Marcos 6 - Bíblia

Jesus Nazaré Tshijne Hyiywaka Piranapni

¹ Waneya Jesus wane hichpakamxya. Htshijne hyatka. Rimotsatluna rasrukjetanune.

² Hapnanuxikalur-hohne rixinixka hyinuwaka hasruklewleta hanjihohnewakapjiya. Hixolune yine yijnakotatshine himyekahchinikanutatka. Waneya wanna wan-tshina: — Hanhe rukchijyalu wale xyekaka? Hanhe rukchijyalu rimatkalnu? Hanhe rixa kamhaletlu xye hetkalurkaka?

³ Hi he hahmuna chpatako kamruretaklerukni wale, Maria tshinkaluro whene? Hi he repurune Tiago, José, Simão hiyrunu Judas tshinkalune? Hi he hewi wimwana repurone? Wan-rixkalukni hike hijhatkalu Jesus.

⁴ Waneya Jesus wan-tshina: — Satu muphujewnakatuwa pirana hinkakletatshri kahwakpiratka ptowruchayaka seyni waleko htshijneya ho waleko himolene tsonuyma hi hkahwakpiratka.

⁵ Hiyáhoni hi hixo hetkalurkaka hkamha Jesus wale poktshiya. Seyni satkaka yeyixatshine hoho rutakamyota rutskalajyawakapna. Wale tsonu.

⁶ Rimyeka hmalixlenna tshinanu. Waneya pa poktshikaka nwaka hyapamta rasruklewaxyawakapa.

Jesus Hasruklene Kamrurepa Piranapni

⁷ Jesus tomhana rasruklene doze. Hyinuwaka yokanretna hepkaka. Renekpixkonutna kamtshine htowuxyawakapna ruchpajyawakapna yine maneya.

⁸ Htowutna hkanojerna tsonu ranijyawakapna xye yanre tshinanu. Hi hniklerna ranikanna, hi saco-ko, hi tiyiroko ranikanna.

⁹ Rutakanrona sandalha tsonu ranikanna. Hi hepi mkatshriko ranikanna.

¹⁰ Hiyrun-koxa wane htshinna Jesus: — Hanur-pantshiktako hjihlojini, wanepji hwanu haté hichpajin-potuko.

¹¹ Hma yoptotjenepa, hma jemjenepa tshinanu, hichpakamxinpatka waneya wanna hetanu hiwlihkajpatjixitanu rimaxyawakapna hi hixako htshinanni seyni hma yoptotjene malixlenu tshinanni.

¹² Waneya hyatkana. Runkaklewatna hehchinikanru pirana.

¹³ Hixo kamtshine maleka ruknokna. Nhihtshi ruyokjiwutna hixolune yeyixatshine waneya rutskalakna.

João Batista Hipninri Piranapni

¹⁴ Waneya Phuru Herodes jemyehitlu Jesus klu tshinanu Jesus pirana ptowruchaka rupalpiranyehita. Hiyáhoni pimrine wan-tshina: — João Batista-ni hetko hiwekatnaka. Wale tshinanu kpixkonru hetkalurkaka hkamhiywakapa.

¹⁵ Seyni pimrine wan-tshina: — Elias-ni hetkoni. Pimrine wan-tshina: — Hoyakalu tokanu heneklewatatshrini. Wale Hoyakalu tokanu hinkakletatshrini mitshikawluru pixkalutu.

¹⁶ Xye hjeminixka Herodes waneya wla htshina: — João-ni hetkokni wale! Nkastaknojikjixlerukni xawakni hipuktshi riwekkajikatka!

¹⁷ Klu tshinanu Herodes mitshi kachikjixniru João-ni. Rostukjixniri, preso rutakjixniru, Herodes repuru Filipe hnunrotakanatanro Herodias tshinkaluro tshinanu.

¹⁸ Klu tshinanu João-ni mitshi wan-tshinatkalu Herodes: “Hinanchitkalurni pepuru hnunro phanunroxyawaka!”

