Mateus 26 - Bíblia

Hjemahchinikankakyehitluna Jesus Ruylaxyawakapluna Piranapni

¹ Waneya xye pirankaka rali tshinrexinixka Jesus, wla htshinatkana rasruklene:

² — Hixa himatlu hepi hohne mahatlu Páscoa hohne tshinkaluru waneya Jeji Whene renekko cruz rupniywakpatka.

³ Waneya tsru hixikatshinwa sacerdote-ne hiyrun-koxa tsrukakalune judeu-ne tsru pjiru tsru sacerdote Caifás tshinkalurupji rapatjexyana.

⁴ Waneya rujhahchinikanutna hanu rixa himukata preso hitakletluna Jesus yokwiruyma ruylaxyawakapluna.

⁵ Waneya wla htshinatkana: — Seyni xye hi wkamhanu tsru hohne pchinika hmakanhiywakanupa yin-sejire.

Suxo Phamluhalo Hiyokjiwuxyawaklu Jesus Piranapni

⁶ Waneya Jesus, Simão tshinkaluru hijirohitutatshripji Betânia poktshi rawakanaxini,

⁷ sato suxo yanwakatlu. Pa stono phamluhalo kwenuro potuko yehi tanika. Jesus nikawakakwa rukóluha waneya Jesus jiwu tuyokhatlo phamluhalo.

⁸ Seyni rasruklene hexinixkalo, rumtuwnahchinikanutna, wla htshina: — Klu tshinanhe t-saletachatlo?

⁹ Phamluhalo tsru wenru tumukata hichankalexyalo waneya wale tiyirotemka tumukata henekletna hike mwikane.

¹⁰ Waneya Jesus himatlu klu htshinna hiyáhoni wla htshinna: — Haklu hikojwaklo twu suxo? Kihler-potuko tkamhiyno.

¹¹ Hike mwikane ptowru hohneruka himwanu hixa tskalaya seyni hi ptowru hohneruka pimwanno hita.

¹² Phamluhalo tutakmanexinno, talpokomanetno nkapnaxikolupa.

¹³ Halikaka ntshinhi, psol-tshijneko kihle piranalu potuko hiwekkaklewatatshri pirana hinkaklexiko, tkamhaleru koxa hinkakletko, tuchinijikolupa wala.

Judas Tshinkaluru Kamnixyawaklu Jesus Piranapni

¹⁴ Waneya satu doze rixinri Jesus hasrukleru, Judas Iscariotes tshinkaluru yanwakatna tsru hixikatshinwa sacerdote-ne.

¹⁵ Waneya repomhana: — Kluhe henekanno Jesus nenejiniphi? Waneya rutakyahoklona trinta proji tiyiro renejyawakapluna.

¹⁶ Waneklu kananuko rujhalu hiklukta hpoyaho hekhiretanna, Jesus rekhixyawakapna.

Jesus Páscoa Hohne Hichinijyawaka Pirana

¹⁷ Pão myapjetu hnikjexinrina hohne rasruklene yanwakatlu Jesus, repomhapyaluna, wla htshinruna: — Hanurhe walpokotanru Páscoa hohne nikle wnijyawakapa tshinanu?

¹⁸ Waneya wla htshinna: — Tsru poktshi hjihlojinipa wane hyoptoxinri satu jeji waneya punkakanru: “Kasruklewakleru wla tshina: Nohohnestsitkani. Páscoa hohne nikle pipji wnijini.”

¹⁹ Hiyáhoni rasruklene kamhalu htowuxyawakna, ralpokotatkaluna Páscoa hohne hniklerupna hnijyawakapna.

Jesus Hekhixyawaklu Hkamnitjeru Piranapni

²⁰ Páscoa hohne kayno Jesus hiyrunu rasruklene doze nikawakakwa rukoluhana.

²¹ Hnikka pchinikna Jesus wla tshina: — Halikaka ntshinhi, satu hewi hwatshri nkamnitjerupa.

