Mateus 16 - Bíblia

Hetkalurkaka Ranjixyawakna Yine Piranapni

¹ Waneya satkaka fariseu-ne hiyrunu satkaka saduceu-ne yanwakatlu Jesus retumhiywakapluna. Ranjitluna satu hetkaluru Hoyakalu pixkonu tshinanuya hkamhiywakapa.

² Seyni Jesus wla tshina: — Kayi rixinixka, wla htshina: “Kihle hohnehetkoplu klu tshinanu tenhohne sero kaynolu.”

³ Waneya yetshpotukawa wla htshina: “Hinhetkopatkani klu tshinanu sero hohneru, hiyrunu mapchahlu.” Tenhohne hyihaxini hixa himathetlu ho kihle hohneplu ho hike seyni hi himathetlu xye hohnekaka hetlerutka hanu rixa.

⁴ Xyeklu papko hiwekatshine hektutu kamhatshine potu, Hoyakalu tokanu majnakowaxikatshine hanjitmaklu. Seyni hi satukna hetkaluru rekhitkona seyni Hoyakalu tokanu hinkakletatshrini, Jonas tshinkalurni hetkalurutepka rekhitkona pa hohne. Waneya Jesus hiknokamtna, hyatka.

Fariseu -ne Hiyrunu Saduceu -ne Tserutjeru Piranapni

⁵ Waneya pa sreta wnahlu rapojinixkana, pão hi ruchinik-hanikletna.

⁶ Waneya Jesus wan-tshinna: — Xako fariseu-ne hiyrunu saduceu-ne tserutjeru.

⁷ Waneya rasruklene yinuwaka hihjekakleta wannakakluko, waneya wla htshinna: — Wale wan-tshina klu tshinanu pão hi wanikatka.

⁸ Seyni Jesus yijnakotna htshinyawakna waneya repomhana: — Hixa pso halixle jijirunhi, klu tshinanhe hihjekaka pão hma manijyawakanu tshinanu?

⁹ Hi he himatjemawalu? Hi he hichiniklu hanu nixa hohluretna cinco mil yine cinco pão-yma? Hi pejnuhe chiwatu htsepota nijittshi hixetatshrini?

¹⁰ Ho hanu nixa hohluretna quatro mil yine sete pão-yma? Hi pejnuhe chiwatu htsepota nijittshi hixetatshrini?

¹¹ Hi he himatjema pão pirana hi nkochtsheka? Seyni xako fariseu-ne hiyrunu saduceu-ne tserutjeru.

¹² Waneklu rimatjematkaluna Jesus hijretna fariseu-ne hiyrunu saduceu-ne hasruklewle pirana tshinanu klu tshinanu rasruklewlena tserutatshri pão hitakkaluru pixka rixa, psolujpako hchitshponkaka.

Pedro Jesus Hiphujtaxyawaka Piranapni

¹³ Waneya Cesareia de Filipe poktshistsi rapojinixka Jesus, rasruklene repomha: — Kathe rikahwakluna yine Jeji Whene tshinkaluru?

¹⁴ Waneya ruhitluna, wla htshinruna: — Satkaka yineru wan-tshina pixa João Batista-yi; satuko wan-tshina Elias-yi; satuko wan-tshinyi pixa Jeremias tshinkaluryi ho satu mitshikawni Hoyakalu tokanu hinkakletatshriyi.

¹⁵ Waneya Jesus hepomhana: — Ha hixa, kathe hkahwakno?

¹⁶ Waneya Pedro hihita: — Pixni Messias-yi, Hoyakalu hiwekatshri whenyi.

¹⁷ Waneya Jesus wan-tshinru: — Poyikowatatshripyi, Simão, João whene. Klu tshinanu xye pirana hi yine hekhityi seyni Puru tenhohne hajeru hiphujetlu.

¹⁸ Hiyáhoni nunkakyi: Pixni Pedro-yi. Hita halixatshine xye sotlu hoho panawaxikatshinepni. Hiyrunu hipuktshi himukatle hi himukata halliretanru.

¹⁹ Tenhohne pohirewaxyawaka yohpukapre nenekanyi pixa. Klunerukta pimaletanu xye tshijneya, Hoyakalu himaletanru tenhohneya. Hiyrun-koxa klunerukta pitshitanu xye tshijneya, Hoyakalu hitshitanru tenhohneya.

²⁰ Waneya Jesus towutna rasruklene hike hma munkajyawakanuplu Messias rixinri pirana.

Jesus Hinkaklexyawaklu Rupninri Hiyrunu Riwejinritnaka Pirana

²¹ Wale hohnekananuko Jesus yinuwaka hinkakletna rasruklene Jerusalém rujha yalexyawaka pirana hiyrunu hsalewniywaka hixo pa hixanu tshinanuya pirana tsrukakalune judeu-ne hiyrunu tsru hixikatshinwa sacerdote-ne myoya, kasruklewaklerune hinanchitkaluru pirana hasruklewatatshine myoy-koxa. Hiyrun-koxa ruylatko seyni map-hohne rixinri riwekanutnaka pirana.

²² Waneya Pedro haniklu Jesus kahnete, hyinuwaka hiykoletlu. Waneya Pedro wla tshinru Jesus: — Hikeklu, Tsru Hixikatshriwa! Wale hikeklu hohne rakanhayehitanyi!

²³ Waneya Jesus hiprotakanwakatlu, wla htshinru: — Pasujinno, Satanás pixkalutu. Nutspekakjermakyi; pixa hi Hoyakalu hchinikanu pimwa seyni jeji hchinikanu halikaka pimwa.

Jesus Homkahitatshri Haluklu H-cruz-te Rutaykopixyawaka Piranapni

²⁴ Waneya Jesus wla tshinna rasruklene: — Satu yineru haluk-homkahrexinno, rujhanru wale ralujyawaka ruchoxyawaka, rutaykopitanru h-cruz-te waneya romkahitanno hita.

²⁵ Klu tshinanu katukta haluk-hiwekkakletanru riwejinri, ramtakanru riwekle; seyni katukta hita tshinanu hamtakanru riwekle riwekanu.

²⁶ Hanhe rixa hepixletlu yineru xye tshijne hihlenu psoluka hkayaxiniklunu seyni riwejinri ramtakanuna? Kluhe xawaka ripekotanru satu jeji riwejinri tshinanu?

²⁷ Klu tshinanu Jeji Whene hiyrunu hiwejikalune htowrene tenhohne hajene hapokanu Hoyakalu hoyaknuyma. Waneya renekanru satkaka yineru hkamrure wenru.

²⁸ Halikaka ntshinhi, satkaka hewi hajeru hma mupnaknukawa, retanru Jeji Whene hapokatshritka waleko hpohirewaxyawakaya.