Mateus 25 - Bíblia

Dez Maklojine Piranapni

¹ — Hiyáhoni tenhohne pohirewaxyawaka dez maklojine pixka rixanu. Maklojine lamparina hanikatshrone hichpakamta hyoptoxyawakapluna hnunrowpiratatshri.

² Cinco-na kahchinikanurone hiyrunu cinco-na mahchinikanune.

³ Waneya mahchinikanune lamparina hanikamta seyni hi ranikluna óleo-ha.

⁴ Seyni kahchinikanurone hanikamtlu lamparina pa stono óleo-haymakananuko.

⁵ Waneya hnunrowpiratatshripa mapokhapkatkanuklunupa hiyáhoni maklojine hixapnewatatka, rumkatkana.

⁶ — Hanikaj-yetshno rixinixka, hjemka sapletshi wan-tshinatshri: “Hnunrowpiratatshripatkani! Hichpakanu hyoptoxyawakaplu!”

⁷ — Waneya ptowroneka maklojine hiyokatka, ruhlepokotluna h-lamparina-tna.

⁸ Waneya mahchinikanune wla tshinatkana kahchinikanurone: “Wuya, psojha óleo-ha henekanunwu klu tshinanu w-lamparina-te hiwnapiratatka.”

⁹ Seyni kahchinikanurone wla tshinna: “Ha hike! Klu tshinanu pa katako hi hpoyahotanu hixako w-lamparina-te tshinanupa hiyrunu hixa h-lamparina-te tshinanu. Seyni óleo-ha halujinipa, hanjitapanru.”

¹⁰ — Seyni óleo-ha ranjitapkako pchinikna hnunrowatatshripa hapokatka. Waneya maklojine halpokokanatatshrone hnunrowatatshripayma hjihlokna hnunrowlu nikle yehi. Waneya ruchyahiphaptotetkatka.

¹¹ — Howukchini mahchinikanune hapokatka. Waneya wla htshinna: “Tsru Hixikatshriwa, Tsru Hixikatshriwa, pkotpukyehitanunwu.”

¹² — Seyni wla htshinna: “Halikaka ntshinhi, hi nimathethi.”

¹³ — Hiyáhoni hkakonjetanmaklu klu tshinanu hi himatlu hihohne, hi hipapkoko runinripa Jeji Whene.

Cinco Ouro Proji Yapkaklu Piranapni

¹⁴ — Hiyrun-koxa satu jeji pa tshijne yatshripa pixka rixanu tenhohne pohirewaxyawaka. Mitshikananhapka htomhanna hkamrurewkakjetanune htowuxyawakapna rejnunkate rinoxyawakapna.

¹⁵ Waneya satu towrertshi cinco proji reneka, satu hepi proji reneka, satu pa projipka reneka. Satkaka rumukaxyawakna renekna. Waneya hyatka.

¹⁶ Waneya chinpotukawa cinco proji yoptotatshri halimta, htiyiroteyma rikamrurewatlo waneya cinco proji hkayatatka.

¹⁷ Hiyrun-koxa hepi proji yoptotatshri waneko pixka rixatka, waneya hiyrunu hepi proji hkayatatka wale.

¹⁸ Seyni pa proji yoptotatshritka, hyatka, tshiji hjitota, hyohimaxyalo tiyiro htowutjeru henejyalu.

¹⁹ — Howukchini hpohirna satkapatka, ruhlepokotlu hkamrurna htowutamtanuneyma.

²⁰ Cinco proji yoptotatshri hiyrunu cinco proji ranika waneya wla htshina: — “Tsru Hixikatshriwa, petanu, cinco proji penekamxyano dez ouro-tkalo.”

²¹ — Waneya rutsrukate wan-tshinru: “Hikamturu pkamrure! Kihleru towrertshiyi poyahokakatshriyi. Pixa psotsonuyaka kihle kamrure pixle tshinanu tsru kamrurtshi koxa penekka. Punanu hitayma ppoyikowatanu.”

²² — Waneya hepi proji yoptotatshri koxa yanwakatlu htowutjeru, wla htshinru: — “Tsru Hixikatshriwa, petanu hepi proji penekamxyano quatro ouro-tkalo.”

²³ — Waneya rutsrukate wan-tshinru: “Hikamturu pkamrure! Kihleru towrertshiyi poyahokakatshriyi. Pixa psotsonuyaka kihle kamrure pixle tshinanu tsru kamrurtshi koxa penekka. Punanu hitayma ppoyikowatanu.”

²⁴ — Waneya pa proji yoptotatshri hapokatka, wla htshina: — “Tsru Hixikatshriwa, nimatyi pix-honra jeji menekachalewakletyi. Mutakatúkoyi hamlu. Yineru pimrine hitakle hapatjetatshri pixka pixa.

