Mateus 22 - Bíblia

Tsru Niklu Piranapni

¹ Waneya Jesus hinkaklewatatnaka yapkaklu pirankakayma, wla htshina:

² — Tenhohne pohirewaxyawaka satu phuru pixka rixa. Phuru halpokojixlu tsru niklu hituru hnunrowle tshinanupa.

³ Hyokanatna htowrene htshanixyawakapna phuru tshanixlene seyni hi jmerna.

⁴ Waneya hiyrunuko pimrine htowrene hyokanata, waneya wla htshina: “Punkakanna ntshanixlene, nnijitu halixatka: noprane bezerro-ne hiyrunu boi-ne nixownakakanune nuylatatka, ptowruka halpokotatka. Hinanu tsru niklu hnunrowlu tshinanu.”

⁵ — Waneya tshanixkalune hi hislahtokanutna seyni ralimtna. Satu hsana yatka, satu maronewjexikowaka hyatka.

⁶ Pimrine kachitanna phuru towrenni, hkotshipjetatkana, ruylatanatkana towrertshinni.

⁷ Waneya phuru jihekanuwpotuta. Soldado-ne hyokanata ruylaxyawakapna jiylalewaklerune, hiyrun-koxa wanna poktshite hyoxijyawakapna.

⁸ Waneya phuru wla tshinna pimrine htowrene: “Nijittshi halixatka hnunrowlu tshinanu, klu tshinanu nyi rujhalna tshinanu hi htshanixkatkana.”

⁹ Hajewa poktshi hapkaka yoptowakkaka hyanu, htshanixanna katuktako hikchikanune.

¹⁰ — Hiyáhoni towrertshine poktshi hapo yoptowakkak-yehi hyatkana, rawapyawakapna rumukata hikchikletanune, kihlerune hiyrunu hektune koxa. Waneya tshanixkalune tsepotlu phurupji tsru nikawaka.

¹¹ Seyni phuru jihlojinixka retapyawakapna hapokatshine, retlu satu jeji kihleru mkatshri mutakkatu.

¹² Waneya repomhalu: “Nimatletleru, hanu pixa jihlokleta hewi kihleru mkatshri mutakamtkatyi?” — Waneya hi ktokanru jeji.

¹³ Waneya phuru wla tshinatkana htowrene: “Hostujixitanru, hostumyotanru koxa waneya maleka sreta mapchahawaka tsru tshiyahlu hiyrunu haskiyhiru yehi hiknokanru.”

¹⁴ — Klu tshinanu hi heppikna tshanixkalunemka seyni hi híxona nuretkalunetka.

Repomhaluna Jesus Ho Tiyiro Raluka Wenutluna César Ho Hike Piranapni

¹⁵ Waneya fariseu-ne hapatjeta, rujhahchinikanutna hanhe rumukata kachretluna Jesus htokanu tshinanu.

¹⁶ Fariseu-ne hasruklene hyokananwakatluna Jesus Herodes-neyma. Waneya repomhaluna Jesus: — Kasruklewakleru, wimatyi pixa halikaka pirana ptshinjeta, pasrukjetkoxna. Hiyrun-koxa hi yine hixachatatshineko yokwityi seyni pasrukle halikakalutu Hoyakalu halujyawaka pirana.

¹⁷ Hiyáhoni punkakanwu, pkahwaklu minanchitkotlahe psoji tiyiro wenejyawaklu César Roma hajeru tsru hixikatshriwa? Ho wenejerhe ho hike?

¹⁸ Seyni Jesus himathetna hektu hchinikanu rixyawakna waneya wla htshinna: — Hixachatatshinhi! Haklu tshinanhe haluk-himlukantaletno?

¹⁹ Hekhitanno tiyiro proji César wenuxikolupa. Waneya tiyiro proji ranikna.

²⁰ Waneya repomhana: — Katu yaholunhe kat-hiwaknihe toproji hwatshri?

²¹ Waneya ruhitluna: — César-ni. Waneya Jesus wla tshina: — Henekanru César kluneruktapni César-nu henekanru hiyrun-koxa kluneruktapni Hoyakalunu waleko henekanru.

²² Xye hjeminixkana, rimyekna Jesus hihixya tshinanna. Hiyáhoni ruchomtluna, hyatkana.

Repomhaluna Yineru Hiwejyawakpatnaka Piranapni

²³ Wale hohnekotnaka satkaka saduceu hipnatshri mkahwak-hiwekletkane yanwakatlu Jesus repomhiywakapluna.

