Marcos 7 - Bíblia

Jesus Hiykoxyawakna Judeu-ne Piranapni

¹ Waneya fariseu-ne hiyrun-koxa kasruklewaklerune hinanchitkaluru pirana hasruklewatatshine Jerusalém hichpajikatshine hapatjeyehitlu Jesus.

² Waneya retna satkaka Jesus hasrukleru kaptshomyoluneko hnika, waleni merojikanekwa hnika.

³ Klu tshinanu fariseu-ne hiyrunu pimrine judeu-ne homkahitlu rutsrukatenna hasruklewle, wan-tshinatshri: hma meromyohkanuklunu hma merokakanotkanuklunu hi hnikanna.

⁴ Niktshi hanjijexikowaka hichpajikatshri merokakotu hi hnikanru. Hiyrunu hixo pimri yokanruru pirana romkahitna, hirapkaka herojikolu pirana, hachhajkaka herojikolu pirana, hiyrun-koxa yomuwa himatkaka herojikolu pirana romkahitna.

⁵ Waneya repomhaluna fariseu-ne hiyrunu kasruklewaklerune hinanchitkaluru pirana hasruklewatatshine: — Klu tshinanhe pasruklene hi homkahitlu tsrunni hixannu seyni kaptshomyoluneko hnikna?

⁶ Waneya Jesus hihitna, wla htshinna: — Hixachatatshinhi! Hoyakalu tokanu hinkakletatshri Isaías-ni hinkakletpotuthi hixa. Wla htshina yonatkaluru: “Nyi yine himalwutno hinama tsonuyma seyni hihchinikanuyna howukayno.

⁷ Hmahijeru himalwuretnona; klu tshinanu rasrujikolna yineru hinanchireru tsonu.”

⁸ Pnuteko htshina: — Hixa hiknokachatlu Hoyakalu yokanatanru tokantshi tsrunni tokanu homkahixyawakapa.

⁹ Wane htshin-koxna Jesus: — Hixa hijhalu Hoyakalu halujyawaka kahnete hitajyawaklu hixako halujyawaka hkamhiywaka.

¹⁰ Klu tshinanu Moisés-ni towre wla tshina: “Pkahwakpiratanru puru, punro.” Hiyrunu wane htshina: “Katukta hektuwaka tshinanwakatlu ruru, runro walepni hipnanuna.”

¹¹ Seyni hixa wan-tshina: “Satu jeji wan-tshininri ruru ho runro: Pa hixanu nimwinri nepixyawakamkapyi wale Corbã-ni (wale haluka tshinreta rimwaleru henekachlu Hoyakalunupa),

¹² hi hima rujhalu ruru runro repixyawakapa.

¹³ Hoyakalu mahijeru towutlethi klu tshinanu hixako haluk-hixlexyawaka hkamhajeta hitsrukatenni yokchale tshinanu. Hixo wale pixkalutu hkamhajeta.

¹⁴ Waneya htomhatnakna hixolune yine. Wane htshinna Jesus: — Hyijnakotanno ptowrunekhi. Himatjemanru xye:

¹⁵ Hinama jihlojikatshri hi pitshotlu yineru Hoyakalu hetanuya seyni yineru pitshotjeru halikaka namtshi hichpakhimaxikatshri.

¹⁶ Katukta kajnakopnapa hyijnakoxyawakapa, hyijnakotanu.

¹⁷ Waneya hixolune yin-yehi ruchpajini Jesus, hjihloklu pantshi waneya rasruklene hepomhalu klu pirana raluka tshinreta xye yapkaklu tshinanu.

¹⁸ Waneya wane htshinna Jesus: — Hix-koxa mimatjemkanhi? Hi he himatjemlu ptowruko maleka hwatshri jihlojinri yineru hi rumukata pitshotletlu?

¹⁹ Klu tshinanu hihchinikanu hi hjihloka seyni hisatu hya waneya himane ruchpajya. Xye pirana runkakkatkana rimaxyawakna ptowru nikkaluru himukata nikletka.

²⁰ Waneya pnuteko htshina: — Yineru hitokote hichpajikatshri walekni pitshotlu yineru.

²¹ Klu tshinanu hihchinikanu hichpajikatshri hektutu chinikantshikaka, himopatlewlu, tshowhuwlu, hiylalewlu, hapoklewlu,

²² pohirewlu tsonu ruchinikanreta, muhlentshi, yokwijrewlu, mapatehonutshi, sotanuhonutshi, hektuwaka htshinanwakaxyawaklu Hoyakalu, tserpiranawlu wale nanuko, machinikantshi.

²³ Xye hektuntshi ptowruka yineru hitokote hichpajikatshrini. Walekni himtukjetlu yineru.

Suxo Pa Tshijne Hajero Piranapni

²⁴ Waneya wane ruchpakamxya Jesus. Waneya Tiro [hiyrunu Sidom] tshinikowaka poktshistsi hyatka. Waneya satu pantshi rapokatka. Walemka haluklu hike mimaxyawakanumkaplu wane rawyawaka seyni hi rumukata yohimleta.

²⁵ Seyni sato suxo jemyehitlu. Kkamtshitero tchitsho. Waneya tuna tyoptsojityehitlu Jesus jixistsi.

²⁶ Suxni grega, siro-fenícia-néroni. Waneya tanjitlu maleka ruknojyawakaplu kamtshi tchitsho mane hajeru.

²⁷ Seyni Jesus hihitlo: — Pohluhapkatanna whentshine jinanu rixyawakapna. Hi kihleru hkonikowakna mturune hnikanruna kawene nwaka ruknojikowakapa.

²⁸ Waneya tuhitlu wala. Wane ttshinru: — Wanekni, Tsru Hixikatshriwa, seyni haté kawe whenene mesa hpuko hwatshine koxa niklu mturune nijitu mesa hijrujikatshri.

²⁹ Waneya ruhitlo Jesus: — Xye tokantshi tshinanu pyanutka. Kamtshi hichpajyatkalo pchitsho.

³⁰ Waneya topji tapojinixka tetatkalo tchitsho tukoluhakanata tojeko, kamtshi hichpajyatkalo.

Majnakotu Manrutu Piranapni

³¹ Waneya ruchpakamtatnaka Tiro poktshistsiya, Sidom hiyrunu Decápolis hyapamta. Tsru powha Galileia rapokatka.

³² Waneya ranikanwakatluna satu majnakotu myanumatkatu. Waneya ranjitluna wale hoho rutakamyoxyawakapa.

³³ Waneya Jesus haniklu yine kahneteya. Waneya himyoji hyochmakajnakopnatlu. Waneya rutskahata. Waneya hkamrukanrutlu jeji hitskahayma.

³⁴ Waneya tenhohne hyihata. Rinniphata. Waneya wane htshinru: — Efatá. Wale haluka tshinreta: kajnakopyi.

³⁵ Waneyatka ruhlewajnakopnatatka. Waneklukawa potuko hinru himaletakanatatshri hamhatka waneya hyanumhihlenutatka.

³⁶ Waneya Jesus-mka towutna yine hike hmunkajyawakanupna seyni yáholu hixo katamka rujretna wanepnawaka pnutetka runkaklewatna.

³⁷ Waneya ptowruneka jematshine tsru himyeklu rixna. Waneya wane htshinna wanna: — Ptowruko kihler-potu hkamha. Hjemkakna majnakone, myanumatkane hyanumkaka.