²⁵ Hiyáhoni npikatka, nalimtatka, tshiji nyohimaxyalo proji tiyiro. Haha xyetkani ptiyirote.

²⁶ — Waneya wla htshinru: “Hektutu towrertshiyi mmeretu. Pimatnohe jeji menekachalewakletu nixyawaka? Nma mutakanutuko namyawaka hiyrun-koxa nma muplaljetanutuko napatjeta?

²⁷ Haklu tshinanhe hi banco putaklo ntiyirote tatskoxyawakapa? Wane pixkamka napojinitka nyoptotanmaklo tiyiro tsroyakalotka.”

²⁸ — Waneya wla htshina: “Hkonanru ouro proji nenekamxyalu. Dez proji ouro himwatshri henekanro.

²⁹ Klu tshinanu tsru himwatshriko pnute renekko wane yohnika. Hiyrun-koxa hike mwikatu seyo rimwalerujiji hkonko.

³⁰ Maleka sreta mapchahawaka hiknokanru hektutu towrertshi tsru tshiyahlu haskiyhiru yehi.”

Hoyakalu Hikolukanuwnajixle Hohnepa

³¹ — Jeji Whene ruphujewnin-hohnepa, royaknuyma runanu hiyrunu hiwejikalune htowrene tenhohne hajeneymalu. Phuru tuplawakle htuplatanu rukolukanuwniywakapa.

³² Wale hetanuya rapatjetanu ptowru yineru xye tshijne hajene waneya carneiro hinotatshri kotspalaxyawakna carneiro-ne bode-yma pixka rix-kotspalletanna yine.

³³ Carneiro pixkalune (wannakatkani potukalune) hpotukle sretate rutakanu hiyrunu bode pixkalune (wannakatkani pimrine) pa sta sreta rutakanu.

³⁴ Waneya pohirtshi wla htshinanna hpotukle sretate hajene: — “Hinanu, Nuru kihleru htshinyehixyahi. Hyoptotapanru hyoptolerupa Hoyakalu pohirewaxyawaka hixa tshinanu halpokotkalurutka hma muyakotkonuklunuwa xye tshijne.

³⁵ Klu tshinanu nnatshikanaxinixka hixa henek-nikletno, nonunnahatewakanaxini hixa henek-hirretno hiyrunu hma metjejetanutno hyoptokanata.

³⁶ Mamkatno nixinixka, hmakatno. Nyeyixakanaxinixka, hixa hinotno hiyrun-koxa preso nwaka nwakanaxinixka, hixa hapkapyehitatkano.”

³⁷ — Waneya potukalune wla htshinanru: — “Tsru Hixikatshriwa, hikluhe wetyi pnatshixyawaka waneya wohlutyi, hiyrunu hikluhe wetyi ponunnahatewaxini wutyi?

³⁸ Hikluhe wetyi wma metjejetanutyi waneya wyoptotyi ho mamkatyi wmakata?

³⁹ Hikluhe wetyi pyeyixyawaka ho preso nwaka hwatshriyi wapkapyehityi?”

⁴⁰ — Waneya pohirtshi hihitanna, wla htshinanna: — “Halikakni wane ntshinhi, xyekaka hkamhiniklunna nomolene haté mujhakot-potu tshinanu hkamhinri, nkahwaklu hita tshinanu hkamhalu.

⁴¹ — Waneya wla htshinanunna pa sta sreta hajenepni: — “Hyachatanutka, hapnokatkalunephi! Tshitshmero hikeklu hohne mnikawnakatupa yehi tsru kamtshi hiyrunu htowrene kamtshine tshinanu halpokotkaluru yehi hyanu.

⁴² Klu tshinanu nnatshixiniklunu, hi henek-nikletno hiyrunu nonunnahatewaxiniklunu hi hutno.

⁴³ Hma metjejetanutno hi hyoptota hiyrunu mamkatu nixiniklunu hi hmakatno. Nyeyixiniklunu ho preso nwaka nwiniklunu hixa hi hapkapyehitno.

⁴⁴ — Wanna koxa wla htshin-hepomhaletanru: — “Tsru Hixikatshriwa, hikluhe wetyi pnatshixyawaka ho ponunnahatewaxyawaka ho wma metjejetanutyi ho mamkatyi ho yeyixatshriyi ho preso nwaka hwatshriyi waneya waneklu hi wepixyi?”

⁴⁵ — Waneya ruhitanna, wla htshinanna: — “Halikakni wane ntshinhi, hma kamhanutu xyekaka nomolene haté mujhakot-potu tshinanu, hita tshinan-koxa hi hkamhalu.”

⁴⁶ — Waneya wanna hapnokaxikowaka hikeklu hohne mnikawnakatupa yehi hyanuna seyni potukalune yoptotanru hiweklu hikeklu hohne mnikawnakatupa.