Mateus 19 - Bíblia

Jesus Kopruhaxyawaklu Jordão Wenne Piranapni

¹ Waneya xyekaka rali tshinrexinixka Jesus, Galileia tshijne ruchpajya, pa sreta Jordão wenne Judeia tshijnestsi hyatka.

² Hixolune yine homkahitlu waneya wane satkaka yeyixatshri rutskalajya.

Hiknokahnunrolu Piranapni

³ Waneya satkaka fariseu-ne yanwakatlu Jesus hepomhalu retumhiyluna. Repomhaluna: — Moisés hiykole pirana yonatkalurlahe hi tshipetlu jeji hhanunro ruknojyawakapa klunerujiji tshinanuktako?

⁴ Waneya Jesus wan-tshinna: — Hi he het-yonhatlu xye pirana? Hyinuwajikolu yineru hiyakotatshri hixkajyawaklu jeji suxo rixyawakna,

⁵ Waneya wla htshina: “Wale tshinanu jeji hichotlu ruru, runro, rimwiywakaplo hhanunro hiyáhoni satu manepkalu hhanunroyma.”

⁶ Hiyáhoni hi hepitkana seyni pa manepkana. Hiyáhoni hike yineru xako hitspalkakanru Hoyakalu hapatjetanune.

⁷ Waneya wla htshinna fariseu-ne: — Seyni Moisés hiykole yonatkaluru wan-tshina jeji ruchohnunroxinipa ruchoxyalo pirana yonaxikolu renekanro, hhanunro tmixyawakanpatka waneya hyokanatatkalo. Haklu tshinanhe wane htshina yonatkaluru?

⁸ Waneya Jesus hihitna: — Hixa chiko hchinikanu hixyawaka tshinanu Moisés hetachatna yine hhanunrone ruknojyawakapna. Seyni xye tshijne yinuwajikolu klu papko hi wan-rixa.

⁹ Wale tshinanu wane ntshinhi: Ruchohnunroxini jeji hapoklewlu minje tshinanu, satoko hhanunroxini rimopatatkalo.

¹⁰ Waneya rasruklene wan-tshinru Jesus: — Seyni wan-rixini jeji hhanunro tshinanu, kihle potlu hma hnunrowaxyawakanu.

¹¹ Waneya Jesus wla tshina: — Hi ptowru yineru himatjemlu xye ntshinyawaka seyni yine Hoyakalu himatjemkaklene tsonu himukata himatjemletanru.

¹² Rawa satkaka jeji mumukata hnunrowletkatu runro nanwaka ruchpajinikawa. Raw-koxa satkaka mumukata hnunrowletkatu yineko wan-hixkakleruna. Hiyrun-koxa satkaka nuretlu hma hnunrowaxyawakanu tenhohne pohirewaxyawaka tshinanu. Katukta himukata himatjemletanru, rimatjemanutkalu.

Jesus Hiyrunu Mturune Piranapni

¹³ Waneya mturunemka ranikanwakatka Jesus, hijiwna rutakamyoxyawakapa ruhlewahchinikanuxyawakna, ranjihohneyehixyawakapna. Seyni rasruklene hiykotna mturune hanikjene wane hmixyawakanupna.

¹⁴ Seyni Jesus wla tshinna: — Hetachatanna mturune hyanwakaxyawaknona. Hi himaletanna. Klu tshinanu tenhohne pohirewaxyawaka hayinetene mturune pixkalune koxni wanna.

¹⁵ Waneya Jesus mturune jiwu rali hitakamyolexinixka ruhlewahchinikanyehixyawakna, hyatka.

Jeji Phuru Piranapni

¹⁶ Waneya satu jeji hapyehitlu Jesus repomhalu, wla htshinru: — Kasruklewakleru kihleru, klunerhe kihleru nkamhanu niwejinri hikeklu hohne nma nikawniywakanupa?

¹⁷ Waneya Jesus wla tshinru: — Klu tshinanhe pepomhayehitlu kihleru? Hoyakalu tsonu kihleru hikeni hiyrunu. Moisés hiykole pirana pkamhini, piwekkakko.

¹⁸ Waneya repomhalu Jesus: — Hanuru pirana nomkahitanu? Waneya Jesus wan-tshinru: — Hi puylalewatanu, hi hapoklewatanu, hi ptshowhuwatanu, hi pimrine pweyatanu,

¹⁹ pkahwakpiratanru puru, punro hiyrun-koxa pimwastsireru pamotanu pamoxnawakwa pixka.

²⁰ Seyni jeji wla tshinru: — Xye hiykolu ptowruka nomkahita, kluneru tsonu nmaha kamhaletawa?

²¹ Waneya Jesus wan-tshinru: — Potukalumka pixinipa, puchankanru ptowruka pimwanru, penekanna ptowruka mahaxikatshine. Wane pixa pohirewnaletanu tenhohneya. Waneya punanu, pomkahitanno hita.

²² Waneya wale pirana hyijnakoxinixka phuru, hyatka hwamonuwnapotuta klu tshinanu phurupotukni.

Pohirewnalu Hma Mepixyawakanru Yineru Hoyakalu Pohirewaxyawaka Hjihlojyawaka Piranapni

²³ Waneya Jesus wan-tshinna rasruklene: — Halikaka ntshinhi, hi pa yaprenukananru phuru tenhohne pohirewaxyawaka hjihlojyawakapa!

²⁴ Hiyrunuko xye ntshinhi, kyapreru camelo tsapujripna hjihlojyawaka seyni yohnik-yapren-potlu phuru Hoyakalu pohirewaxyawaka hjihlojyawaka.

²⁵ Waneya xye hjeminixkana rasruklene, rimyekahchinikanpotuthonukna hiyáhoni repomhaluna: — Ha han-hixatshrihe xawaka hiwekkakko?

²⁶ Waneya Jesus yopukhatna, wla htshinna: — Yine mumukatanutu, wale rumukata Hoyakalu.

²⁷ Waneya Pedro wla tshina: — Petanu, ptowruka wuchota, pixa womkahixyawakatka. Kluhe xawaka wyoptotanu hixa?

²⁸ Waneya Jesus wla tshina: — Halikaka ntshinhi, ptowruka herotetkoklunuklu papko hyinuwajiniklunupa Jeji Whene towuwle royaknuyma, wale towuwlu pixkalutu nenekanhi hixa nomkahitjenhi hiyrun-koxa phuru tuplawakle htuplatanu hikolukanuwnakakanna israel-nerune doze ptohkakapni.

²⁹ Ptowru yineru hipji hichotatshri, ho runro, ho ruru, ho himolene ho himolerone [ho hhanunro,] ho hiwhenene hichotatshri ho hsana hichotatshri Hita tshinanu hyoptotanru cem kata pnute hiyrunu riwejinri hikeklu hohne mnikawnakatupa.

³⁰ Hiyrun-koxa hixolune kosekakanatatshine hapkatatanutka. Waneya hixolune rapkatle hwatshine kosekanutka.