Mateus 24 - Bíblia

Hoyakalupji Kopalaxikowakapa Piranapni

¹ Waneya Hoyakalupji ruchpajinixka Jesus, rasruklene hekhitlu Hoyakalupjikaka.

² Seyni Jesus wla tshinatkana: — Hetluhe xyepjikaka? Halikaka ntshinhi, ptowruka hetleru hkoptalhako hi satukna sotlu hwahohokakanu.

Salewaktshi Yinuwakle Piranapni

³ Waneya Jesus Oliveiras mriji tuplaxini, rasruklene yanwakatlu wannapkani. Waneya repomhatkaluna Jesus, wla htshinna: — Kasruklewakleru, hikluhe wan-rixanu? Klunerhe rakaxrikletanu rekhixyawakaplu xye ptowru potuko hakanhapiraxinpatka? Hanhe wixa himatletanru punyawaka xye tshijne nikawnini hohnepatka?

⁴ Waneya Jesus hihitna, wla htshina: — Xakoka hike yokwijetanhi.

⁵ Klu tshinanu hixo hiphujewnanu hita hiwakaya wla tshinatshripa, “Hita Cristo-no” waneya hixolune hyokwijetanna.

⁶ Hjeminiplu hiylakaklu ho pa tshijnekaka yahotkakle pirana hi hpikanu. Klu tshinanu xye ptowruko hakanhanu seyni hi hnikawnalepnitshi.

⁷ Pa neruymako hyahotkakanu satu neruko. Pa tshijneko yahotanru satupni. Natshipni. Hixo poktshi hiyolikanu.

⁸ Xyekaka mturu tshino yinuwakle pixkalutni.

⁹ — Seyni xye ptowruka hnapu, hsalewnakakko, hiylatko, ptowru tshijne hajene hahnanutanhi hita tshinanu.

¹⁰ Waneklu papkopa hixolune yine hiknoka halixletanu, yine kamnikakanu, rahkakakanna,

¹¹ Hoyakalu tokanu hinkakletatshine yahole hakanhanu, hixolune yine hyokwijetanna.

¹² Hektutu kkamhaklerune hixolewniywaka tshinanu, yine hituk-hamotkakletanu.

¹³ Seyni poyehitahchinikanutatshri haté hmahle papko, riwekanu.

¹⁴ Hiyrun-koxa kihle piranalu potuko Hoyakalu pohirewaxyawaka pirana psol-tshijneko hpohixika, pa nerkaka himaxyawakaplu waneya waneklupatkani xye tshijne nikawninripatka.

Tsru Salewaktshi Piranapni

¹⁵ — Hixa hexinixkalu Hoyakalupji hahnanutkaluru himtukpotlewatatshri, Hoyakalu tokanu hinkakletatshrini Daniel-ni tshinyawaka, hixa himathethatatshinhi xako himatjemanru.

¹⁶ Waneyakni katukta Judeia hwanu, rasukanu, hipjita hyanu.

¹⁷ Katukta teno pantshi hohowaka hwanu, hi hserpikanu rejnunkate pantshi hajeru rawapyawakapa.

¹⁸ Campo hwatshri koxa hi satkapanu himkalu rawapyawaka.

¹⁹ Hi pa himtukalutu retanna suxone kamchirone waneklu hohnepa, hiyrun-koxa hachiwhenetatshinepni!

²⁰ Hoyakalu hanjitanu hapnanuxikalur-hohne ho katshikleru papkolu hma makanhiywakanupa xyekaka.

²¹ Klu tshinanu tshiji rawanu salewaktshi tsrupotpákolu. Hikeklu hohne wane pixkalutu salewaktshi rawapa xye tshijne yinuwajikolukananuko haté xawakni hiyrun-koxa wane pixkalutu salewaktshi hikeklu hohne hakanhanutnaka.

²² Seyni Hoyakalu hma masatkanumkalu salewnikolu papkopa, hikemka hiwekanu. Seyni Hoyakalu nuretanune tshinanu, hmasatanru salewaktshiklu papkopa.

²³ Waneya waneklu papkopa yineru wane htshinini: “Haha hetanru Messias!”, ho wane htshinini: “Hawlalu! ” — hi halixanru.

²⁴ Klu tshinanu hixolune Messias minjene hiyrun-koxa Hoyakalu tokanu hinkakletatshine minjene hakanhanu hiyakolukaka hiyrunu himyekaklewatatshri kamhatshine hyokwijexyawakapna yine. Rumukatkamka haté Hoyakalu nurrene hyokwijetanu.

²⁵ Hichinikanru xye, wane ntshinhi ptowru potuka hmuphujewnaknukawa.

²⁶ — Hiyáhoni satu wla tshininiphi: “Hawlalu, potshkewaka rawa” — hi wane hyanu. Ho satu wla tshininiphi: “Hewitkalu, hitoko hruko rawa” — hi halixanru.

