Marcos 5 - Bíblia

Jesus Hitskalajyawaklu Jeji Hixolune Kamtshine Himwatshri Piranapni

¹ Waneya tujra wnahlu tsru hipowha Gerasa sreta rapokna Jesus rasrukleneyma.

² Waneya kanawa ruptejinixka Jesus satu jeji kamtshine himwatshri yoptotlu. Yomletsh-yehi ruchpajyatka.

³ Yomletsh-yehi rawjeta. Hike himukata hosturetlu hi yomuwatsaymako.

⁴ Hixo kata hkachitkamkatka. Yomuwatsamka rostutka himyonota, hihpeji koxamka. Seyni yomuwatsni hiknajromtana hmixkonu tshinanu. Hike himukata himaletletlu.

⁵ Psol-yetshnoko psol-hohneko himriji hiyrun-koxa yomletsh-yehi hsaplewjekananumxya. Rustajixnawa sotluya.

⁶ Waneya rexinixkalu Jesus howukaya rasukamta wale nwaka. Hyoptsojityehitlu.

⁷ Tsru saple rixa waneya wla htshina: — Jesus, Hoyakalu ten-potu hajeru whene! Kluhe pixannatkano? Nanjityi Hoyakalu hiwaka tshinanu hi psaletpotutanunno.

⁸ Wale wan-tshina klu tshinanu Jesus wan-tshinatkalu: — Kamtshi, puchpakanutkalu xye jeji.

⁹ Waneya Jesus hepomhalu: — Klu hiwakyihe? Waneya ruhitlu. Wane htshina: — Nhiwakni Hixoluru klu tshinanu hixolurun-potwu.

¹⁰ Waneya ranjipotutlu Jesus wale tshijne hma yokanaxyawakanupna.

¹¹ Wanekananru hixoluru porco hipjitastsi hnikakanaxyana.

¹² Waneya kamtshine hipokananu ranjitluna Jesus, wla htshinruna: — Ptowutanwu porco mane wjihlojyawakanapa.

¹³ Waneya Jesus hitshitna. Hiyáhoni ruchpakamtatkana kamtshine. Waneya porco-ne mane hitokote hjihlokamtatkana. Waneya hixolunni porco-nni hepi mil hetkoni hipjita hijrujyanatka. Hipowha rapokanna waneya hipowha rahyejyanna.

¹⁴ Waneya porco-ne hinotatshine hasukamta. Runkaklewatna tsru poktshiya, hsana hajen-koxa. Waneya hixolune yine hinamta retapyawakanapna klu rixanna.

Gerasa Poktshi Hajene Hma Yoptoxyawakanuplu Jesus Piranapni

¹⁵ Waneya rapokluna Jesus nwaka. Retluna kkamtshithixapatshri hixoluru hwakanatanru. Htuplakanata. Kamkatkalu kkamtshithixapatshri, kahchinikanutkalu. Waneya rimyekatkana yine.

¹⁶ Waneya kkamtshithixapatshri hetakanatjene hinkakna yine kkamtshithixapatshri pirana hiyrun-koxa porco-ne pirana.

¹⁷ Waneya hipokananu ranjitluna wanna tshijne ruchpajyawakapa Jesus.

¹⁸ Kanawa hyohrejinixka Jesus, kkamtshithixapatshri hanjitlu: — Pixaymanapno.

¹⁹ Seyni Jesus hi hitshitlu. Wane htshinhonuklu: — Pipji pyanutka pimwanune yehi. Punkakanna yine Tsru Hixikatshriwa Hoyakalu rixa hepixlexyawakyi pirana. Punkakanna retwamonuxyayi pirana.

²⁰ Waneya ralimta. Hyinuwaka hinkaklewletatka Decápolis poktshi Jesus hixyawakatkalu. Ptowruneko tsru himyeklu hixa.

Jairo Tshinkaluru Hanjireru Piranapni

²¹ Waneya hkopruhatatnaka Jesus kanawaya. Pa sreta wnahlu hya. Rapatjeyehitluna hixolune yine. Tsru powha wnaha rawa.