¹⁹ Hiyáhoni Herodias hahnanutniru João-ni. Taluk-hiylaletmakniru seyni hi tumukata,

²⁰ klu tshinanu Herodes kahwakpiratniru João-ni. Rimatlu wale jejni kihlehchinikanurni, powrahchinikanurni. Hiyáhoni rinotniru João-ni. Waneya hjeminixniru João-ni hi rimatahchinikanuta seyni hyijnakotniru ruhlenuhchinikanuyma.

²¹ Waneya Herodias himukaxinri hohne, Herodes hohneru tshinanu tsru niklu hkamha tsrukakalune, soldado-ne chefe-tene, hiyrun-koxa tsru hitakkalune Galileia hajene tshinanu.

²² Herodias whene jihlokatkalu tsru niklu yehi. Waneya tahsata. Herodes hiyrun-koxa htshanixlene hikchikhihlenupotutlo. Waneya phuru wan-tshinro makloji: — Panjitanno kluneruktako paluka. Hita henekanyi.

²³ Halikaka nunkakyi: — Klunerukta panjitanno nenekanyi. Yáholu hanikajiko npohirewaxinri nenekanyi.

²⁴ Waneya wane tuchpajyatka. Waneya wane ttshinro tunro: — Kluhe nanjitanu? Waneya tunro wan-tshinro: — João Batista jiwu panjitanu.

²⁵ Waneklukawa potuko phuru yehi tyatnaka. Waneya tanjitlu. Wane ttshinru: — Xawakni potuko naluklu penejyawakapno prato-tlo João Batista jiwu.

²⁶ Waneya phuru wamonuwpotuta seyni runkaklexyalo htshanixlene hetanu tshinanu hi raluka yohikletlu htokanu.

²⁷ Hiyáhoni waneklukawa potuko phuru yokanatlu satu htowreru rawapjiwuxyawakaplu João. Waneya hyatka, hkastaknojitatkalu João-ni preso yehiya.

²⁸ Ranikjiwutatkalu prato-ya. Reneklo makloji. Waneya makloji heneklo tunro.

²⁹ Waneya hyijnakpiranyehixinixkaluna João hasruklene, runna. Ranikmanetanatkaluna. Hkapnatanatkaluna.

Jesus Hixolune Yine Rohluxyawaka Piranapni

³⁰ Waneya hnurrene satokanwakatlu Jesus. Runkakluna Jesus ptowruko hkamhapanruna hiyrunu rasruklewakanatanruna pirana.

³¹ Waneya Jesus wan-tshinna: — Hinanu. Kahnete poktshiri wyanutka wapnanuxyawakapa pchini tsonu. Klu tshinanu Jesus rasruklen-koxa hi kapapkona hnijyawakna hixolune yine, hinamtatshine hiyrunu yatshine tshinanu.

³² Hiyáhoni wannapka kahnete poktshiri hyatkana kanawaya.

³³ Seyni hixolune yine hetna wane ruchpajyawakna. Rimathetna. Hiyáhoni ptowru poktshikaka ruchpajyatkana yine rasukamtna Jesus hyoptoxyawakapna. Seyni Jesus hma mapokkanuklunuwa rapokatkana wanna.

³⁴ Waneya Jesus kanawa hiptejinixka, retna hixolune yine. Retwamonutna klu tshinanu carneiro-ne ruslahjerna mwikane pixkalunni. Waneya hixo pirana hyinuwaka hasrukletna.

³⁵ Kayi rixinixka rasruklene hapyehitlu Jesus. Waneya wane htshinruna: — Kayixkani hiyrunu hewi kahnete poktshirni.

³⁶ Pyokanatanna yine hixolune poktshikaka nwaka hyiywakapna hiyrunu hsankaka wi potuko hwatshri nwaka hyiywakapna ranjixyapluna hnikanrupna.

