Mateus 17 - Bíblia

Jesus Pnuko Hixamanexyawaka Rasruklene Hetanu Piranapni

¹ Waneya pa semana pnutejiji hiknohatka Jesus, Pedro, Tiago, hiyrunu repuru João ranika. Satu mriji tenolu hkankatkana wannapkatkani.

² Waneya Jesus yokmanhojitatka. Katajhojru tkatshi pixka. Himkal-koxa klata, klat-potuko rixa katalu pixka.

³ Waneklukawa potuko hepi jejine hakanhatka, satni Moisés-ni tshinkalurni, satni Elias-ni tshinkalurni. Riynumsatluna Jesus.

⁴ Waneya Pedro wan-tshinru Jesus: — Kasruklewakleru, kihleru wiko wwiywaka. Hayeri wkamheru mapa pantshi; satu pixanupa, satu Moisés-nupa, satu Elias-nupa.

⁵ Wane htshinakanaxiniwa hohimkohi hichyatna. Waneya hohimkohi hitokote ruchpajyatka tokantshi wla tshinatshri: — Xyekni nowhene nalukleru. Hyijnakotanru hanukta htshinanhi!

⁶ Tokantshi hjeminixkana, tsru hpiklena tshinanu tshiji rutspakhojitna.

⁷ Seyni Jesus yanwakatna, hkamrutna waneya wla htshinna: — Hyopkakanu. Hike hpikanu.

⁸ Waneya teno hyihaxinixkana, hikeko retna seyni Jesus tsonu.

Elias-ni Hapojinri Piranapni

⁹ Waneya himriji hserpijinixkana, Jesus hijretna, wla htshinna: — Hetakanatanru xako hike hinkakanu haté hma miwekkanuko pchini Jeji Whene hipuktshiya.

¹⁰ Waneya rasruklene hepomhatkalu: — Klu tshinanhe kasruklewaklerune hinanchitkaluru pirana hasruklewatatshine wan-tshina Elias hapka hapokanu?

¹¹ Waneya Jesus wan-tshinna: — Halikakni, Elias hapokanu ruhlexyawakaplu ptowruko.

¹² Seyni wane ntshinhi Elias hapokatka seyni hi rimathetluna seyni ptowruka raluk-hixlexyawakluna rixatkaluna. Waneko pixka rixanu Jeji Whene, hsalewnanu wanna tshinanuya.

¹³ Waneyatka rasruklene himatjematkalu, himka Elias pirana runkakleta seyni João Batista-ni pirana halikaka runkakleta.

Jesus Mturu Kamtshite Hakajyawaka Piranapni

¹⁴ Waneya hixolune yehi rapojinixkana, satu jeji yanwakatlu Jesus, hyoptsojityehitlu, wla htshinru:

¹⁵ — Tsru Hixikatshriwa, petwamonutanru noturni. Rupukalewahchinikanjexyawaka tshinanu hsalewnapotut-honuka. Tshitshmero hoho hyawnajeta hiyrunu rujrukhajeta.

¹⁶ Pasruklene nwaka nanikatkalu seyni hi rumukata hiskalakletluna.

¹⁷ Waneya Jesus wan-tshina: — Malixaklenhi, hektutu kkamhaklerunhi xyeklu papko hwatshinhi. Haté hi pejnu hohnekta nimwanhi hixa? Haté hi pejnu hohnekta nakotanhi? Waneya wla htshinru tsru: — Wkata panikanru pituru.

¹⁸ Waneya Jesus towutlu kamtshi mturu ruchpajyawakapa hiyáhoni kamtshi hichpakatka, waneklukawa potuko mturu hitskalhatka.

¹⁹ Waneya rasruklene yanwakatlu Jesus, wannapka rixinixkana, repomhanruna, wla htshinruna: — Klu tshinanhe hi wumukata hiknokletlu kamtshi?

²⁰ Jesus hihitna: — Klu tshinanu hmalixlenu tshinanu. Halikaka ntshinhi, mostarda-tataji pso rixiniklunu halixle waneya himukata xye himriji wla tshinreta: “Wane puchpajini, klanu pyanu.” Waneyamka wane potuko rixanu. Hikemkapni hma mumukatanutu.

²¹ [Seyni xye pixkalutu hi hiknokka, hanjihohneru hiyrunu hohajirewlu tshinanu tsonu.]

Jesus Hinkaklethnapuxyawaklu Rupninri Riwejinixnaka Pirana Hiyrunukotnaka Piranapni

²² Waneya Jesus hiyrunu rasruklene hapatjexinixka, wla htshinna: — Jeji Whene tshinkaluru yine renekko.

²³ Ruylatanruna seyni map-hohne rixinri riwekkakkotka. Waneya rasruklene wamonuwnapotutatka.

Hoyakalupji Hijhawenre Hwenuxyawaka Jesus Piranapni

²⁴ Waneya Jesus rasrukleneyma Cafarnaum poktshi hapojinixka, Hoyakalupji jijhawenruklerune yanwakatlu Pedro waneya repomhaluna: — Hi he pasrukjeru wenutanru Hoyakalupji hijhawenre?

²⁵ Waneya Pedro hihitna, wla htshina: — Hehe, hwenutlu. Waneya pantshi hjihlokamxinixka Pedro, Jesus hapka yanumatatka, wla htshin-hepomhaletlu: — Kluhe pukchika pixa, Pedro? Kathe hijha wenutletlu hijhawenuxikolu xye tshijne phurute tshinanu? Ho wale tshijne hajene ho pa tshijne hichpajikatshine?

²⁶ Waneya Pedro wan-tshin-hihretlu: — Pnu tshijne hichpajikatshine wenutna. Waneya Jesus wla tshinru: — Hiyáhoni wale tshijne hajene hi wenutlu hijhawenuxikolu.

²⁷ Seyni wma jihejyawakanupna nyi yine, hipowha pyanu, pkowtshohtapanu. Waneya mitshikananu pkachrero chima, pkohreknamatanro waneya pukchikanro tiyiro proji prata kamhikolu hixanu wujhawenuxikolu poyaho wenutlexyawaka pso. Waneya tiyiro proji panikanu, pwenutapanru wujhawenuxikolu hita tshinanu hiyrunu pixa tshinanu.