Marcos 8 - Bíblia

Jesus Quatro Mil Yine Hohluxyawaka Piranapni

¹ Waneya hi howukchini rapatjetatnakna hixolune yine. Malechayna hnikanruna hiyáhoni Jesus tomhatkana rasruklene waneya wla htshinna:

² — Netwamonutna nyi yine. Map-hohne hitaymana hiyrunu malechayna hnikanruna.

³ Hi naluka yokanretna mnikkane hma muhrojyawakanupna hatnu hapoya klu tshinanu satkaka yineru howuka hinya.

⁴ Waneya rasruklene hepomhalu: — Hanhe wixa hikchikletanru pão hewi kahnete poktshiri hixolune yine wohluxyawaka?

⁵ Waneya Jesus hepomhana: — Hi pejnu pão-pro himwa hixa? Waneya ruhitluna: — Sete pão-pro wimwa.

⁶ Waneya Jesus tshiji tuplakjixna hixolune yine. Waneya hkochtsheklu sete pão. Rali poyahnutlexinri Hoyakalu, hjiknajrotlu pão, rasruklene reneklu waneya rasruklene heneksatna hixolune yine.

⁷ Twa koxa satokaka chima. Waneya Jesus poyahnutlu Hoyakalu waneya htowutna rasruklene reneksaxyawakapna.

⁸ Waneya ptowru yineru nikatka, jinanutkana. Waneya rasruklene tsepotlu sete chiwatu nijittshi hixetatshrini.

⁹ Nikatshine quatro mil yine. Waneya Jesus yokanatna hyiywakpatkana.

¹⁰ Waneya chinpotukawa hpokownalo kanawa rasrukleneyma. Dalmanuta nwaka hyatkana.

Hetkalurkaka Ranjixyawakna Fariseu -ne Piranapni

¹¹ Waneya fariseu-ne hapoka hyinuwaka hihretluna Jesus retumhiywakapluna. Ranjitluna hetkalurkaka hkamhiywakapa rekhixyawakapna hpixkonu ho Hoyakallahe runya ho hike.

¹² Hiyáhoni Jesus hinniphata hitokoya wane htshina: — Haklu tshinanhe xyeklu papko hiwekatshine hanjitlu hetkaluru? Seyni halikaka ntshinhi hi satukna hetkaluru rekhitkona.

¹³ Waneya Jesus yatka. Hpokownalo kanawa waneya pa sreta hipowha wnahlu hyatka.

Fariseu -ne Hiyrunu Saduceu -ne Tserutjeru Piranapni

¹⁴ Waneya rasruklene hi hichinika hanikletlu pão. Satupka pão-pro kanawa ranikna.

¹⁵ Jesus towutna ruslahyawakapluna wane htshinna: — Xako fariseu-ne hiyrunu saduceu-ne tserutjeru, Herodes tserutjer-koxa.

¹⁶ Hiyáhoni hyinuwaka hihjekakletna wannakakluko. Wane htshinkakna: — Wane htshina klu tshinanu pão hi wanikatka.

¹⁷ Seyni Jesus yijnakotna ruhjekajyawakna waneya repomhana: — Klu tshinanhe hihjekaka pão hma manijyawakanu tshinanu? Hi he himatawalu, hi he himatjemawalu klu pirana ntshinatkahi? Chik-hajirunrahhe hixa?

¹⁸ Hixa kayhalmakhi seyni hi he heta? Kajnakmakhi hi he hjema? Hi he hichiniklu

¹⁹ hanu nixa kanipreletlu cinco pão cinco mil yine tshinanu? Hi pejnuhe chiwatu htsepota nijittshi hixetatshrini? Waneya ruhitluna: — Doze chiwatu wtsepotatka.

²⁰ Waneya Jesus hiyrunuko hepomhana: — Ha nkaniprexyawaklu sete pão quatro mil yine niklerupa tshinanu, hi pejnu chiwatu htsepota nijittshi hixetatshrini? Waneya ruhitluna: — Sete chiwatu wtsepotatka.

²¹ Waneya repomhana Jesus: — Hi he xawaka himatjemawa?

