Mateus 18 - Bíblia

Kat-pothe Hijhakaluru Hoyakalu Pohirewaxyawakaya Piranapni

¹ Waneklu papko Jesus hasruklene yanwakatlu Jesus, waneya repomhaluna, wla htshinna: — Katnihe hijhakalur-potu tenhohne pohirewaxyawaka tshinanu?

² Waneya satu mturu hkachita Jesus, hyopkakkaklu wanna hanikajite.

³ Waneya wla htshina: — Halikaka ntshinhi, mturune pixka hma mixkanuklunu, hikeklu hohne tenhohne pohirewaxyawaka hjihlokanu.

⁴ Hiyáhoni katukta mujhakotu hikahwajnawa xye mturu pixka, walekni hijhakalur-potu tenhohne pohirewaxyawakaya.

⁵ Hiyrun-koxa katukta hihle yoptoletlu xye mturu nhiwaka tshinanu hit-koxa hyoptotanu.

Himtuwna Halixlekakatshri Piranapni

⁶ — Seyni katukta himtuwna halixlekakna nalixjene mtserkakanewa, kihlepotmaklu tsru sotlu rostunojixikowaka waneya mar powha ruknojikowaka.

⁷ Hektupotna rixje yine xye tshijne hajene hektuwkakatshine. Hi rumukata himaletkota hitspetkalurukaka. Seyni hektumkalu wale yineru kojwakahchinikanrewatatshri!

⁸ Pimyo ho pijixi tshinanu pumtuwnini, pkastakanru, puknokanru. Klu tshinanu kihlepotmaklu mtsoji ho myape hiwekkakko, hepi myolu ho hepi jixiru tshitshmero hikeklu hohne mnikawnakatupa hiknokko.

⁹ Hiyrun-koxa piyhale tshinanu pumtuwnini, pkochpakanru, puknokanru. Klu tshinanu kihlepotmaklu pa yhalepkalutu hiwekkajikowaka, hepi yhaleru tshitshmero hiknokko.

Ovelha Pupjetatshro Piranapni

¹⁰ — Xako hi heyikanru satu nyi mturune klu tshinanu wane ntshinhi, hiwejikalune Hoyakalu towrene tenhohne hajene wanna tshinanu psol-hohneko rethojitluna Nuru tenhohne hajeru.

¹¹ [Klu tshinanu Jeji Whene xye tshijne hinatka riwekkajyawakaplu pupjetatshri.]

¹² — Klu hkahwaka hixa? Satu jeji cem ovelha rimwini seyni sato ramtajini, hi he pimri hiprane noventa e nove, ruknokamtanu kahnete poktshi rujhapyawakaplo pupjetatshro?

¹³ Waneya rukchijiniplo ovelha hamhakanatatshro, hpoyikowpotuta. Halikaka ntshinhi, wale himuwpotuta wala hamhakanatatshro tshinanu, pimri hiprane noventa e nove mamhakane pnute rukchijyawaklo tshinanu.

¹⁴ Waneko pixka rix-koxa Hirtshi tenhohne hajeru, hi raluklu satu mturu hamhiywaka.

Hanu Rixa Hepixletka Moletkakatshri Hektuntshi Hwaleru

¹⁵ — Satu pimole himtuwnayehixinipyi, pyanwakatanru pekhixyawakaplu rektunu. Seyni pixa tsonu wane yanu hiyáhoni hixapkapatkani, wale hiyrunu pixa. Waneya hyijnakoxinipyi, pukchikmoletatka psatkaklu pimole.

¹⁶ Seyni hma yijnakotkanuklunupyi, waneya ho satu ho hepi yineru pixayma panikanu, pkamhiywakaplu Hoyakalu tokanu tshinyawaka, wla tshinatshri: “Hepi ho mapa yine hektutu hiphujetatshine tokanu hpoyehixika ptowru piranako.”

¹⁷ Seyni hma yijnakotkanuklunupna wanna koxa, punkakanna hapatjetatshine. Hapatjetatshin-koxa hi hyijnakoxini waneya judeu mixkatu ho jijhawenrukleru pixka pikahwakanru.

