Mateus 21 - Bíblia

Jesus Jerusalém Poktshi Jihlojyawaka Piranapni

¹ Waneya Jerusalém poktshi rapokpiraxinixka, Betfagé poktshi rapokastsixinixka, himriji Oliveiras tshinikowakastsi, hyokanatna hepi rasruklene.

² Wla htshinna: — Poktshi pnute hajeru nwaka hyanu. Waneya chinpotukawa hyoptotanro jumento tsatkaluro towheneymaluto. Hichotanna wanna, hanikanna wkata.

³ Seyni satu yineru hepomhiniphi haklu wla himixa waneya wla htshinanna: “Kasruklewakleru haluklu.” Ritshitanhi chinpotukawa wkata hanikanna.

⁴ Xye ptowruka wan-hixa, hpoyahokajyawakaplu ptowruka htshinyawaka Hoyakalu tokanu hinkakletatshriya:

⁵ “Wla ptshinanna Jerusalém hajene: Haha hetanru, hixa hpohire hinanwakathi mayohotu jumento yapatjitatshri, jumento whene jumento whenenni.”

⁶ Waneya hyatkana Jesus yokanrene ptowru hyokanaxyana hkamhana.

⁷ Waneya rasruklene Jesus nwaka ranikluna jumento hiyrun-koxa jumento whene. Waneya himkalna jumentonetji hoho rutakna. Waneya Jesus himkalna tuplahohota.

⁸ Hixolune yine koprakamkata hatnu hapo, hiyrunu pimrine hahmuna chehi hatnu hapo hitaka.

⁹ Waneya kosekamtatshine hiyrunu hapkatamtatshine saplewamta: — Himalwutkalurni Phuru Davi-ni whene! Kihlehchinikanuru hinatshri Tsru Hixikatshriwa pixkonuyma. Himalwutkalurni Hoyakalu tenhohne pnut-tennu hajeru.

¹⁰ Waneya Jerusalém poktshi hjihlojinixka Jesus, ptowru yine wane hajene kaheknanuwata, repomsakakna: — Katnihe xye jeji?

¹¹ Waneya hixolune rimotsane wla tshina: — Xyekni Jesus, Hoyakalu tokanu hinkakletatshrini Nazaré poktshi Galileia tshijne hajeru.

Jesus Hoyakalupji Rapkapyawaka Piranapni

¹² Waneya Hoyakalupji hjihlokamta Jesus. Hyinuwaka maleka yokanretna hichanrewatatshine hiyrun-koxa maronewatatshine. Tiyiro proji hipekotatshine mesa-kaka hiyrun-koxa kamowa henekachalu tshinanu hichanretatshine tuplawakkaka hyotkakatka.

¹³ Wla htshinna: — Wla htshina yonatkaluru Hoyakalu pirana: “Nopji hanjihohnewakapjini.” Seyni hixa katshowhurune hwiywaka hkamhiyatkalu.

Jesus Hasruklewaxyawaka Hoyakalupjiya Piranapni

¹⁴ Waneya Hoyakalupji mtsawane hiyrunu myankane yanwakaxyalu Jesus waneya rutskalhatkana.

¹⁵ Seyni tsru hixikatshinwa sacerdote-ne hiyrun-koxa kasruklewaklerune hinanchitkaluru pirana hasruklewatatshine rexinixkaluna hixo hiyakolukaka hkamhiywaka hiyrunu hjemna mturune Hoyakalupji hwatshine wla tshin-saplewjeretatshine: — Himalwutkalurni Phuru Davi-ni whene! Hiyáhoni rahkaluna Jesus.

¹⁶ Waneya repomhaluna Jesus: — Pjemnahe mturune tshinyawaka? Jesus hihitna: — Hehe, njemna. Hi he het-yonhatlu yonatkaluru potukalu wla tshinatshri: “Pyanumkakanna mturune hiyrunu hematlune himalwuru kihlewak-potuko htshinyawakna.”?

¹⁷ Waneya ruknokamtna, Betânia poktshi hya rumjiywakpatka.

Figueira Piranapni

¹⁸ Waneya yetshpotukawa, Jesus Jerusalém poktshi satokamtawa, hnatshita.

¹⁹ Waneya satu figueira-muna reta hatnu hapostsi hwatshro seyni hi kasahlu, hisurkaka tsonu reta. Waneya wla htshinru: — Hikeklu hohne psahiwatanutnaka! Waneya waneklukawa potuko riprihanatka.

²⁰ Xye rexinixkana rasruklene, rimyekahchinikanpotutna. Waneya repomhaluna: — Hanhe rixa chinpotu hiprihletanatka figueira-ni?

²¹ Waneya Jesus hihitna, wla htshinna: — Halikaka ntshinhi, halixinipa hiyrunu hi hmalixlenu hmixkanuklunupa, hi xyepka nkamhaleru pixkalutu himukata kamhaleta seyni hixa himukata wla tshinretkoxlu himriji: “Ppalnanu mar powha puknojinwa.” Waneyamka wane potuko rixanu.

²² Halixinri hanjireru hanjihohneruya hyoptoxyawaka, hyoptotanru.

Jesus Tsru Potu Hitakkalurni Piranapni

²³ Waneya pa hohne Jesus Hoyakalupji jihloka, waneya yine rasrukakanatka pchinika, tsru hixikatshinwa sacerdote-ne, hiyrun-koxa tsrukakalune judeu-ne hapokanwakatlu. Waneya repomhaluna: — Punkakanwu hanhe ruchpajya ptowutjeru xyekaka pkamhiywaka? Kathe henekyi xye tsru hitakkaluru?

