Marcos 9 - Bíblia

¹ Waneya Jesus hali hinkakletatkana wane htshina: — Hichinikanru xye: Satkaka hewi hajeru hma mupnaknukawa, retanru Hoyakalu pohirewaxyawaka hapokatshritka hpixkonuyma.

Jesus, Moisés, Elias Piranapni

² Waneya seis hohne pnut-hohne, Jesus teno mrijiwaka hanikna Pedro, Tiago, hiyrunu João. Wannapkatkani. Waneya wanna hetanu hyokmanhojitatka Jesus.

³ Himkal-koxa klata, klat-potuko rixa, katajru jeromkaklerone yohnik-powranu rixatka.

⁴ Retluna Elias-ni, hiyrun-koxa Moisés-ni. Riynumsatluna Jesus.

⁵ Waneya Pedro wan-tshinru Jesus: — Kasruklewakleru, kihleru wiko wwiywaka. Hayeri wkamheru mapa pantshi; satu pixanupa, satu Moisés-nupa, satu Elias-nupa.

⁶ Waneya rasruklene himyekpotuthonuka. Pedro hi himata klukta htshinanu.

⁷ Waneya hohimkohi hichyatna. Waneya hohimkohi hitokote ruchpajyatka tokantshi wla tshinatshri: — Xyekni nowhene nalukleru. Hyijnak-tokanutanru!

⁸ Waneklukawa hsajruruyhaletna seyni Jesus tsonu retna.

Elias Hapojinri Piranapni

⁹ Waneya himriji hserpijinixkana Jesus hijretna retakanatanruna hike hmunkajyawakanupna hma miwekkanuko pchini Jeji Whene hipuktshiya.

¹⁰ Wanna yijnakotlu Jesus towuxyana seyni ruhjekakna wannakakluko klu pirana htshina riwejinpatnaka pirana.

¹¹ Hiyáhoni repomhaluna Jesus, wla htshinruna: — Klu tshinanhe kasruklewaklerune hinanchitkaluru pirana hasruklewatatshine wan-tshina Elias hapka hapokanu?

¹² Waneya Jesus wan-tshinna: — Halikakni, Elias hapokanu ruhlexyawakaplu ptowruko. Seyni haklu tshinanhe yonatkaluru tokantshi wan-tshina Jeji Whene salewnapotutanhonuka malukkotupni?

¹³ Seyni wane ntshinhi Elias-ni hinpatka seyni rapnokatka raluk-hixlexikowaka rixka yonatkaluru tshinyawaka pixka rixluna.

Jesus Mturu Kamtshite Hakajyawaka Piranapni

¹⁴ Waneya rapojinixkana pimrine rasruklenestsi, retna hixolune yine rasruklene sajrukastsitanune. Satkaka kasruklewaklerune hinanchitkaluru pirana hasruklewatatshine hihjekakakanata.

¹⁵ Hajeyri yine hixolune hexinixkalu Jesus rimyekna wanna ptowruneka waneya rasukanwakatluna ralikluna.

¹⁶ Waneya Jesus hepomhana kasruklewaklerune hinanchitkaluru pirana hasruklewatatshine: — Haklu himuhjekaka?

¹⁷ Waneya jeji hixolune yehi hwakanatatshri hihita: — Kasruklewakleru, naniklu noturu pexyawakaplu klu tshinanu rawya kamtshi myanumatkatu.

¹⁸ Ptowru hohneruka kamtshi kamnitlu, ruknoklu tshiji. Waneya hyinuwaka hichpaksolnamletana, raskiyhita, ruhrokamta. Pasruklenemka nanjita ruknojyawakapluna kamtshi seyni hi rumukatna.

¹⁹ Waneya wane htshinna Jesus: — Yine malixaklenhi. Haté hi pejnu hohnekta nimwanhi hixa? Haté hi pejnu hohnekta nakotanhi? Wkata panikanru mturu.

²⁰ Waneya ranikanwakaxinixkaluna mturu Jesus nwaka kamtshi hetlu Jesus waneya hipokananu hkowchoklu mturu. Mturni tshiji hyana ruprurumtana ruchpaksolnamamtana.

²¹ Waneya Jesus hepomhalu ruru, wla htshinru: — Hi pejnu hohnehe wan-rixatka piwhene? Waneya ruru hihita, wla htshinru: — Hmatureyakawa.

²² Hixo kata kamtshi tshitshmero hiknoklu, honha ruknoklu koxa ruylaxyawakaplu seyni pixa himukata hepixlexinipno, pepixanno. Petwamonutanunwu hixni.

²³ Waneya Jesus hihitlu: — Numukathe? Ptowru potuko himukata hakanhaleta ralixini yineru.

²⁴ Waneya ruru wla tshin-saplewleta: — Nalixyi. Pepixanno nalixyawakpotupyi.

²⁵ Waneya Jesus hexinixkana hixolune yine wale nwaka hapokatshinepa, htowutlu kamtshi, wla htshina: — Kamtshi majnaklu manrutu, puchpajinixkalu xye mturu, hikeklu hohne pjihlokanutnaklu.

