Mateus 12 - Bíblia

Jesus Hapnanuxikalur-hohne Hitsrukate Rixyawaka Piranapni

¹ Waneya howukchini hapnanuxikalur-hohnetkani hsana hyapakanatna Jesus rasrukleneyma. Rasruklene natshitatka hiyáhoni hyinuwaka jimlakhawletluna. Waneya hniktatajitluna.

² Fariseu-ne hetakanatna hiyáhoni fariseu-ne wan-tshinru Jesus: — Petanu. Haklu tshinanhe wan-rixna hapnanuxikalur-hohne hinanchitkalur-hohne?

³ Waneya wane htshinna Jesus: — Hikeklu hohnehe het-yonhatlu Davi-ni pirana, hnatshixini waleni hiyrun-koxa waleymalune?

⁴ Davi-ni jihloklu Hoyakalupji, hniklu pão-kaka Hoyakalu henekachalurupa. Wale hinanchitkaluru hnikni. Sacerdote-ne tsonu himukata nikletanru hnikni. Seyni Davi-ni niklu hiyrunu rimotsatanun-koxa reneklu hnijyawakapluna.

⁵ Hikeklu hohnehe het-yonhatlu xye pirana koxa Moisés yonreya? Sacerdote-ne koxa Hoyakalupji kamrurewjexya hapnanuxikalur-hohne hiyáhoni hmajnakoxyalu Moisés hiykole yonatkaluru seyni hi jikolukanurunni.

⁶ Seyni halikaka xawakni satu hapokatka Hoyakalupji yohnik-hijhakalurni.

⁷ Himatjeminimkalu Hoyakalu tokanu wla tshinatshri: “Naluklu hetwamonrewlu, hi henekachlu yoxikkaluru naluka”. Himka rukolukanuwnayehjixanna mukolukanuwnakanepni.

⁸ Klu tshinanu hapnanuxikalur-hohne hitsrukatekni Jeji Whene.

Jesus Hitskalajyawaklu Hiprihamyotatshri Piranapni

⁹ Waneya Jesus wane hichpajyatka, satu hanjihohnewakapji hyatka.

¹⁰ Wane rawakanata satu jeji hiprihamyotatshri. Waneya satkaka wane hwakanatatshine haluk-hikolukanuwnakakletlu Moisés hiykole tshinanu. Wale tshinanu wla htshin-hepomhaletluna Jesus: — Ritshitkahe yineru satu rutskalajyawaka hapnanuxikalur-hohne?

¹¹ Waneya Jesus hihitna, wla htshina: — Ha hixa, hipra carneiro kapna hijrujini hapnanuxikalur-hohne, hi he kapratu ptowruka kamha kapna hkochpajyawakaplu?

¹² Seyni yineru carneiro yohnik-hijhakalurni! Hiyáhoni Moisés yonreru hitshitlu wepixkajyawaka hapnanuxikalur-hohne.

¹³ Waneya Jesus wan-tshinru jeji: — Pyosurukkanotanu. Waneya hyosurukkanotatka, ruhlewamyotatka, himyo pomtalu pixka rixatka.

¹⁴ Hiyáhoni wane ruchpakamxyana fariseu-ne waneya rujhahchinikanutatkana wannakakluko hanu rixa himukata hiylaletluna Jesus.

Jesus Hoyakalu Towreru Nuretkalurni Piranapni

¹⁵ Xye pirana rimaxinixka Jesus, wane ruchpajyatka. Hixolune yine homkahimtlu hiyrunu rutskalakna yeyixatshine.

¹⁶ Waneya Jesus hijretna hike hmunkajyawakanupna katni wale.

¹⁷ Wan-rixa hpoyahokajyawakaplu Hoyakalu tokanu hinkakletatshrini Isaías-ni tshinyawaka, wla htshinni mitshi:

¹⁸ “Xyetkani ntowreru nuretkaluru, namotleru, wale poyikowkakno. Niwejinri pixkonu nenekanru, Hoyakalu hapnokatlewle hapojinri pirana runkakletanu psol-tshijneyako.