Mayhaletu Betsaida Hajeru Piranapni

²² Waneya wane pnute Jesus rasrukleneyma Betsaida hapoka. Waneya satkaka yineru hanikanwakatlu mtsawa, waneya ranjitluna Jesus hyotnejyawakaplu.

²³ Waneya Jesus kachimyotlu mtsawa. Raniklu kahnete. Waneya hitskaha hsahayhalexyalu, hkapxaklu, repomhalu, wla htshinru: — Petluhe pa hixanu?

²⁴ Waneya jeji hetatka waneya wane htshina: — Netmaklu yineru seyni hahmuna nyanahota.

²⁵ Waneya Jesus hiyrunukotnaka kapxaklu hiyhale. Waneklukawa retpotuthonukatka. Ruhlewatatka ptowruko kihle hetle rixatka.

²⁶ Waneklukawhapka Jesus yokanatlu jeji hipjiru hyiywakapa waneya wane htshinru: — Hi poktshi nwakatshi psatkapanu.

Pedro Wan-tshinyawaka Jesus Hoyakalu Whene Rixyawaka Piranapni

²⁷ Waneya Jesus rasrukleneyma Cesareia de Filipe poktshistsi hyana. Waneya hyamtka pchinikna repomhana, wla htshinna: — Kathe rikahwaknona yine?

²⁸ Waneya rasruklene hihita: — Satkaka yineru wan-tshina pixa João Batista-yi; satuko wan-tshina Elias-yi; satuko wan-tshinyi satu mitshikawni Hoyakalu tokanu hinkakletatshriyi.

²⁹ Waneya Jesus wan-tshinna: — Ha hixa, kathe hkahwakno? Waneya Pedro hihita: — Pixni Hoyakalu yokanreryi Messias-yi.

³⁰ Waneya Jesus towutlu xye pirana hike hmunkajyawakanupa.

Jesus Hinkaklexyawaklu Rupninri Hiyrunu Riwejinritnaka Pirana

³¹ Waneya Jesus yinuwaka hasrukletna rasruklene, waneya wane htshinna: — Hita Jeji Whene tshinkalurno, nujhalu nsalewnapotuxyawakapa. Nuknokko tsrukakalune judeu-ne yehiya hiyrunu tsru hixikatshinwa sacerdote-ne yehiya, kasruklewaklerune hinanchitkaluru pirana hasruklewatatshine yehiy-koxa. Nuylatko. Seyni map-hohne rixinri niwekanutnaka.

³² Jesus phujewak-potuko runkakletlu. Waneya Pedro haniklu Jesus kahnete hyinuwaka hiykoletlu.

³³ Waneya Jesus heknokyehitna rasruklene, hyopukhatna waneya ruykotlu Pedro, wla htshina: — Pasujinno, Satanás pixkalutu. Pixa hi Hoyakalu hchinikanu pimwa seyni jeji hchinikanu halikaka pimwa.

Jesus Homkahitatshri Haluklu H-cruz-te Rutaykopixyawaka Piranapni

³⁴ Waneya Jesus tomhana hixolune yine hiyrun-koxa rasruklene. Waneya wane htshinna: — Satu yineru haluk-homkahrexinno, rujhalu wale ralujyawaka ruchoxyawaka, rutaykopitanru h-cruz-te waneya romkahitanno hita.

³⁵ Klu tshinanu katukta haluk-hiwekkakletanru riwejinri, ramtakanru riwekle; seyni katukta hamtakanru riwekle hita tshinanu ho kihle piranalu potuko hiwekkaklewatatshri pirana tshinanu riwekanu.

³⁶ Hanhe rixa hepixletlu yineru xye tshijne hihlenu psoluka hkayaxiniklunu seyni riwejinri ramtakanuna?

³⁷ Kluhe xawaka ripekotanru satu jeji riwejinri tshinanu?

³⁸ Klu tshinanu katukta hipatewatanno hita hiyrun-koxa ntokanu hipatewatatshri xye hektutu hiyrunu halixle mahle klu papko, waneya Jeji Whene tshinkalur-koxa hipatewatanru runinipa waleko royaknuyma hiyrunu Ruru hoyaknuyma rimapojinipa hiwejikalune Hoyakalu towrene tenhohne hajene potukaluneyma.