²⁶ Waneya kamtshi saplewata, hkowchoklu mturu waneya ruchpajyatkalu, ruchotlu mturu hipnatshri pixka hixatshriko. Wale tshinanu ptowru yineru wan-tshina, rupnanatka.

²⁷ Seyni Jesus kachimyotlu mturu, repixlu hyopkajyawakapa.

²⁸ Waneya Jesus jihlojinixka pantshi rasruklene wannapka rixinixkana, repomhaluna, wla htshinruna: — Klu tshinanhe hi wumukata hiknokletlu kamtshi?

²⁹ Waneya Jesus hihitna: — Xye pixkalutu kamtshi hi hiknokka, hanjihohneru hiyrunu hohajirewlu tshinanu tsonu.

Jesus Hinkaklethnapuxyawaklu Rupninri Riwejinritnaka Pirana Hiyrunukotnaka Piranapni

³⁰ Waneya Jesus hiyrunu rasruklene hichpajyalu wale poktshi, riknohamtluna Galileia tshijne. Jesus hi halukna yine rimaxyawakapna rawyawaka,

³¹ klu tshinanu rasrukna rasruklene, wla htshinna: — Jeji Whene tshinkaluru yine renekko. Wanna hiylatanru seyni map-hohne rixinri riwekanutnaka.

³² Seyni wanna hi himatjema klu piranakta htshina Jesus seyni hpika hepomhaletluna.

Kat-pothe Hijhakaluru Hoyakalu Pohirewaxyawakaya Piranapni

³³ Waneya Jesus rasrukleneyma hapoklu tsru poktshi Cafarnaum tshinikowaka. Hajeyri pantshi rapojinixkana, Jesus hepomhana doze rasruklene: — Haklu himuhjekakamta hatnuya?

³⁴ Seyni potshkena wanna klu tshinanu hatnu ruhjekajyana katnihe hijhakalur-potu.

³⁵ Waneya Jesus tuplata waneya htomhana doze rasruklene. Waneya wla htshinna: — Satkaka yineru haluka tsru hixlexnawa, rujhalu wale nanwaka malukkotu rixyawaka ptowru yineru repixanu.

³⁶ Waneya hkachitlu satu mturu, hyopkakkaklu wanna hanikajite. Hsapriklu. Waneya wla htshinna rasruklene:

³⁷ — Katukta hihle yoptoletlu xye pixkalutu mturu nhiwaka tshinanu hit-koxa hyoptotanu. Hiyrunu katukta yoptotanno hita, hi hita tsonu hyoptota seyni hyoptotanru nyokanatjeru koxa.

³⁸ Waneya João wan-tshinru: — Kasruklewakleru, wetlu jeji kamtshi hiknokatshri pixa phiwakaya seyni wimaletlu klu tshinanu hi hixa wepirni.

³⁹ Waneya Jesus hihita, wla htshina: — Hi himaletanru klu tshinanu yineru hetkaluru kamhatshri hita hiwakaya, hi xekoyaka hektuwaka htshinanwakatanno.

⁴⁰ Klu tshinanu katukta hi kamnitwu, repixwu.

⁴¹ Hichinikanru xye: Satu yineru honha copa stonha hixiniphi Cristo-nerunhi hixyawaka tshinanu, halikakni hyoptotanru rumlujikolupa.

Himtuwna Halixlekakatshri Piranapni

⁴² Waneya Jesus wla tshina: — Katukta himtuwna halixlekakna nalixjene mtserkakanewa, kihlepotmaklu tsru sotlu rostunojixikowaka waneya mar powha ruknojikowaka.

⁴³ Pimyo himtujinipyi, pkastakanru. Klu tshinanu kihlepotmaklu mtsoji hiwekkajikowaka, hepi myoluko tshitshmero tshitshi hikeklu muwnakatu yehi ruknokkona,

⁴⁴ [tsomi mupniywakanu hiyrunu tshitshi hikeklu muwnakatu yehi.]

⁴⁵ Pijixi himtujinipyi, pkastakanru. Klu tshinanu kihlepotmaklu myape hiwekkajikowaka, hepi jixiruko tshitshmero hikeklu hohne mnikawnakatunapa ruknokkona,

⁴⁶ [tsomi mupniywakanu hiyrunu tshitshi hikeklu muwnakatu yehi.]

⁴⁷ Piyhale himtujinipyi, pkochpakanru. Klu tshinanu kihlepotmaklu pa yhalepkalutu hiwekkajikowaka Hoyakalu pohirewaxyawakaya, hepi yhaleruko tshitshmero ruknokkona,

⁴⁸ tsomi mupniywakanu hiyrunu tshitshi hikeklu muwnakatu yehi.

Tuwu Piranapni

⁴⁹ — Klu tshinanu satkaka yineru tuwutko tshitshmeroya.

⁵⁰ Tuwu hijhakalurni seyni hma tuwrenuklunu hi repixlewata. Tuwu pixkalunephi, hike mixkanephi hixkakluko.