³⁷ Seyni ruhita Jesus, wane htshina: — Hixa henekanna hnikanrupna. Waneya wane htshinruna rasruklene: — Wanjiterhe pão ptowru yineru tshinanu, duzentos hohne kamrurtshi wenru pso wenejyawakapna hnijinripna?

³⁸ Waneya Jesus hihita, wla htshinna: — Hi pejnu pão waneyhi? Hetapanu. Waneya rimaxinixkana wane htshinruna wanna: — Wimwalerutka cinco pão, hepi chima.

³⁹ Waneya peklomta hoho htuplakjixna yine ptowruneka pa ptohkaka rixyawakapna.

⁴⁰ Waneya htuplatna yine, pa ptohkaka rixna. Pa xkehkaka cem, pa xkehkaka cinquenta.

⁴¹ Waneya Jesus kochtsheklu cinco pão, hepi chim-koxa. Tenhohne hyihata hpoyahnutlu Hoyakalu. Waneya hjiknajrotlu pão. Waneya rasruklene reneklu hixolune yine rapsaxyawakapna. Waney-koxa rapsatkana ptowruneko hepipkalut-koxa chima.

⁴² Waneya ptowruneko nikatka. Jinanutkana.

⁴³ Waneya hkochtshekluna pão-ni hixetatshrini, chim-koxni, doze chiwatu t-tsepotana.

⁴⁴ Pão nikatshine cinco mil jejine.

Jesus Honha Hoho Hyanamxyawaka Piranapni

⁴⁵ Waneklukawa Jesus hixolune yokanatka pchinika hkosekjixna rasruklene pa sreta powha hkopruhaxyawakapna kanawaya Betsaida poktshi nwaka.

⁴⁶ Hixolune rali yokanrexinixka Jesus, walepka hipjita hya ranjihohnexyawakapa.

⁴⁷ Seyni kayi rixinixka kanawa hownahatkalo. Jesus-pka tshiji hwakanatawa.

⁴⁸ Waneya Jesus hetna hkaheknanuwaxyawakna rasruklene hsalwuhaxyawakna klu tshinanu kanniphalu satkakanna. Waneya hoprikako Jesus yanwakatna rasruklene, tsru powha honha hoho hyanamta. Raluk-hiknohlemtna.

⁴⁹ Seyni retamxinixkaluna Jesus tsru powha hyanamxyawaka, hkahwakluna samentshi rixyawaka. Waneya hsaplewatna.

⁵⁰ Klu tshinanu rexinixkaluna hpikpotuthonukna. Waneklukawa potuko Jesus hiynumatna wane htshinna: — Hixko hchinikanuphi, Hitni! Hi hpikanu!

⁵¹ Waneya kanawa hpokowna wanna yehi, kanniphalu hitukamtatka. Waneya rimyekpotutna rasruklene.

⁵² Hkojwakahchinikanutna klu tshinanu hi rimatjemluna hetkaluru pão hixolewkajyawaka pirana. Hchikohajiwatna.

Jesus Hitskalajyawakna Genesaré Hajene Piranapni

⁵³ Waneya hkopruhaxinixkana Genesaré tshijne hyana. Rutspakatkana.

⁵⁴ Hajeyri kanawa ruptekawana yine hixolune himathetatkalu Jesus.

⁵⁵ Waneyakni yine hasuktata wale tshijne psoluka rawapyawakapna katshinomtalune. Waneya ranikkatkana katshinomtalune hijekoyna Jesus jemyehixyawaka nwaka.

⁵⁶ Jesus poktshikaka hya, mtserutu poktshikaka, tsru poktshikaka hiyrunu fazenda-kaka. Waneya Jesus satkaka jihlokawakako praça rutakkana katshinomtalune. Waneya ranjipotutluna yeyixatshine hyotnejyawakluna yáholu Jesus mkalustsiptoko waneya katukta yotneklu rutskalhatka.