²⁴ Waneya Jesus wan-tshin-hihretna: — Hit-koxa satu hepomhalu nixanhi hixa. Hihixinri xye, hit-koxa hinkakanhi hixa katu henekno xye tsru hitakkaluru xyekaka nkamhiywaka.

²⁵ Ha João h-batiz-lewaxyawaka? Hanhe ruchpajya htowutjeru, ho Hoyakalu ruchpajya ho jeji ruchpajya? Waneya hyinuwaka hiynumsakakletna wannakakluko. Waneya wla htshinkakna: — Wla wtshininri Hoyakalu, waneya repomhanunwu: “Haklu tshinanhe hi halixlu João-ni?”

²⁶ Seyni wla wtshininri jeji ruchpajya htowutjeru, nyi hixolune yine wpikanu. Klu tshinanu ralixluna João-ni Hoyakalu tokanu hinkakletatshrini rixyawaka.

²⁷ Wale tshinanu wanna wla tshina hi hima rimatna hanu ruchpajyatka wale towuwlu. Hiyáhoni Jesus wla tshinna: — Hit-koxa hi hinkakanhi hanukta ruchpajya xyekaka ntowuxijeru.

Hepi Wheneru Piranapni

²⁸ — Xawakni, kluhe hikchika hixa? Satu jeji hepi whenru. Hyanwakatlu tsrujru waneya wla htshinru: “Noturu, xawakni pkamrurewatanu nusanate uva-chaya.”

²⁹ — Waneya ruhitlu ruru: “Hi jmerno.” Seyni xekoyaka hyokmanahchinikanutatka, uva-cha hyatka.

³⁰ — Waneya rurna waneko pixka rixa towutletlu hituru hepurtshi. Seyni wale wan-tshinru ruru: “Haté wuya, papa.” — Seyni hi wane hya.

³¹ Waneya Jesus hepomhana tsru hixikatshinwa sacerdote-ne hiyrunu judeu-ne tsru hixikatshinwa, wla htshinna: — Hanurhe kamhalu ruru halujyawaka? Waneya wla htshinruna: — Hituru tsrujru. Hiyáhoni Jesus wla tshinna: — Jijhawenruklerune hiyrun-koxa kapoklewaklerone Hoyakalu pohirewaxyawaka jihlokanu hixa hkosejinna.

³² Klu tshinanu João Batista-ni hinyehithi rekhixyawakaplu powraxikowaka pirana seyni hixa hi halixatkalu. Seyni jijhawenruklerune hiyrun-koxa kapoklewaklerone halixatkalu. Waneya yáholu hexinixkalu ralixlena seyni hi hehchinikanutatka halixyawakaplu.

Hsana Kamrurewaxikatshine Piranapni

³³ — Hyijnakotanru satu yapkaklu pirana: Pa kata satu jitaklewakleru hitaklu uva-cha. H-cerca-tetlu, hiyrun-koxa hjitotlu uva katsrekjexikowaka vinho-ha hkamhiywakapa hiyrunu satu tenopjiru uva-cha hislahikowakapji hkamha. Waneya hsana hislahatshine renekamta. Waneya pa tshijne howuka hya.

³⁴ Waneya rapokpapkoluxinixka ramikolu, jitaklewakleru yokanatlu satkaka htowreru hyoptoxyawakaplu hitaklucha hislahatshine nwaka psoji jitaklewaklerunupa.

³⁵ Seyni hitaklucha hislahatshine kachitna htowrene, satu hkotshipjetluna, satni ruylatna waneya mapa rixinri htowreru hsotlujetanatkaluna.

³⁶ Waneya pimrine htowrene hyokanata mitshikananu hyokanatanune yohnika seyni wanna koxa waneko pixka rixkana.

³⁷ Waneya hnikawnaletka hituru potuko hyokanatatka. Wla htshina: “Wale hetko hkahwakpiratanna.”

³⁸ Seyni rexinixkaluna hitaklucha hislahatshine, riynumsakakna wannakakluko, wla htshinna: “Ha xyekni jitaklewakleru whene. Hayeri wuylateru. Waneyakni ptowruka ruru henejyamkaplu hixanpatka!”

³⁹ — Hiyáhoni hkachitluna kahnete ruknokluna hitaklu mwiywakanu. Waneya ruylatanruna.

⁴⁰ Hiyáhoni klunerhe hkamhinna jitaklewakleru rapojiniklunupa?

⁴¹ Waneya ruhitluna: — Runanu ruylatanunna hektune hitaklucha hislahatshinepni. Waneya pimrineko hitaklucha hislahatshine renekanu ramikolu papko hitaklu psoji renekjenepatka.

⁴² Waneya Jesus wla tshinna: — Hi he Hoyakalu pirana hexyalu xye pirana? Wla htshina: “Sotlu kpanawaklerune malukkotu rikahwakluna hepixlewatatshri potukni, psolupjiko poyehitatshrini wale. Tsru Hixikatshriwa kamhalerni hiyáhoni kihle potuklu hixa hetanuya.”

⁴³ Hiyáhoni wane ntshinhi: — Hoyakalu pohirewaxyawaka hixa hkonka, waneya pa neru renekko Hoyakalu halujyawaka kamhatshinepa.

⁴⁴ [Katupnikta xye sotlu hoho hijrukanuna rumlokanuna. Hiyrun-koxa katupnikta xye sotlu hapokhohotanu, hipahi tsonunapni.]

⁴⁵ Waneya fariseu-ne hiyrun-koxa tsru hixikatshinwa sacerdote-ne jeminixkalu Jesus, rimatluna Jesus kamnitna yapkaklu piranaya runkakletleru.

⁴⁶ Raluka kachretmakluna Jesus seyni hpikna yine klu tshinanu hkahwakluna Hoyakalu tokanu hinkakletatshri rixyawaka.