Mateus 10 - Bíblia

Doze Rasruklene Hyokanaxyawaka Jesus Piranapni

¹ Jesus tomhana rasruklene doze waneya renekpixkonutna kamtshine htowuxyawakapna ruchpajyawakapna yine maneya hiyrun-koxa ptowru hixatshri yeyixlu hiyrunu hahijewnalkaka rutskalajyawakna.

² Xyeni Jesus nuretanune doze-na hiwakkakni: mitshikananhapka, Simão tshinkaluru (wale rutakhiwakata Pedro) hiyrunu André tshinkaluru Pedro mole; hiyrunu Tiago tshinkaluru, Zebedeu whene, João tshinkaluru, Tiago hepuru;

³ Wane koxna Filipe hiyrunu Bartolomeu tshinkalune; Tomé tshinkaluru hiyrunu Mateus (walekni wenuxikolu yoptotatshri); hiyrunu Tiago tshinkaluru Alfeu whene hiyrunu Tadeu tshinkaluru;

⁴ Wane koxlu Simão Zelote tshinkaluru hiyrunu Judas Iscariotes tshinkaluru, Jesus kamnitjerupa.

Jesus Hasruklene Kamrurepa Piranapni

⁵ Nyikaka doze jejine hyokanata Jesus, wan-rix-towutletna: — Hi judeu mixkane tskala hyanu, hi hjihlokanru samaritano poktshitekaka.

⁶ Seyni carneiro-ne hamhatshine pixkalune israel-nerune yehi tsonu hyanu.

⁷ Hyinipa hinkaklewakananumtanu. Wane htshinanu: “Hi howukatkalu tenhohne pohirewaxyawaka.”

⁸ Hitskalakanna yeyixatshine, hiwekkakanna hipnatshine. Hijirohitutatshine hitskalakanu. Kamtshine hiknokanna. Mwenutu xyekaka neneklewata, hix-koxa mwenutu henekanna wanna.

⁹ Hi hanikanru ouro proji hi prata projiko hi cobre projiko hiptshiji hanijini;

¹⁰ hi koxa hanikanru sacola, hi hepi mkatshriko, hi sandalha-ko hi kanojeruko hanikanu klu tshinanu kamrurewatatshri himukata yoptoletlu hkamrure hipekole.

¹¹ — Hanur-poktshiktako hjihlojini, hijhanru satu hihle yoptoletjeru waneya wanepji hwanu haté hichpajini potuko.

¹² Pantshi hjihlojinipa, kihle hwachle htshinanru wanepji hajene.

¹³ Waneya kihle yoptole hixkoklunupa, hanjitanru Hoyakalu kihle hwachle rixkajikowakapna. Seyni hma yoptohihlenutjene rixinna, Hoyakalu hanjixya kihle hwachle rixinrina hkonanna.

¹⁴ Katukta hma yoptotjenepa, hma jemjenepa, hichpakamxinpatka waneya wanna hetanu hiwlihkajpatjixitanu rimaxyawakapna hi hixako htshinanni seyni hma yoptotjene malixlenu tshinanni.

¹⁵ Halikaka ntshinhi, hapnokaxikolu hohnepa Sodoma hiyrunu Gomorra poktshinni salexikolu yohnik-hapnokatlu rixko hma yoptohihlenuxikowakanu poktshiya.

Salewaktshipni Hiyrun-koxa Kojwawaktshipni Piranapni

¹⁶ — Nyokanathi hatatjewa ovelha-nhi lobo-ne pixkalune hanikajite hyiywakapa. Hiyáhoni halpokohchinikanutanu himnune pixka seyni myokwirenephi motkokoji pixka.

¹⁷ Hislahinwa yine tshinanu klu tshinanu hkachitanhi jemahchinikanyehixikowaka yehi ranikanhi hiyrun-koxa hkotshipjetanhi hanjihohnewakapjikakaya.

¹⁸ Hita tshinanu tsru hixikatshinwa hiyrunu tsrukakalune nwaka hanikko kihler-pirana Cristo pirana hinkaklexyawakapna wanna hiyrunu judeu mixkane.

¹⁹ Hkachitkoklunpatka, hi hkojwakahchinikanutanu klu piranakta htshinanu ho hanu htshin-hihretanu. Rapojinpapkopatka Hoyakalu henektokanutanhi

²⁰ klu tshinanu htshinyawakapa hi hixako htshinreni seyni Puru Hoyakalu Hiwejikaluru henektokanrepni.

