Marcos 4 - Bíblia

Hitaklu Tataji Jiplaljekleru Piranapni

¹ Waneya hyinuwaka hasruklewletatnaka Jesus, Galileia powhastsiya. Rapatjeyehitluna hixolune yine hiyáhoni hyohreklo kanawa waneya htuplatatka. Rutneprijyalu ksatu hiyáhoni ptowruneko yine tshiji tsru powha wnaha hwa.

² Waneya hi heppika pirana rasrukna Jesus yapkaklu piranayma. Wane htshina hasrukleta Jesus:

³ — Hjemanu. Satu jitaklewakleru hichpakamta rutaklewaxyawakapa.

⁴ Wan-rixa hipalajretlu. Pimriji hatnu hapostsi hapoktatajita. Waneya runna kochitshine hnikloktatajitanruna.

⁵ Pimriji sotlu hoho mteno tshijiwaka rapoktatajita. Waneya ruptshekhapkatamka klu tshinanu mteno tshijiwaka ruptshejya.

⁶ Hiyáhoni ruchpajinixka tkatshi, hjimanatkalu, riprihanatka hitaklukaka hma matskinu tshinanu.

⁷ Pimriji kona yehi hapoktatajita. Waneya konaymakananuko htseruwna hiyáhoni hkakmokanatkalu. Waneya hi kajinatkalu.

⁸ Seyni hitataji kihle tshijiwaka hapokatshinetka hixolewnatka hiyáhoni satkakaji pejnu tshinanu trinta-ji rawatka ho sessenta-ji ho cem-ji rawatka.

⁹ Waneya wane htshinna Jesus: — Kajnakopnahi hyijnakoxyawakapa, hyijnakotanu.

Jesus Hasruklu Klu Hyapkakleta Hitataji Jiplaljekleru Pirana

¹⁰ Waneya hyinixkana hixolune yine, doze rasruklene hiyrunu pimrine hitukatshine hepomhalu Jesus: — Hanhe htshina xye yapkaklu pirana?

¹¹ Waneya wane htshinna Jesus: — Hixamka henekka himaxyawakaplu mimatkotu pirana Hoyakalu pohirewaxyawaka pirana. Seyni pimrine tshinanu yapkaklu nkamhiylu ptowru piranako.

¹² Rexinna retmakna, hi rapkathojitna; hjeminna, hjemmakna hma mimatjeminixipna; wane hmixkanumka rehchinikanutanumkana, ramtakahchinikanyehitkomkana rektunna.

¹³ Waneya repomhana Jesus: — Hma mimatkanuklunru xye yapkaklu, hanu hixa himatletanru ptowruko yapkaklu?

¹⁴ Pnuteko hya hinkakletna: — Hoyakalu tokanu kkopalhimakleru kopalatlu Hoyakalu tokanu.

¹⁵ Hatnu hapostsi hapoktatajitatshri yaholni tokantshi jematshine. Seyni runa Satanás kamtshi. Hkonyana tokantshi rajiyna hitakkaluru.

¹⁶ Sotlu hanikajite hiknokkalune wannani tokantshi jematshine. Tokantshi hjeminixkana hyoptotmakluna tsru rumuwleymana.

¹⁷ Seyni hi waneyna hitskina wanna. Hiyáhoni pchini tsonu hwatshinepni. Runinipa yahtaletlewlu ramtakanruna tokantshi hjemlerna.

¹⁸ Kona yehi hapoktatajitatshine, wanna Hoyakalu tokanu jematshine pixkalune.

¹⁹ Seyni kojwakahchinikanrukaka, ho pohirewnalu, ho poyikowlukaka xye hohne hexikaluru mixkowpotuta waneya xekoyaka hkakmokannatkalu. Hiyáhoni hi hjiwatanatkana.

²⁰ Seyni kihle tshijiwaka hapoktatajitatshine wannani Hoyakalu tokanu jematshine, rimatjemluna hiyrun-koxa hjiwatanutkana: satu trinta, satu sessenta, satu cem kata pnute hjiwatna.

