repomhana: — Hanurhe nuchoxinhi ho Barrabás tshinkaluru ho Jesus, Cristo tshinkaluru?

¹⁸ Klu tshinanu Pilatos himathetna judeu-nerune tsrukakalune hhahxalna tshinanu, Jesus renekluna.

¹⁹ Waneya phuru Pilatos jihyehixikowaka htuplakanaxiniwa, wale hnunro yonawahlo yokananwakatlu, wla tshinatshri: — Petachatanru xye jeji hike mixkatu klu tshinanu xye yetshno nsalewnapotuta nupnawleya wale tshinanu.

²⁰ Seyni tsru hixikatshinwa sacerdote-ne hiyrun-koxa tsrukakalune judeu-ne hanjijixpotutlu hixolune hanjixyawakaplu Pilatos ruchoxyawakaplu Barrabás tshinkaluru hiyrun-koxa Jesus ruylajixyawakapa.

²¹ Waneya Pilatos hepomhana: — Hanurhe nyi hepi jejine nuchoxinhi? Waneya ruhitluna: — Barrabás.

²² Waneya repomhatnakna: — Kluhe nkamhinri Jesus, Cristo tshinkaluru? Wanna ptowruneka hihitlu: — Cruz putakanru!

²³ Seyni repomhatnakna: — Haklu tshinanni? Klu hektuntshihe hkamha? Seyni pnut-potu hsaplewatna, wla htshinna: — Cruz putakanru!

²⁴ Waneya phuru Pilatos hexinri pnute hi rumukatatka hiyrun-koxa tsru sejirtshi hyinuwakpiratna, honha ranikakjixatka waneya reromyohatka hixolune hetanu. Waneya wla htshina: — Xye jeji hiylaxikowakapa hi hitako ntshinanu seyni hixako htshinanupni.

²⁵ Waneya ptowru yineru hihitlu, wla htshinruna: — Wale hraha hixa wtshinanupni hiyrunu wiklopichanepa tshinanupni.

²⁶ Waneya phuru Pilatos henekna Barrabás tshinkaluru. Seyni Jesus hkotshipjejixa, waneya renekna cruz rutajyawakapluna.

Soldado-ne Heyijyawaklu Jesus Piranapni

²⁷ Waneya soldado-ne haniklu Jesus phurupji waneya soldado-ne ptowruneka Jesus-stsi hapatjexya.

²⁸ Hkomkahatkaluna waneya mkatshri serolu hmakatluna Jesus.

²⁹ Waneya kawchiriplu hsaxpatna sahyi hkamhiywakapna, Jesus jiwu rutajyawakapluna. Waneya Jesus potuklemyo rutakluna hahaje, hyoptsojityehitluna, reyikatkaluna, wla htshinruna: — Hali judeu-ne Tsru Hixikatshriwate!

³⁰ Waneya rutskahjetluna, hahaje hkochtshekna, rutpejiwutluna.

³¹ Rali heyiklexinixkaluna, mkatshri serolu hkomkahatkaluna waneya waleko himkalu rutakleru hmakatatnakluna. Waneya ranikluna cruz rutajyawakapluna ruylaxikowakapa.

Simão Tshinkaluru Hanijyawaklu Jesus Cruz-te Piranapni

³² Waneya ranikakanaxinixkaluna Jesus hatnu hapoya, satu jeji hyoptotna Simão tshinkaluru Cirene poktshi hajeru. Waneya cruz rutjikakluna.

Cruz Rutajikowakapa Jesus Piranapni

³³ Waneya rapokluna Calvário tshinikowaka. (Wale tokantshi yokakkaluru, yineru jiwuta pixkalutu yehi.)

³⁴ Wane vinho-ha kapsalu yapjetkaluru ruxyaluna Jesus seyni retumhiniklunru hi hyoptotatkalu.

³⁵ Waneya rali cruz hitaklexinixkaluna, hiknokkaluru ruknokna soldado-ne rimaxyawakapna katu kayatanru Jesus-ni mkalu.

³⁶ Waneya htuplatna, ruslahyawakapluna.

³⁷ Waneya Jesus jiwu hohwaka raw-yonhata Jesus jihyehixikolu pirana. Wla htshin-yonhata: “Xyeni Jesus judeu-ne pohire.”

³⁸ Hiyrun-koxa katshowhurune hepi wan-rutakna. Satu Jesus potukle sreta rutakka. Satu pa sta sreta hitakka.

³⁹ Hiknohatshin-koxa hektutu tshinanwakatlu, ruwnownojiwyehitluna.

⁴⁰ Waneya wla htshinruna: — Pix-hima kopalatanru Hoyakalupji waneya map-hohne ppanawatanutnaka hiyáhoni piwekkajinwa! Halikaka Hoyakalu Whene pixinipakni, cruz pkochpajinwa!

⁴¹ Waneko pixka rixa heyikletluna tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine hiyrun-koxa tsrukakalune judeu-ne waneko pixka rixa heyikletluna.