²⁴ Waneya wla htshinna: — Kasruklewakleru, Moisés-ni yonaxyawu xye hiykolu pirana: “Jeji hipninipa ruknokamtanro hhanunro mwuhenetoko, walen-moleko hnunrotanro waleni hnunro. Twuhenewatanu hipnatshrini whenene hkahwajikowakapna.”

²⁵ Waneya pa kata wan-rixa hahijewakatanna sete-ni jejinni moletkakatshinni. Tsrujruni hnunrowatni rupnana mwuhenetniko. Waneya repurni hnunrotlo hipnahnurutatshro.

²⁶ Wale koxa hipnana mwuhenetniko. Waneko pixka rixa hahijewakatan-koxa satni mapa rixinri. Sete-ni hnunrotlewatni walaluto suxo. Rupnanna mwuhenenniko.

²⁷ Waneya suxni koxa hipnanatka.

²⁸ Xawakni hiwejikalur-hohnepatnaka, hanurpatkanhe thanuru? Klu tshinanu ptowruneko hnunrotaplo.

²⁹ Waneya Jesus hihita: — Hixa pupjetatshinhi klu tshinanu hi himatlu Hoyakalu pirana, hi koxa himatlu Hoyakalu himukatlewle.

³⁰ Seyni tujra hohne hiweklu yoptotatshinepa hi hnunrowatanu hiyrunu hi hnuruwatanu. Hiwejikalune Hoyakalu towrene tenhohne hajene pixka rixanutkana.

³¹ Seyni hi he het-yonhatlu Hoyakalu tshinyawakhi hipnatshine hiwekkajikowaka pirana tshinanu? Wla htshina:

³² Abraão-ni Hoyakalutno, Isaque-ni Hoyakalutno, Jacó-ni Hoyakalut-koxno. Hoyakalu hiwekatshine Hoyakalutni seyni hi miwekkanepa Hoyakalutni.

³³ Waneya hixolune xye jeminixka, rimyekahchinikanutna Jesus hasrujya tshinanna.

Yokanruru Hijhakalur-potuko Piranapni

³⁴ Waneya fariseu-ne jeminixkalu Jesus hitshrokkajyawakna saduceu-ne, rapatjetna.

³⁵ Waneya satu fariseu-ne, Moisés yonreru pirana himatpotutatshri, hetumhalu Jesus xye hepomhaluyma.

³⁶ Wla htshina: — Kasruklewakleru, kluner-pothe hijhakaluru ptowru Moisés yokanreru yonatkaluruya?

³⁷ Waneya Jesus hihitlu, wla htshina: — “Pamotanru Tsru Hixikatshriwa Poyakalute psoluka pajiyma, psoluka piwejinriyma, hiyrun-koxa psoluka pihchinikanuyma.”

³⁸ Xyekni mitshikananu yokanruru, hijhakalur-potukni.

³⁹ Yokanruru hepi rixinri waneko pixka rixa hijhakalurni: “Pamotanru pimwastsitanru pamoxnawakwa pixka.”

⁴⁰ Nyi hepi yokanruru poyahokaklu Moisés yokanreru yonatkaluru hiyrun-koxa Hoyakalu tokanu hinkakletatshine tshinyawaka psoluka.

Katnihe Messias Piranapni

⁴¹ Waneya rapatjekananumtawana fariseu-ne, Jesus hepomhana:

⁴² — Klu hkahwaklu Messias? Katu klopichni wale? Waneya ruhitluna: — Davi-ni klopicha.

⁴³ Waneya wla htshinna: — Seyni klu tshinanhe Davi-ni, Hoyakalu Hiwejikaluru tshinanu, Nutsrukate htshinanwakatlu? Klu tshinanu wla htshinatka:

⁴⁴ “Tsru Hixikatshriwa Hoyakalu wan-tshinno Tsru Hixikatshriwa: Ptuplatanu npotukle sreta, haté pkamnitjene pijixi hpuko nutakanu.”

⁴⁵ Davi-ni potuko Rutsrukate tshinru Hoyakalu hiyáhoni hanhe rumukata Davi-ni klopicha hixleta Messias?

⁴⁶ Hike himukata hihretlu hiyáhoni waneklu kananuko hike tsru hchinikanu hepomhale hixatkalu Jesus.