²² Waneya wanna wamonuwpotuta waneya satkaka yinuwaka hepomhaletlu: — Hitlahe?

²³ Jesus hihitna: — Nkamnitjerukni hitayma pão yotshmota prato-ya.

²⁴ Jeji Whene tshinkaluru halikaka hipnanu Hoyakalu hixahchinikanuxyawaka pixka. Seyni hektu potlu wale jeji, Jeji Whene tshinkaluru kamnitatshri. Kihle potlu wale jeji hma matuxyawakanutka.

²⁵ Waneya Judas, Jesus kamnitjerupa, wla tshina: — Kasruklewakleru, hitlahe? Jesus hihitlu, wla htshinru: — Pixako wan-tshina.

Jesus Hipninri Yapkakle Piranapni

²⁶ Waneya hnikka pchinikna, Jesus pão hkochtsheka. Waneya hpoyahnutlu Hoyakalu. Hjiknajrotlu pão waneya rasruklene reneklu. Waneya wla htshina: — Pão hyoptotanu, hnikanru. Xyeni hatatjewa nomane.

²⁷ Waneya copa stono hkochtsheka. Hpoyahnutlu Hoyakalu, rasruklene reneklu. Waneya wla htshina: — Xye copa himurkakanu hixa ptowrunekhi.

²⁸ Twu copa stonha nunkakletleru, waleni herotu nohraha piranni. Xye nohraha hixolune yine tshinanu hiyokkalurupa hektuntshi hiknojikowakapa tshinanu.

²⁹ Halikaka wane ntshinhi hikeklu hohne nnikanru xye Páscoa hohne tshinanupa haté rakanhanu Páscoa hohne potu Nuru Hoyakalu pohirewaxyawakaya.

³⁰ Waneya satu chikale hchikaletna, ralimtna, himriji Monte Oliveiras tshinikowaka hyatkana.

Jesus Hinkaklu Pedro Wkatakluyakawa Pirana

³¹ Waneya Jesus wla tshinna: — Xawakni yetshno potuko hixa ptowrunekhi hiknokanno niknohlerupa tshinanu klu tshinanu wla htshina Hoyakalu tokanu: “Nuylatanru carneiro-ne hinotatshri, waneya hiprane hipalatanu.”

³² Seyni niwejinpatnaka, hita kosekanhi hixa Galileia tshijne nwaka.

³³ Seyni Pedro wla tshina: — Yáholu ptowruneka hiknojinyi, hita hikeklu nuknokanyi.

³⁴ Waneya Jesus wan-tshinru: — Halikaka wane ntshinyi. Xye yetshno hma yanumatkanuklunuwa patlapa, pixa map-kata pma mimatletanutu ptshinanno.

³⁵ Seyni Pedro wla tshinru: — Hike! Hikeklu hohne nma mimatletanutu ntshinanyi yáholu pixayma nupnanu. Waneya pimrine rasruklene ptowruneka koxa wane potuko htshinna.

Jesus Getsêmani Tshinikowaka Hyiywaka Piranapni

³⁶ Waneya Jesus rasrukleneyma Getsêmani tshinikowaka hya. Waneya wla htshina: — Hixa hewitshi tuplatanu, hawla nyanu nanjihohnexyawakapa.

³⁷ Pedro hiyrunu Zebedeu whenene hepi ranika waneya hyinuwaka wamonuwleta, hsalewnahchinikanuta.

³⁸ Waneya Jesus wla tshinna: — Niwejinri wamonuwpotuthonuka, hatatjewa nupnakastsitkani. Hewiphitshi, hitayma hislahanu.

³⁹ Waneya pnutejiji hya, hyospaka tshiji rutspakhojita, wla htshina ranjihohnereya: — Nuru! Palujinipa pkochripaxinno twu copa salewaktshi yehiya. Seyni hi hitako nalujyawaka pkamhanu seyni pixako palujyawaka pkamhanu halikaka.

⁴⁰ Waneya Jesus satokanwakatna rasruklene, retamtna himkatshine, waneya repomhalu Pedro: — Hi he pa hora-kna himukata hislahleta hitayma?