⁴² Wla htshinruna: — Pimrine riwekkaka seyni wale nanuko hi rumukata hiwekkaklexnawa! Hi he judeu pohirni wale? Cruz hkochpajiniklunupwa tsonu walixanru.

⁴³ Hi he Hoyakalu munanhalerni? Hi he Hoyakalu Whene tshinikatshriwani? Hiyáhoni wetanru ho Hoyakalu haluk-hepixletanru.

⁴⁴ Jesus-yma cruz hitakkalune waneko pixka rixa heyikletkoxluna, hixo hektutu htshinanwakatluna.

Jesus Hipninri Piranapni

⁴⁵ Waneya hanikaj-hohnetkani rutshpokatka, três hora pchinika psol-tshijneka hitshpoka.

⁴⁶ Waneya mapa hora-stsitkani Jesus wla tshin-saplewleta: — “Eloi, Eloi, lamá sabactâni?” Wale tokantshi yokakkaluru: “Noyakalute, Noyakalute, haklu pumuknokanno?”

⁴⁷ Waneya satkaka wane hwakanatatshine xye jeminixka, wanna wla tshina: — Elias-ni htomha.

⁴⁸ Waneklukawa satu jeji hasukamta kamkolu ruhajyawakapa. Vinagre-ha rutaka, hahajestsipto rutaklu, Jesus rurjixlu.

⁴⁹ Waneya pimrine wla tshinru: — Petachatanru. Weteru ho Elias tshinkaluru hepixanru ho hike.

⁵⁰ Waneya Jesus hipokananu saplewatatka, rupnanatka.

⁵¹ Waneklukawa mkatshri sama Hoyakalupji hwatshrini hiskakana hepi tshraj-samanru, teno haté tshiji ruskajyanatka. Tshiji hiyolikatka, sotlukaka hipokanatka.

⁵² Waneya yomletshikaka kotpukkatka, hixo yinni potukalunni hipnakanatatshinni hiwekkakkatka.

⁵³ Yomletshikaka ruchpajyatkana waneya Jesus hiwejinritnaka hohne pnute, Jerusalém poktshi hyamtna, hixolune yehi ruphujewniyna.

⁵⁴ Waneya romano-neru soldado-ne pohire hiyrun-koxa Jesus hislahatshine waleymalune tshiji hiyolikle hiyrunu ptowru hiknohatshri rexinixkaluna, rimyekahchinikanutna, waneya wla htshinna: — Halikakni xye jeji honnira Hoyakalu whene.

⁵⁵ Wane koxna hixo suxone Jesus homkahitjene Galileia rumuchpajinine ruslahjerone, xye ptowruka howuka retakanaxyana.

⁵⁶ Sato wannaymalune Maria Madalena tshinkaluro, sato Tiago hiyrunu José hinro Maria tshinkaluro hiyrun-koxa sato Zebedeu whenene hinro.

Jesus Kapnaxikolu Piranapni

⁵⁷ Waneya kayi rixinixka satu phuru José tshinkaluru, Arimateia hajeru, hapoka. Wale koxa Jesus hasrukleru.

⁵⁸ Hyanwakatlu Pilatos, ranjixyawakaplu Jesus-ni mane. Waneya Pilatos henekjixlu.

⁵⁹ Waneya José kochtsheklu Jesus-ni mane, mkatshri sama powralu, linho sama, ruwtoklu.

⁶⁰ Waneya sotlu jitoxikolu hipjitaya José kapnaxikowakamkapa, satukna mutajikowakanuwa, rutakmanetlu Jesus-ni. Waneya tsru sotlu reruta yomletshi jihlojikowaka, ruchyaxyawakaplu waneya hyatka.

⁶¹ Hepi tuplakanatatshine koxa yomletshi yoptowakle sreta tuplakanata, Maria Madalena tshinkaluro hiyrunu sato Maria tshinkaluro.

Yomletshi Ruslahyawakna Piranapni

⁶² Wale prika, walekni hapnanuxikaluru prik-hohne, tsru hixikatshinwa sacerdote-ne hiyrun-koxa fariseu-ne yanwakatlu phuru Pilatos.

⁶³ Waneya wla htshinatkaluna: — Tsru Hixikatshriwa, wuchiniklu wale kyokwirewaklerni riwekakanaxinni wla htshina, Map-hohne hiknohinpatka niwekkako.

⁶⁴ Hiyáhoni ptowutanru kihle hislahle potuko rixanruna yomletshi map-hohne pejnu tshinanu. Himanni hma tshowhutapyawakanupna rasruklene wla hma tshinyawakanupna: “Riwekatka hipnatshinetka tskalaya.” Hiyáhoni xye rapkatle hyokwirewle yohnik-himtukaplu.

⁶⁵ Waneya Pilatos hihitna, wla htshinna: — Nenekanhi soldado-ne yomletshi hislahatshinepa. Hajewa, hanukta hixa himukata hislahletanru, wan-hixanru.

⁶⁶ Hiyáhoni hyatkana, sotlu yomletshi hichyatkaluru rimaxikoletna hiyrunu hislahatshine rutakna.