²² Runa satu tsru hitakkaluru hanjihohnewakapji hajeru. Jairo hiwakatletatshri. Rexinixkalu hyoptsojityehitlu Jesus jixistsi.

²³ Waneya ranjitlu Jesus wane htshina: — Nchítshoni tupnakastsinatkani. Punanu wala hoho putakamyotanu tutskalhiywakapa tiwejyawakapa.

²⁴ Waneya Jesus waleyma wane hya. Hixolune yine romkahitjene hipxakjemtlu.

Jesus Hiyrunu Katshinomtalo Piranapni

²⁵ Waneya twa sato suxo hihrahawatatshro. Doze hwalapu hima tuhrahawatatka.

²⁶ Hixo kpinrewaklerunemka pinixnixkalo hiyrunu tnikatlewatanatka ptowruka twinri. Wanepnawaka hi tuhlewata seyni tallikanatatka.

²⁷ Waneya tjempiranyehixinixkalu Jesus, wale tjimne sretako tunya hixolune yehi waneya tkamrukamkatlu.

²⁸ klu tshinanu wane tixa hichinikanuwleta: ‘Nkamrukamkachaxiniplu, nutskalhanutka.”

²⁹ Waneklukawa potuko tutukahrahatatka. Timaxnawa tomaneya tuhlewaxinrixka t-salewnakanatapinri.

³⁰ Waneklukawa Jesus himaxnawa ruchpakamtatka hpixkonu. Ruprotaka hixolune yin-yehi. Waneya repomha, wane htshina: — Kathe kamrukamkatno?

³¹ Waneya wla htshinruna rasruklene: — Petna hixolune yine ripxakjexyawakyina wanepnawaka wane ptshina katu kamrukamkatno?

³² Seyni Jesus heknojtata rexyawakaplu katukta yotnekamkatlu.

³³ Waneya suxo pikatka. Tutataka. Timata wane tixyawaka. Waneya Jesus jixistsi tuknojnawa. Tunkaklu tyeyixle pirana ptowruka.

³⁴ Waneya Jesus wan-tshinro: — Chrima, palixle hitskalakyi. Pyanu kihlehchinikanpatkayi. Kihlepatkayi psalewnakanaxinriya.

Jairo Hchitsho Riwekkajyawaka Jesus Piranapni

³⁵ Waneya hyanumsakanaxiniwa Jesus, Jairo-pji hichpajikatshine htowrene hapoka. Waneya wane htshinruna: — Pchítshoni hipnanatka. Klu tshinanhe pkojwakawalu hasruklewatatshri?

³⁶ Seyni Jesus jemachatlu xye tokantshi. Waneya wane htshinru Jairo, tsru hitakkaluru hanjihohnewakapji hajeru: — Hi pimyekanu. Palixachatanu.

³⁷ Hi ritshitna pimrine himotsaxyawakaplu. Pedro, Tiago, João, repuru Tiago tsonu ritshitatka.

³⁸ Hjihlokapjixinixkaluna Jairo-pji, retlu sejirtshi, tshiyahatatshine saplewjepotutatshine.

³⁹ Waneya hjihlokamta. Waneya Jesus hepomhana, wane htshina: — Klu tshinanhe xye sejirtshi, tshiyahlu? Mturo hi tupna seyni tumkachata.

⁴⁰ Seyni rutsolhitatluna Jesus. Hiyáhoni maleka hyokanatna ptowruneko. Waneya ranikna mturo hiru, tunro, waleymalun-koxa. Hjihlokna mtúroni hwiywaka.

⁴¹ Waneya Jesus kosemyoxininatkalo mtúroni, wane htshinro: — Talitá cumi! (Yokakkalurutka waleni: Mturo, ppalna!)

⁴² Waneklutka mturo yotunotatka. Tyanatka klu tshinanu doze mhalerotni. Waneya ptowrunek-yine tsru himyeklu rixna.

⁴³ Waneya Jesus hijretna hike hmunkajyawakanupluna wale pirana. Waneya rohlujixlo mturo.