¹⁹ Hi hyanhaklewatanu, hi hsaplewjetanu, hike yijnak-tokanutanru tsru poktshikakaya.

²⁰ Katsluksu hichtshokatshri hi himlakanu, hiyrun-koxa lamparina mtserumerojijitu hi ruwakanu, hpaklutawa haté hikolukanuwnalu kayaxini potuko.

²¹ Wale hiwaka tshinanu ptowru tshijne hajene munanhanru riwekkajyawakapna.”

Jesus Hiyrunu Belzebu Tshinkaluru Piranapni

²² Waneya satu jeji ranikanwakatluna Jesus, metkatu hiyrunu myanumatkatu klu tshinanu kkamtshiterni. Jesus hitskalakatkalu, retatnaka hiyrun-koxa hyinuwaka yanumletatka.

²³ Hiyáhoni wane hwakanatatshine himyekahchinikanutatka, waneya repomhana: — Davi-ni whenrahe xye jeji?

²⁴ Seyni fariseu-ne wale hjeminna wane htshinna: — Kamtshi pohire Belzebu tshinkaluru himukatleyma tshinanu hetko maleka ruknokna kamtshine.

²⁵ Seyni Jesus himathetahchinikanutna hiyáhoni wane htshinna: — Ptowru tshijne rawa nikawnatshripa, pa hchinikanurutu hmixlenu tshinanna wane tshijne hajene. Hiyrun-koxa ho poktshi hajene ho pantshi hajene wannakakluko pnu pejnu rixahchinikanutna hi rumukata hwachaletna.

²⁶ Hiyáhoni Satanás kamtshi hkamnixiniklunwa pnuko rixahchinikanuxinwana Satanás hayinetene hanhe rumukata pnute yaletanu htowuwle?

²⁷ Hixa wan-tshinno Belzebu himukatleyma maleka nuknokna kamtshine. Hiyrun-koxa Belzebu himukatleyma maleka nuknokamkana kamtshine ha hixa hiwhenene katu hiwakaymahe kamtshine maleka ruknokjekanatna, kat-mixkonu tshinanu wan-rixna? Hiyáhoni hixako hwuhenene hikolukanunhi.

²⁸ Seyni Hoyakalu Hiwejikaluru towre tshinanuko kamtshine maleka nuknoka, hiyahokni himatanu Hoyakalu pohirewaxyawaka hix-yehi rapokatka halikaka.

²⁹ — Yineru hi himukata jihlokletlu satu jeji hixkolupji htshowhuxyaplu rimwaleru hma mostuhapkatkanuklunru hixkolu. Waneklu tsonu rumukata tshowhuretlu hipji hajeru.

³⁰ — Hiyáhoni hita nmepixjetu, waleni nkamnitjeru. Hitayma mapatjetkatu, hkotspallewata.

³¹ Wale tshinanu wane ntshina: Ptowru hixatshri hektuwaka Hoyakalu mukchikhihlenreru hkamhini yineru, ptowru hixatshri hektutu htshinanwakaxiniplu Hoyakalu, ramtakahchinikanuxiko rektunu. Seyni katukta hektutu tshinanwakaxiniplu Hoyakalu Hiwejikaluru hikeklu hohne ramtakahchinikanyehitkona rektunu.

³² Katuktako hektuwaka htshinanwakatlu Jeji Whene tshinkaluru, wanepnawakatshi ramtakahchinikanuxiko rektunu. Seyni katukta hektutu tshinanwakaxiniplu Hoyakalu Hiwejikaluru walepni hikeklu hohne ramtakahchinikanyehitkona rektunu, hi xawakni hohneko, hi wale hohne hinatshripako.

Hahmuna Hiyrunu Hisahi Hyapkakleta Jesus

³³ — Kihle sahiru hijhalu hahmuna kihleru. Hahmuna hektutu hi kihle sahiplu. Klu tshinanu ptowru hixatshri hahmuna pejnu rimathetka hisahi tshinanu.