⁴¹ Hislahanu, hanjihohnetanu hmallixikowakanupa. Klu tshinanu jmeremkahi seyni mantshicha mmixkotni.

⁴² Hiyrunuko pnute hya ranjihohnexyawakapa, wla htshina hanjihohnereta: — Nuru, nma muriknuko pchinro twu copa salewaktshi yehiya hi tumukata hitneprikkakota, palujyawaka pkamhanu.

⁴³ Waneya hsatokatnaka rasruklene nwaka, retamtna himkatshine hi rumukata himrekhayhaletna.

⁴⁴ Hiyáhoni hyatnaka, map-kata rixinri ranjihohnetatnaka, htshinakanaxyawaka pixka htshina hanjihohneretatnaka.

⁴⁵ Waneya Jesus satokanwakatatnakna rasruklene, wla htshinna: — Himkawhe, hapnanutawhe? Hetanu, rapokpapkolutatka. Jeji Whene tshinkaluru hektuwaka kamhatshinemyo rutakkatka.

⁴⁶ Hpalnanu, hayewa! Tujrapa nkamnitjeru!

Jesus Kachixikowaka Piranapni

⁴⁷ Jesus yanumakanaxiniwa, satu rasruklene Judas tshinkaluru hapokatka. Waleymalune hixolune tsru hixikatshinwa sacerdote-ne hiyrun-koxa tsrukakalune judeu-ne yokanatanune. Yohlolewapi hiyrunu hahaje ranikna.

⁴⁸ Kamnitatshri satu rimaxikole runkakna, wla htshina: — Katukta namlutanu, walekatkani. Hkachitanru wale.

⁴⁹ Waneya Judas hajeyri hapokastsitlu Jesus waneya wla htshinru: — Hali, kasruklewakleru! Waneya ramlutlu.

⁵⁰ Waneya Jesus wan-tshinru: — Nimatletleru, pkamhanru paluka kamhaletanru. Waneya hkachpiratjene hinanwakatlu Jesus, hkachpotutluna.

⁵¹ Waneya satu Jesus-ymalune kochpaklu hyohlolewapre, hkastakjepitlu tsru sacerdote towrer-jepi.

⁵² Seyni Jesus wla tshinru: — Pimretanru pyohlolewapre klu tshinanu katukta hiylalewata yohlolewapiyma, yohlolewapi ruylaxikotka.

⁵³ Hixlahe kahwaklu hi numukata hanjiretlu Nuru waneyamka wale hixolune hiwejikalune htowrene tenhohne hajene doze ptohkakamka hyokanatanu repixyawakapnona?

⁵⁴ Seyni wan-rixini hanhe xawaka rixa poyahokakletanu Hoyakalu tokanu tshinyawaka rujhalu wan-rixyawakapa yonatkaluru tshinyawaka pixka?

⁵⁵ Waneklu Jesus wla tshinatkana hkachitjene: — Katshowhurlanohe wkata hina yohlolewapikakayma, hahajekakayma koxa hkachixyawakapno? Ptowru hohneruka Hoyakalupji nasrukjekanaxyahi. Seyni hi hkachitno.

⁵⁶ Seyni xye ptowruka hakanha Hoyakalu tokanu hinkakletatshinni yonreru tshinyawaka hpoyahokajyawakapa tshinanu. Waneya rasruklene ptowruneka hichotatkalu, rasukatkana.

Tsrukakalune Jemahchinikankakyehixyawaklu Jesus Piranapni

⁵⁷ Jesus kachitjene hanikatkalu tsru sacerdote Caifás tshinkaluru yehi, wane koxa rapatjexyana kasruklewaklerune hinanchitkaluru pirana hasruklewatatshine hiyrunu tsrukakalune judeu-ne.

⁵⁸ Seyni Pedro hohatjinijiji romkahyehixyalu Jesus haté tsru sacerdote-pji maleka sreta potuko. Waneya tsru sacerdote hiputre hjihloka, htuplata Hoyakalupji soldado-teneyma rethixanuyehitlu.

