Mateus 20 - Bíblia

Uva-cha Kamrurewaxikatshine Piranapni

¹ — Tenhohne pohirewaxyawaka satu uva-cha himwatshri pixka rixa. Yetshpotukawa ruchpaka rujhana uva-cha kamrurewaxikatshinepa.

² Rasruha hixlexyawaknina ruhlepokhapkatluna pa proji prata pso wenru pa hohne kamrurtshi tshinanu. Waneya rusanate nwaka hyokanatatkana.

³ Waneya nove horas rixinixka, ruchpakamtatnaka. Hanjijexikowaka nwaka hya wane rexyana jejine mkamrurene.

⁴ Waneya wla htshinna: “Hajewa. Hix-koxa kamrurewatanutka nutakle uva-chaya. Waneya hpoyahoxyawaka pso potuko nenekanhi.”

⁵ — Hiyáhoni wane hyatkana. Waneya hanikaj-hohne hiyrunu mapa hora kayno wane hyatnaka jitaklechalu. Waneko pixka rixatkana pimrine kamrurewatatshine.

⁶ Waneya kayi sreta cinco hora rixini, wane hyatnaka. Retna pimrine wane hwatshinewa waneya repomhatkana: “Klu tshinanhe hewi hwahohnechata hike mkamhakanekhi?”

⁷ — Waneya ruhitluna, wla htshinruna: “Klu tshinanu hike kamrurewjixwu.” Waneya wla htshinna: “Hajewa hix-koxa kamrurewatanutka nusanateya.”

⁸ — Waneya kayi rixinixka susanateru wan-tshinru kamrurewatatshine hislahatshri: “Ptomhana kamrurewatatshine pwenuxyawakapna hkamrurna wenru. Hapkatatatshine pyinuwaka wenutletanu haté mitshikananu kamrurewatatshine pwenutanu.”

⁹ — Waneya satkaka cinco hora yinuwaka kamrurewletatshri yoptotlu satu proji prata kamhikaluru.

¹⁰ Waneya mitshikananu yinuwaka kamrurewletatshine kahwaklu pnuteyaka hkayatanna wanna seyni wanna koxa satu projipka hkayatna.

¹¹ Hiyáhoni hyoptoxinixkalu hkamrurna wenru, reyikatkaluna susanateru.

¹² Wla htshinna: “Nyi jejine pa hora-pka tsonu hkamrurewatna seyni hixa psol-hohneruka hameru wsalewnahohneta wanepnawaka psokakaklu wenru wyoptota.”

¹³ — Seyni susanateru wla tshinru satu wanna: “Nimatletleru, hi kmayxakahchinikanuklerno. Hi he wuhlepokotatkalu pa proji nenejyawakapyi pa hohne kamrurtshi tshinanu?

¹⁴ Xawakni panikanru pkayleru, pipji pyanu. Pkayleru pso naluk-henekletkoxlu hapkatatatshri kamrurewatatshri.

¹⁵ Hi he nalujyawaka potuko numukata kamhaleta ntiyiroteyma? Ho phahxatlu kihle nixyehixyawaklu tsonu?”

¹⁶ Hiyáhoni hixolune rapkatle hwatshine kosekanutka. Hiyrun-koxa hixolune kosekakanatatshine hapkatatanutka. [Klu tshinanu hi heppikna tshanixkalunemka tomhaka seyni hi híxona nuretkalunetka.]

Jesus Hinkaklexyawaklu Rupninri Piranapni

¹⁷ Waneya Jerusalém poktshi hyamxinixka Jesus, ranikna kahnete rasruklene waneya wla htshinatkana:

¹⁸ — Jerusalém poktshi nwaka wyamtanu. Waneya Jeji Whene tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine renekko, waneya rukolukanuwnakakanruna ruylajixanruna,

¹⁹ judeu mixkane renekko waneya reyikko, hkotshipjetko, ruylatko. Waneya map-hohne rixinri riwekanutnaka.

Zebedeu Hnunro Hanjireru Piranapni

²⁰ Waneya Zebedeu whenene hinro, towheneneyma yanwakatlu Jesus, tyoptsojityehitlu waneya pa hixanu tanjitlu.

²¹ Waneya repomhalo: — Kluhe paluka? Waneya wala wla tshinru: — Naluklu nyi hepi nowhenene punkaklexinri, satu ppotukle sreta htuplaxyawaka, satu pa sta sreta htuplaxyawaka ppohirewaxyawakaya.

²² Jesus wla tshinatkana: — Hixa hi himatlu klukta hanjita. Hixlahe himukata hirrexyalo copa salewaktshi yehi nurinropa? Waneya ruhitluna: — Wumukata.

²³ Waneya Jesus wla tshinatkana: — Halikaka, hixa hirinro copa salewaktshi yehiya seyni htuplaxyawakaplu npotukle sreta ho npastate sreta hi hitanni neneklewaxyawakapa. Xye ptaklukaka sreta hajene Nuru halpokohnaplene tshinanupa.

²⁴ Pimrine rasruklene dez jeminixkalu xye pirana, rahkanwakatna nyi hepi moletkakatshine.

²⁵ Waneya Jesus tomhana wanna ptowruneka waneya wla htshinna: — Phurune xye tshijne hajene towutjetna yine hiyrun-koxa wanna towutjene towutjetna wanna koxa.

²⁶ Seyni hixa hi wan-hixanu. Katukta hijhakalur-pira, pimrine repixanu,

²⁷ hiyrun-koxa katukta haluka towuwletanu, walepni pimrine towrerupa.

²⁸ Waneko pixka rixa Jeji Whene. Jeji Whene hi hina repixikowakapa, seyni runa repixyawakapna yine, riwejinri renejyawakapa, hixolune yine majnákonu hwenuxyawakapa.

Jesus Hitskalajyawakna Hepi Mayhalene Piranapni

²⁹ Waneya Jesus rasrukleneyma Jericó poktshi hichpajinixka, hixolune yine homkahitlu.

³⁰ Hepi mayhalene hatnu tnumne tuplatatshine jeminixkalu Jesus wane hyapamxyawaka, hsaplewatna, wla htshinna: — Tsru Hixikatshriwa, phuru Davi-ni whene, petwamonutanunwu.

³¹ Waneya hixolune hiykotna potshke rixyawakna mayhalene seyni wanna wane pnute hsaplewjepotutna: — Tsru Hixikatshriwa, phuru Davi-ni whene, petwamonutanunwu.

³² Waneya Jesus hituka, htomhana. Waneya repomhatkana: — Klunerhe haluka nkamhiywakhi?

³³ Waneya ruhitluna: — Waluklu petkajyawakwu.

³⁴ Waneya Jesus hetwamonutatkana, hkamrukayhaletna. Waneklukawa potuko retatkana romkahitatkaluna.