Katalu Piranapni

²¹ Wane koxa htshinna Jesus: — Tanikkahe lamparina hachhaji hpuko tutajikowakapa? Hijeko hpukolahe tutakko? Hi wane tixanu. Seyni hi he lamparina kihle nikotle tixyawaka yehi tutakka?

²² Klu tshinanu ptowruka yohimluru ruphujetko. Ptowru tokantshi yohimatkaluru rimathetko, runkakletko.

²³ Katukta kajnakopnapa hyijnakoxyawakapa, hyijnakotanu.

²⁴ Wane koxa htshinna Jesus: — Hislahinri ptowruko hjemleru. Klu tshinanu yahotapi hixa hyahotapre, walako hyahoxika hiyrunu wala pso yohnika hyahoxika.

²⁵ Klu tshinanu katukta himatjemlu, Hoyakalu pnute rimatjemkakanru wale haté rimatjempotuxyawakaplu. Seyni mimatjemkatu haté rimatjemlejiji hkonanu Hoyakalu.

Hitataji Piranapni

²⁶ Wane htshina Jesus: — Hoyakalu pohirewaxyawaka satu jeji jiplaljekleru pixkalutni. Ruplaljetatajita.

²⁷ Waneya rumka, hyotunota wanepnawaka hitataji hiptsheka. Htseruwna. Seyni jitaklewakleru hi himata klu tseruwnakaklu.

²⁸ Wale nanwaka jiwkajnawa tshiji mixkonu tshinanu. Mitshikananu ruptsheka. Wane pnute hhiwuwata. Wane pnutejiji ralixatka.

²⁹ Rali serowlexinixka waneklutka kastakapiya hkastajikatka klu tshinanu rapokatka hipapkolu hjijiroxikolpatka.

Mostarda-tataji Piranapni

³⁰ Waneya pnuteko htshina Jesus: — Kluneru pixka rixa Hoyakalu pohirewaxyawaka? Kluneru nyapkakletanru?

³¹ Mostarda-tataji pixka rixa. Mostarda-tataji honukla pimri tataji kayaho mtsernurut-potu.

³² Seyni ttseruwniniklunu wala pot-tseruwnatshroni ptowru hejnuji munaya. Tsruplukaklo. Waneya kochitshine teno yapatshine hina toplukaka hkamhachalexyawakna hisure tshikle hpuko.

Jesus Yapkaklu Pirana Tsonuyma Runkaklewaxyawaka Piranapni

³³ Jesus Hoyakalu tokanu hinkakna yine hixo xye pixkalutu yapkaklu piranayma. Rumukata hakotlexyawakna pso runkakna.

³⁴ Yapkaklu minjeyma hi runkakna Jesus. Seyni rasruklene tsonu runkakpotutatka.

Jesus Kanniphalu Hitukkajyawaka Piranapni

³⁵ Waneya wale hohne kayi rixinixka Jesus wan-tshinna rasruklene: — Tujra sreta wnahlu powha wyanu.

³⁶ Hiyáhoni hyokanatkatkana yine hixolune hyiywakapna. Waneya rasruklene yohreklo kanawa Jesus hwakanaxyawaka tlo. Waneya Jesus-ymapna. Hiyrun-koxa pimro kanawkaka waleymapa.

³⁷ Waneya hyopyoka tsru kanniphalu. Htsepohjetlo kanawa hiyáhoni katsephatkalo.

³⁸ Tostsi rumkakananumta Jesus hyostanojrehohoya. Hiyáhoni rasruklene komyeklu. Waneya wla htshinruna: — Kasruklewakleru, hikehe pixahota wupniklunupa?

³⁹ Waneya Jesus yotunotatka htshihetjetlu kanniphalu hiyrunu tenoplojhal-koxa. Waneya wla htshinru hipowha: — Potshke. Putukanutka. Waneya rutukatka kanniphalu. Pokokha rixatka hipowha.

⁴⁰ Waneya repomhana Jesus: — Klu tshinanhe hpikatka? Hixlahe malixaklenhi?

⁴¹ Seyni tsru piklu rixna. Waneya wla htshinkakna wannakakluko: — Hanu hixatshri koxni xye jeji? Klu tshinanu kanniphalu hipowha koxa yijnakotlu.