⁵⁹ Waneya tsru hixikatshinwa sacerdote-ne hiyrunu pimrine tsrukakalune jemahchinikankakatshine hijhamkalu satu rukolukanuwninri yáhole rumukata hiylalexyawakapluna.

⁶⁰ Yáholu hixolune hapokatshine weyawyehitlu Jesus seyni hi jikolukanuru rukchikna ruylalexyawakluna. Waneya hepi hapkatatatshine hapoka.

⁶¹ Wla htshinna: — Xye jeji wla tshina: “Numukata nikatletanru Hoyakalupji seyni map-hohne pnute, nkamhanutnaklu.”

⁶² Waneya tsru sacerdote palnatka, wla htshinatkalu Jesus: — Hanhe pixa hihletanru hjihyehixyayina?

⁶³ Seyni Jesus potshkecha. Waneya tsru hixikatshriwa sacerdote wan-tshinru: — Ntowutyi Hoyakalu Hiwekatshri hetanuya. Punkakanwu, pixlahe Messias-yi, Hoyakalu Whenyi?

⁶⁴ Jesus hihitlu, wla htshina: — Hehe, pixako wan-tshina. Seyni ptowruneka tshinanu wla ntshina: Xawaknikananuko hixa hetanru Jeji Whene, hohimkohi hoho hapokatshripa, Ptowru Himukatatshri Hoyakalu potukle sreta tuplatatshripni.

⁶⁵ Waneya tsru sacerdote hjihekannu tshinanu hsuskamkaluxnawa waneya wla htshina: — Hektuwaka htshinanwakatlu Hoyakalu! Hi wujhana pimrine hiphujtatatshine. Hetanu, xawakni hjemlu hektuwaka htshinanwakaxyawaklu Hoyakalu!

⁶⁶ Hiyáhoni kluhe hkahwaka hixa? Waneya pimrine hihitlu, wla htshinna: — Waleko htshinanu rujhalu rupniywakapa!

⁶⁷ Waneya rutskahahojitlu Jesus, rutsojtakluna. Pimrin-koxa himpaklu.

⁶⁸ Waneya wanna wla tshinru: — Xawakni Messias tshinikatshriwayi, pmetanutu punkaklewatanu kathe hiylakyi?

Pedro Wan-tshina Hi Rimathetlu Jesus Piranapni

⁶⁹ Pedro honra tsru sacerdote hiputre tuplata waneya sato towretshro yanwakatlu, wla ttshinru: — Pix-koxa Jesus Galileia hajeruymalutyi.

⁷⁰ Seyni Pedro ptowru yineru hetanu hmetjejetanutu htshinru, wla htshina: — Hi nimata klukta ptshina.

⁷¹ Waneya Pedro hiputu jihlokawakle hya, wane koxlo sato suxo. Waneya tetlu, wane hwakanatatshine tunkaka, wla ttshina: — Xye jeji Jesus Nazaré hajeruymalutni.

⁷² Hiyrunuko hmetjejetanutu htshinatnaklu, wla htshina: — Nmunanhalu Hoyakalu, hi nimathetlu xye jeji!

⁷³ Hi howukchini wane hwatshine yopkakatshine Pedro-stsi rapokna waneya wla htshinatkaluna: — Pixa halikaka wannaymalutyi klu tshinanu Galileia hajene pixka pixa yanumleta.

⁷⁴ Waneya hyinuwaka hektuwaka tshinrexnawa, wla htshinatnaka: — Halikakni hi nimathetlu xye jeji! Waneya waneklukawa potuko patlapa yanumatatka.

⁷⁵ Waneya Pedro hichinikaplu Jesus tokanu htshinakanaxyawaklu: “Hma yanumatkanuklunuwa patlapa, pixa map-kata hi pimathetno ptshinanu.” Hiyáhoni kahnete hya, tsru wamontshiyma htshiyahpotuthonukatka.