³⁴ Himnu kamaklewatatshri pixkalunhi! Hixa hike kihleru himukata tshinreta hektutu hixyawaka tshinanu. Klu tshinanu namtshi yanumaxyalu hix-potu raji hajeru.

³⁵ Jeji kihleru, kihleru hkamha kihleru hihchinikanu rimrexinri tshinanu. Hiyrunu jeji hektutu, hektutu hkamha, hektutu rimretleru tshinanu.

³⁶ — Seyni wane ntshinhi hixa, hapnokaxikolu hohnepa ptowru yineru htokanu hyanumsachaxinriko hikolukanunhi Hoyakalu yehiya.

³⁷ Klu tshinanu htokanu tshinanu hpowratko ho htokanu tshinanu hikolujinwa.

Yine Hanjixyawaklu Hetkaluru Piranapni

³⁸ Waneya satkaka kasruklewaklerune hinanchitkaluru pirana hasruklewatatshine hiyrun-koxa satkaka fariseu-ne wan-tshinru Jesus: — Kasruklewakleru, walukyi pixa satu hiyákolu pkamhiywaka.

³⁹ Waneya Jesus hihitna: — Xawakni hiwekatshine hektutu kamhatshine potu, Hoyakalu tokanu majnakowaxikatshine hanjitmaklu satu hetkaluru seyni satu hetkalurupka tsonu nekhitanhi. Hoyakalu tokanu hinkakletatshrini, Jonas tshinkalurni Hoyakalu henejyalu hetkaluru tsonupka nekhitanhi.

⁴⁰ Jonas map-hohne, map-yetshno tsro chima nanwaka rawakanata hiyáhoni waneko pixka rixko Yineru Whene map-hohne, map-yetshno tshiji hitokote rawanu.

⁴¹ Hapnokaxikolu hohne hapojinipa Nínive hajene yotunotanu rukolukanuwnakakanhi hixa xawakni hiwekatshinhi klu tshinanu wanna hehchinikanutatka Jonas hiykole tokanu hjeminixkana. Xyekni hixa hetanu Jonas yohnik-himukatatshri.

⁴² Tsro phúroni sul sreta tshijne hajéroni howuk-tshijne tuchpajyani phuru Salomão-ni hasruklewle himatkalnu tjemyawakapa. Hiyáhoni jemahchinikanrewlu hohnepa tukolukanuna xye papko hiwekatshinepni. Haha hetanu, hewiru satu Salomão-ni yohnika kpohiru.

Hanu Rixyawaka Kamtshi Piranapni

⁴³ — Kamtshi yineru mane ruchpakamxini, hyanachata, popriwaka hyapachata. Rujhalu rapnanuxyawaka seyni hi rukchiklu.

⁴⁴ Hiyáhoni wla htshina: “Nopjitapyawaka nsatokanutnak-honuka.” Waneya rapoka. Rukchiklu satolotkaluru, hihlepokoluru.

⁴⁵ Hiyáhoni wla rixa. Hya waneya ranikna pimrine waleyma sete-ne kamtshine wale yohnik-hektunu kamhatshine. Hjihlokna, wane rawna. Ralipretka rallikanatatka xye jeji rekamtshitewle pnute. Waneko pixka rixanu xyeklu papko hwatshine hektune.

Jesus Hayinetene Piranapni

⁴⁶ Hixolune yine runkaklewyehixiniwa Jesus, runro hiyrunu repurune hapokatka. Maleka rawna, raluk-hiynumsaletluna.

⁴⁷ Waneya satu wan-tshinru: — Petanu, punro pepurun-koxa maleka rawna. Raluk-hiynumsaletyina.

⁴⁸ Waneya Jesus wan-tshina: — Katnihe nunro hiyrunu nomolene?

⁴⁹ Waneya rasruklene hyokhinwakata, waneya wla htshina: — Haha hetanu, hewitkana nunro hiyrunu nomolene.

⁵⁰ Klu tshinanu Nuru tenhohne hajeru halujyawaka kamhatshine wannani nepuru, nepuro, nunro.