¹⁸ Halikakni ntshinhi: — Klunerukta pimaletanu xye tshijneya, Hoyakalu himaletanru tenhohneya. Hiyrun-koxa klunerukta pitshitanu xye tshijneya, Hoyakalu hitshitanru tenhohneya.

¹⁹ — Hiyrun-koxa wane ntshinhi: Yáholu hepi yineru xye tshijne hajenhi pa hchinikanurune hixa hanjirexinru, Nuru tenhohne hajeru kamhanru hixa tshinanu.

²⁰ Klu tshinanu hanukta rapatjexyana hepi ho pnute yine nhiwaka tshinanu, wane koxno Hita.

Hi Pejnu Kata Nujhalu Namtakahchinikanuxyawakanru Nomole Piranapni

²¹ Waneya Pedro yanwakatlu Jesus repomhiywaklu, wla htshinru: — Tsru Hixikatshriwa, hi pejnu kathe namtakahchinikanyehitanru nomole hita nwaka hektutu kamhatshri? Haté sete katlahe namtakahchinikanyehixinri?

²² Jesus hihitlu, wla htshinru: — Wane ntshinyi, hi sete katapka tsonu pamtakahchinikanyehixinri seyni setenta kata sete kata pamtakahchinikanyehixinri.

Hepi Towrertshine Deve-tatshine Piranapni

²³ Klu tshinanu tenhohne pohirewaxyawaka satu phuru pixka rixa, conta-kaka haluk-hihleretatshri.

²⁴ Waneya mitshikananhapka, satu htowreru hix-potuko proji deve-tatshri phuru nwaka ranikka.

²⁵ Hma mumukata wenutlexyawaklu tshinanu, phuru hichankakjixlu deve-tatshri ptowru rimwaleru haté jeji ruchanjiynawakwa, hhanunro hiyrunu hiwhen-koxa ruchankakjixlu rumukata wenutlexyawaklu h-deve-leru.

²⁶ Waneya deve-tatshri yoptsojitamta wale sreta, hipokananu ranjitlu, wla htshinru: “Pkahwakayakatanutshi, pa hohne psoluka n-deve-leru nwenutanyi.”

²⁷ — Hiyáhoni phuru hetwamonutatkalu, ruchya-conta-tetlu, waneya ruchotatkalu.

²⁸ Seyni ruchpajini wale jeji, hyoptotlu satu kamrurtshi repirexinri. Wale jeji hi hixo proji deve-tlu. Wanepnawaka hkachiplatanru, hkowchiwjitlu, waneya hwenutjixlu wla htshinru: “Pwenutanno p-deve-xyano!”

²⁹ — Waneya deve-tatshri yoptsojityehitlu, hipokananu ranjitlu, wla htshinru: “Pkahwakayakatanutshi, pa hohne psoluka n-deve-leru nwenutanyi.”

³⁰ — Seyni hi raluka wan-hixleta. Hiyáhoni hyatka, preso rutakjixlu haté rumukata wenutletlu h-deve-leru psoluka.

³¹ Seyni pimrine towretshine hexiniklunru, rimyekahchinikanutna. Waneya phuru nwaka hyatkana psoluka runkaklexyawakapna.

³² Waneya phuru tomhalu towrertshi h-deve-tjeru, wla htshinru: “Hektutu kamhatshriyi! Hipokananu panjixyawakno tshinanu p-deve-leru psoluka nuchyata.

³³ Hi he pix-koxa hijhalu petwamonuxyawaklu p-deve-tjeru hita pixka?”

³⁴ — Hiyáhoni phuru jihekanuwpotuta. Preso rutakjixlu hsaletpotuxyawakapluna haté rumukata wenutletlu h-deve-leru psoluka.

³⁵ Waneko pixka rixanu Nuru tenhohne hajeru himole hektunu hma mamtakahchinikanyehitkanuklunupa halikaka.