²⁷ Klu tshinanu rawrakle pixka rixanu, pa sreta hyinuwaka hawraklexini haté pa sreta hohne rapokhawrakletsatanu. Waneko pixka rixanu Jeji Whene tshinkaluru hapojinri hohnepa.

²⁸ — Hanukta rawamanetanuna hipnatshripni wane rapatjexinna maylune.

Jeji Whene Hininri Hohnepa Piranapni

²⁹ — Xye hohne hajeru salewaktshi nikawninipa, waneklutka rutshpokanu tkatshi, hi katalupni ksuru, katahirine tenhohne hijrujini, hiyrun-koxa tenhohne hajerkaka hiyolikkako.

³⁰ Hiyáhoni tenhohne Jeji Whene himaxikolepa hakanhini waneya psol-tshijne nerkaka htshiyahatanna kaheknanuwlu tshinanu. Waneya Jeji Whene retanna, hohimkohi rapojini royaknuyma tsru pixkonuyma koxa.

³¹ Kowi hima hajpokoklunpatka Hoyakalu yokanatanna htowrene hiwejikalune tenhohne hajene ptowru sretako rapatjexyawakapna Hoyakalu nurrene ptowru sreta tshijne hichpajikatshine.

Figueira Piranapni

³² — Xawakni himatanru xye yapkaklu pirana figueira pirana: Hyinuwaka hiptsheklesurexinixka hiyrun-koxa rerotewapluxinixka, himatlu hi howukatkalu mhalu.

³³ Wane koxa rixanu, hexinpatkalu xyekaka himatanutka hi howukatkalu rakanhiywakapa Hoyakalu pohirewaxyawaka hatatjewa hiphaptostsitkalu.

³⁴ Halikaka wane ntshinhi, xyekaka wan-hixa hiphujewnaletanu hmupnaknuhnapukawna xawakni mupnakanewa.

³⁵ Tenhohne, tshij-koxa nikawnanu seyni ntokanu hikeklu nikawnanu.

³⁶ — Hike himatlu wale hohne hi hipapkoluko rakanhiywakapa xyekaka. Hiwejikalune Hoyakalu towrene tenhohne hajene hi himatlu, hi Whentshiko himatlu seyni Hirtshi tsonupka himatlu.

³⁷ Noé-klu papko pixka rixanu Jeji Whene tshinkaluru hapojinri papkopa.

³⁸ Klu tshinanu ptowrunniko yinni hniknina, rurnina, hhanunrowatnina, hhanuruwatnina, Noé-ni tsro kanawatlo jihlojinriklu potukananuko;

³⁹ hi hkahwaknina hahyekachalu seyni runatka hahyekachalu, ptowrunnika yinni hnikata. Waneko pixka rixanu Jeji Whene hapojinri papkopa.

⁴⁰ Waneya hepi jejine campo hwatshinepni, satu hanikko, satupni hiknokamtkona.

⁴¹ Hiyrun-koxa hepi suxone trigo-ji yojitatshinepa, sato hanikko, satopni hiknokamtkona.

⁴² Hiyáhoni hislahinri klu tshinanu hixa hi himatlu Hitsrukate hapojinri hohnepa.

⁴³ Himatjemanru xye: kapjiru himatahnaputkamkalu katshowhuru, ruslahapjitanumkatka himka retachatanru hipji hyotpujyawakapa.

⁴⁴ Hiyáhoni hkakonjetanu xako klu tshinanu Jeji Whene tshinkaluru hinanu hma kakonuxinri papko.

Hepi Hixatshine Towrertshine Piranapni

⁴⁵ — Katnihe towrertshi ptowutkolu, kahchinikanuru? Waleni towrertshi rutakko htowutjerupji rinoxyawakapa hiyrunu pimrine towrertshine reneka niklexyawakapa niklu papkokaka.

⁴⁶ Hihlewahchinikanyehitkalurni wale towrertshi htowutjeru hininipa retamtlu wan-rixa kamrurekanata.

⁴⁷ Halikaka wane ntshinhi, wan-hixatshri towrertshi rutakko ptowruka htowutjeru himwaleru htowuxyawakapa.

⁴⁸ Seyni towrertshi wla htshinahchinikanuxini rajiya: “Ha hohamokpotukananutkalu ntowutjeru.”

⁴⁹ Waneya hyinuwaka hiylakletna towrertshine. Hiyrun-koxa hnika, rura, jimekleruneyma.

⁵⁰ Hiyáhoni towrertshi towutjeru hma kahwajinitu hohne runanu. Hma malpokoxinutu hohne runanu.

⁵¹ Htowutjeru hapnokatpotutanru towrertshipni. Waneya tsru tshiyahlu hiyrunu haskiyhiru yehi ruknokkona Hoyakalu halixatshine hixachatatshineyma.