Mateus 2 - Bíblia

Jimatkalerune Hapojyawaka Jesus Rexyawakapa Piranapni

¹ Hmatuxinixka Jesus Belém poktshiya, Judeia tshijne poktshiko, phuru Herodes-klu papko, jejine jimatkalerune tkatshi hichpajyawaka sreta hichpajikatshine Jerusalém poktshi rapokna.

² Waneya repomhana: — Hanurhe judeu pohirnepa matutatshri? Wetlo hkatahirite tkatshi hichpajyawaka sreta hakanikatshro. Wkata wuna wimalwuxyawakaplu.

³ Seyni Herodes jeminixkalu xye pirana hkojwakahchinikanuta hiyrunu ptowruneka Jerusalém hajene kojwakahchinikanuta Herodes-yma.

⁴ Waneya repujinixkana rapatjexyawakna ptowruneka tsru hixikatshinwa sacerdote-ne hiyrunu hinanchitkaluru pirana hasruklewatatshine, Herodes hepomhana hanhe hmatuxini Cristo.

⁵ Waneya ruhitna, wla htshinruna: — Belém poktshiya, Judeia tshijne poktshiko. Klu tshinanu wane htshina yonawahleta Hoyakalu tokanu hinkakletatshri:

⁶ “Seyni pixa, Belém poktshi, Judeia tshijne hwatshriko, halikaka pixa hi mturyi judá-nerune hanikajiteya. Klu tshinanu pix-yehi ruchpajini satu Tsru Hixikatshriwa, nayinetene israel-nerune hislahatshripa.”

⁷ Waneya Herodes hepukna jejine jimatkalerune yohimawakaya waneya rimatatka Herodes wanna tshinanu klu papko potuko rakanhatka katahiri.

⁸ Waneya hyokanatatkana Belém poktshiya hyiywakapna waneya wane htshina: — Hyanu, hijhapanru mturu hihleko. Hikchijinru mturu hinkakhapkatanno, hit-koxa himukata wane yaleta nimalwuxyawakaplu.

⁹ Rali jemlexinixkaluna phuru, hyatkana. Waneya katahiri honra retakanatanruna tkatshi hichpajyawaka sreta hwatshro kosekatkana haté tutukatka mturu hohwaka.

¹⁰ Rexinixkaluna katahiri, hpoyikowpotutna.

¹¹ Rapojinixkaluna pantshi, retluna mturu runro Maria-yma. Waneya hyinuwaka hipyoklemtna tshiji, hyoptsojityehitluna, rimalwutluna mturu. Waneya hkotpukluna hkapajirna kwenur-potuko hwiywaka waneya renekluna henekachalkaka ouro, phamluhalo incenso tshinkaluro, phamluhalojpa mirra tshinkaluru.

¹² Waneya runkakkatkana jejine jimatkalerune rupnawleyna hma satkapyawakanupna phuru Herodes nwaka waneya hsatkapatkaluna htshijnena, pnu hapoko hyapatkana.

Egito Tshijne Rasujyawakna Piranapni

¹³ Hyinixkana jejine jimatkalerune waneya satu hiwejikaluru Tsru Hixikatshriwa Hoyakalu towreru tenhohne hajeru hakanhayehitlu José rupnawleya. Wane htshinru: — Hajewa, ppalnanu. Panikanru mturu, runro koxa, pasukanu Egito tshijne hyanu. Wane hitukanu haté nunkajinipyi klu tshinanu Herodes hijhapanru mturu ruylaxyawakaplu.

¹⁴ Hiyáhoni hoyetshno José palnatka ranikatkana mturu, runroymakananu waneya hyatka Egito tshijne nwaka.

¹⁵ Waneya wan-rutukatka haté rupnanatka Herodes. Hiyáhoni rakanhatka hpoyahokajyawakapa Hoyakalu tokanu hinkakletatshri, wan-tshinatshri: “Egito tshijne ntomhiyatkalu noturu.”

Herodes Tshinkaluru Hiylaxyawakna Mturune Piranapni

¹⁶ Waneya rexinixkalu Herodes hyokwijetatkaluna jejine jimatkalerune, hjihekanuwpotutatka Herodes. Waneya ruylajixanna mturunni jejinni ptowrunnika, hepi mhaleruni ruylajixa haté hepi mhale kayaholunniko ruylajixa. Belém poktshi hajenni hiyrun-koxa wanestsi hajene ruylajixa. Xye hkamhatka Herodes katahiri hakanhapiranyehixini klu papko jimatkalerune hinkajyatkalu pirana tshinanu.

¹⁷ Hiyáhoni rakanhatka hpoyahokajyawakapa Hoyakalu tokanu hinkakletatshri, Jeremias tshinkalurni, wan-tshinatshri:

¹⁸ “Ramá poktshi hjemiko tsru hima, tsru tshiyahlu jemiko, tsru wamonutshi. Raquel tshiyahamtanu twuhenene pohwaka tshinanu. Hike himukata hitshrokkakletanro klu tshinanu hnikawnanatkana twuhenenni.”

Egito Tshijne Hsatkapyawakna Piranapni

¹⁹ Waneya rupninixka Herodes waneya hiwejikaluru Tsru Hixikatshriwa Hoyakalu towreru tenhohne hajeru hakanhayehitlu José rupnawleya, José Egito tshijne rawakanaxini.

²⁰ Waneya wane htshina: — Ppalnanu, panikanru mturu, runroyma, Israel tshijne hyanu klu tshinanu wanna mturu hiylapiratatshine hipnanatka.

²¹ Hiyáhoni José palnatka ranikatkana mturu, runroymakananuko. Israel tshijne hyatka.

²² Seyni hjeminixkalu Arquelau tshinkaluru rurni Herodes-ni kachrijru hjihloka, Judeia pohire rixyawakapa pirana, José pika wane yaletatka. José hiykotka rupnawleya tshinanu Galileia-stsi hwatshri poktshi hyatka.

²³ Waneya hyatka Nazaré poktshi tshinikowaka waneko rawyawakpatka. Hiyáhoni rakanhatka htshinyawaka potuko Hoyakalu tokanu hinkakletatshine: “Nazaré hajeru htshinikowakapa.”