Mateus 11 - Bíblia

Jesus Hinkaklewaxyawakapa Pa Poktshikakaya Piranapni

¹ Jesus hali towutlexinixkana rasruklene, wane ruchpajya rasruklewaxyawakapa, runkaklewaxyawakapa pa poktshikakaya.

João Batista Yokanaxyawakna Rasruklene Jesus Nwaka Piranapni

² Waneya preso rawinixka João jempiranyehixinri Cristo tshinkaluru kamrure, rasruklene hyokananwakatlu wale,

³ repomhiywakapluna, wla htshin-hepomhaletluna: — Pixakatkalhe hinatshripyi tshinkaluryi ho satuklatshi wkahwakanu?

⁴ Waneya Jesus wla tshinna: — Hajewa. Hinkakapanru João xye hetanrukaka hiyrun-koxa hyijnakotanrukaka.

⁵ Mayhalenekananu hetatka. Myankanekananu yanatka. Hijirhitukanatatshine hitskalhatka. Majnakonekananu jema. Hipnatshine hiwekkakka. Kihle piranalu potuko hiwekkaklewatatshri pirana runkakkatkana hike mwikane.

⁶ Poyikowatatshine hita nma mohweyatjene.

Jesus Hinkaklexyawaklu João Batista Pirana

⁷ João hasruklene hichpajinitka, Jesus João pirana hyinuwaka hinkakletna hixolune yine wane hajene, wla htshinna: — Ha hixa, kluhe haluk-hetletapa kahnete poktshiriya? Kotshkawale kanniphalu kowchiklerlahe hetapa?

⁸ Ha klunerhe hetapa? Satu Jeji kihleru mkatshri hitakatshrirhe hetapa? Hike, kihleru mkatshri hitakjetatshine, honra phurupjikaka rawna wan-hixatshine.

⁹ Seyni klunerhe mitshi haluk-hetletpatka? Satu Hoyakalu tokanu hinkakletatshrihe hetapa? Hehe, wane ntshinhi, Hoyakalu tokanu hinkakletatshinni yohnik-hijhakaluru hetpatka.

¹⁰ Klu tshinanu João yonpiranyehitkalurni xye: “Hetanu, nyokanreru nyokanatanu pixa hnapu, ralpokohnapuxyawakaplu patnu hapote.”

¹¹ Klu tshinanu wane ntshinhi João Batista ptowru matutatshri yohnik-hijhakalurumkani. Wanepnawaka mujhakon-potu tenhohne pohirewaxyawaka hwatshine, João yohnik-hijhakalunetkani wanna.

¹² João Batista yinuwaka hinkaklexinri papko haté xawakni, tenhohne pohirewaxyawaka kamnitka hiyrun-koxa jejine mixkowatatshine haluka yotkakletlu.

¹³ Hma munkaklewatkanuklunuwa João, Moisés yonreru pirana hiyrun-koxa Hoyakalu tokanu hinkakletatshinni pirana yonatkaluru hinkakletlu Hoyakalu pohirewaxyawaka pirana.

¹⁴ Waneya haluka yoptolexiniplu walekni Elias tshinkalurni hinatshripa.

¹⁵ Katukta kajnakopnapa hyijnakoxyawaka, hyijnakotanru.

¹⁶ — Kluneru pirana nyapkakletanna xyeklu papko hwatshine? Wanna hetko mturune niktshi hanjijexikowaka tuplajetatshine pixka rixna. Pa sreta tuplatatshine wan-tshinna pa sreta tuplatatshine:

¹⁷ “Wtumlejyehithi poyikowlu hima seyni hi hahsat-hixa. Kwamonuru himamka wchikaletatka seyni hi htshiyahatatka.”

¹⁸ Hetanu. João Batista hohajirewata, hi vinho-ha rura seyni hixa wan-tshinru: “Waneylu kamtshi.”

¹⁹ Runa Jeji Whene tshinkaluru. Hnika, rura. Seyni hixa wan-tshina: “Haha hetanu, xye jeji tsru nikalu, vinho-ha jirakleru. Jijhawenruklerune hiyrun-koxa hektune rimatleta.” Hiyáhoni yine hetanru Hoyakalu himatkalewle potukalu rixyawaka, Hoyakalu himatkalewle himwatshri kamrure tshinanu.

Malixkane Poktshikaka Hapnokaxikowaka Piranapni

²⁰ Waneya Jesus yinuwaka jihyehiretlu poktshikaka himyekaklewatatshrikaka hix-potuko hkamhajexyawaka klu tshinanu hi rehchinikanutatkana. Wla htshinna:

²¹ — Hapnokatkalur-potupyi pixa Corazim poktshi hiyrunu Betsaida poktshi! Klu tshinanu himyekaklewatatshrikaka nkamhakmaka hita Tiro poktshiya hiyrunu Sidom poktshi hix-yehi hakanhikatshri pixkalutu, waneyamka mitshikawako rehchinikanutanutkana wane poktshikak-hajene, waneyamka mkatshri saco mapa kamhikolu hmakatanutkana hiyrunu tshitshi pahi koxamka hpolojiwuxinwana rimathexikowakna rehchinikanutatkana.

²² Seyni halikaka ntshinhi rapnokaxikolu hohnepa Tiro hiyrun-koxa Sidom poktshi hi hsaletpotukanatkona hixa salexikowaka pso.

²³ Hiyrunu pixa Cafarnaum poktshi. Pkahwakhe patskoxyawakapa haté tenhohne? Seyni pixa halikaka puknokko tshiji hitokote hamhikowak-yehi. Klu tshinanu himyekaklewatatshrikaka nkamhakmaka hita Sodoma poktshi hix-yehi hakanhikatshri pixkalutu, haté xawakni hohnekananumka rawawa Sodoma poktshi.

²⁴ Seyni halikaka ntshinhi rapnokaxikolu hohnepa Sodoma poktshi hi hsaletpotukanatkona hixa salexikowaka pso.

Hapnanuxikowaka Jesus Tshinanu Piranapni

²⁵ Waneya waneklu papko Jesus wan-tshina: — Nimalwutyi, Nuru, tenhohne tshij-koxa Towutatshriyi. Klu tshinanu pyohimatlu xye pirankaka jimatkaleruneya hiyrunu kahchinikanuruneya. Seyni puphujetlu hike mimatkane hetanuya.

²⁶ Hehe, Nuru, xye pixa palujyawakni.

²⁷ — Nuru, ptowru potuko renekno. Hike himathetlu Whentshi seyni Hirtshipka himathetlu. Hike himathetlu Hirtshi seyni Whentshipka himathetlu hiyrun-koxa katukta raluk-himatyehkakletlu Hirtshi.

Jesus Wla Htshinyawaka Punanwakatanno Piranapni

²⁸ — Runanwakatanno ptowru hamanu kamrurewletatshri tsru wunru hitjitatshri waneya hita hapnanukakanhi.

²⁹ Hitshitanno nkosejyawakaphi, nasruklenephi klu tshinanu mayohotno hita, kihle hchinikanurno waneya hit-yehi hapnanuhchinikanrewlu hikchikanu.

³⁰ Klu tshinanu hitjitpre nutajinhi myapretni hiyrunu wuntshiri minotni.