²¹ — Moltshine himolene potuko ruylajixkakanna. Waneko pixka rixan-koxna hirtshine, hwuhenene ruylajixanna. Haté hwuhenene kamnitanna rurna ruylaxyawakapluna.

²² Ptowru yineru hahnanutanhi hixa hita tshinanu seyni poyehi halixleru haté hmahle papko, riwekanu.

²³ Salewaktshi hexiniklunu satu poktshiya, wane hasujini pa poktshi pnute hajeru hyanu. Halikakni ntshinyi, Jeji Whene satokanu hi ptowru poktshi pejnu Israel tshijnetshi hyapanna.

Hike Mkojwakanu Piranapni

²⁴ — Hasrukkaluru hi rasrukjeru yohnik-hijhakalurni hiyrun-koxa towutkaluru hi htowutjeru yohnik-hijhakalurni.

²⁵ Seyni hikamtutkalu hasrukkaluru rasrukjeru pixka rixyawaka hiyrun-koxa hikamtutkalu towutkaluru htowutjeru pixka rixyawaka. Kapjiru tsru kamtshi Belzebu (ho Satanás) rikahwajinrina, hi he pnute hektutu rikahwakkona walepji hajene?

²⁶ Hiyáhoni hi hpikanna yine. Klu tshinanu ptowruka yohimluru ruphujetko. Ptowru tokantshi yohimatkaluru rimathetko runkakletko.

²⁷ Klunerukta ntshinyi mapchahawakaya, katawak-hohne hinkakletanru. Hiyrun-koxa nunkajyahi, hihruko hitokoteya, ptowru yineru jemanu runkakletko.

²⁸ Hi hpikanna mantshi hiylatatshine seyni hiwejinri hi rumukata hiylaletna. Seyni halikaka hpikanru Hoyakalu hix-mane, hiwejinri koxa hakot-hiylaletatshri waneya wane pnute tshitshmero ruknoklewata.

²⁹ Hi he hepi kochitshine hi kwenu hichanjika? Wanepnawaka hi satukna kochitshi tshiji hijruka Hiru Hoyakalu malukkanuklunu.

³⁰ Haté wijiwutsa ptowruka hitakyahokalurni Hoyakaluya.

³¹ Hiyáhoni hi hpikanu klu tshinanu hixa yáholu satupka yineru tsonu, hixo kochitshine yohnik-hijhakalurni!

³² — Katukta hiphujtatno yine jemanu, hit-koxa hiphujtatanru Nuru tenhohne hajeru hetanu.

³³ Katukta hi nimathetlu htshinanwakaxinipno, hi nimathetanunhi hixapni ntshinanu Nuru hetanu tenhohneya.

Kotspalaxikatshinwa Jesus Tshinanu Piranapni

³⁴ — Hixlahe kahwaklu nuna kihle hwachleru nanikanwakaxyawaklu xye tshijne? Seyni hi nuna hihle hwachlu nenejyawakaphi seyni nuna nkotspalaxyawakaphi halikaka.

³⁵ Seyni nuna nkotspalaxyawakapna hituru ruru hkamnixyawakapa, suxo tunro tkamnixyawakapa, mekanunrotshi thimajiro tkamnixyawakapa.

³⁶ Hiyáhoni jeji kamnipotutjenepa walepji hajeneko.

³⁷ — Katukta hi ramotno hita ruru ho runro pnute, hi rumukata nasrukleru hixleta. Katukta hi hamotno hita hituru ho richitsho pnute hi rumukata nasrukleru hixleta.

³⁸ Hiyrun-koxa katukta h-cruz-te hma mutaykopitkanuklunupa hi rumukata nasrukleru hixleta.

³⁹ Katukta haluk-hiwekkaklexinwa, ramtaklewatanun-honuka. Katukta hamtakanru riwekle hita tshinanu riwekanu halikaka.

Himlujikolukaka Piranapni

⁴⁰ — Katukta yoptothi hixa, Hita hyoptota hiyrun-koxa katukta yoptotno Hita, hyoptotlu nyokanatjeru.

⁴¹ Hoyakalu tokanu hinkakletatshri yoptotatshri Hoyakalu tokanu runkaklewaxyawaka tshinanu, wale koxa yoptotanru Hoyakalu tokanu hinkakletatshri himlujikolupa. Hiyrunu jeji potukalu yoptotatshri ruhlenu tshinanu jeji potukalu himlujikolupa koxa hyoptotanu wale.

⁴² — Hiyrunu katukta copa stono katshiklehalu satu mujhakotu heneka ruryawakaplu nasrukleru rixyawaka tshinanu, halikaka ntshinhi, rumlujikolupa halikaka hyoptotanu.