Marcos 3 - Bíblia

Jesus Hitskalajyawaklu Hiprihamyotatshri Piranapni

¹ Waneya pa hohnepatnaka hjihloklu hanjihohnewakapji. Wane rawakanata satu jeji hiprihamyotatshri.

² Ruslahpotukanatluna Jesus ho hapnanuxikalur-hohnerhe rutskalaklewatanu ho hike hjihyehixyamkapluna.

³ Waneya Jesus wan-tshinru jeji hiprihamyotatshri: — Yine hanikajite pyotunoxini.

⁴ Waneya wla htshinna Jesus: — Hanu phuthe htshina yonawahlo hapnanuxikalur-hohne hiykole pirana? Kluhe kamhako hapnanuxikalur-hohne? Kihleru ho hektutu? Ho renek-hiweklerewatanu ho hkamaklewatanu hapnanuxikalur-hohne? Seyni wanna hike tshina.

⁵ Waneya Jesus heknojtayehitmakna. Hjihekanuwata hwamonuwata chik-haji rixyawaka tshinanna. Waneya wla htshinru jeji: — Pyosurukkanotanu. Waneya hyosurukkanotatka, ruhlewamyotatka.

⁶ Waneya wane ruchpakamxyana fariseu-ne. Waneya Herodes-neyma rujhahchinikanutatkana wannakakluko hanu rixa himukata hiylaletluna Jesus.

Jesus Htokanu Tsonu Hihlexyana Katshinomtalune Piranapni

⁷ Waneya Jesus wane hichpajyatka. Galileia powha hya rasrukleneyma. Romkahimtluna hixolune yine Galileia hajene Judeia hajen-koxa,

⁸ Jerusalém hajene, Idumeia hajene, pa sreta Jordão hajene, Tiro-stsi hwatshine, Sidom-stsi hwatshine koxa, Wanna ptowruneka yanwakatlu Jesus klu tshinanu hjempiranyehitluna ptowru Jesus kamhaleru.

⁹ Waneya Jesus hixolune yine hma mipxajyawakanupluna tshinanu ranjitna rasruklene sato kanawa rawapyawakapluna.

¹⁰ Klu tshinanu yine hi heppika rutskalaka hiyáhoni hkatsholikluna yeyixatshine mkojekananu hyotnejyawakapluna.

¹¹ Waneya kamtshine hexiniklunru Jesus hyoptsojityehitluna. Hsaplewatna wla htshinna: — Pixni Hoyakalu Whenyi!

¹² Waneya Jesus hipokananu hijretna hike hmunkajyawakanupna katni wale.

Jesus Nurexyawakna Doze Rasruklene Piranapni

¹³ Waneya himriji hkankatka Jesus. Htomhana wale ruchinikanune. Waneya hyanwakatluna wale.

¹⁴ Jesus hitakna doze waleyma hwatshinepa. Hyokanatanunepa hinkaklewatatshinepa,

¹⁵ rutakko henejikolupa ruchpakjixyawakapna kamtshine.

¹⁶ Xyeni Jesus nuretanune doze-na: Simão, wale rutakhiwakata Pedro;

¹⁷ Tiago, Zebedeu whene, João, Tiago hepuru; (Hiwakatna Boanerges, waleni rutlohle pixkalune);

¹⁸ André, Filipe, Bartolomeu, Mateus, Tomé, Tiago Alfeu whene, Tadeu, Simão honukla Israel tshijne haluka mixkowkakletatshri,

¹⁹ Judas Iscariotes tshinkaluru, Jesus kamnitjerupa.

Yine Kahwaklu Jesus Kamtshi Rixyawaka Piranapni

²⁰ Waneya pantshi rapokatka Jesus, yine hixolune hapatjeyehitatnaklu. Hiyáhoni Jesus hiyrunu rasruklene hi himukata nikleta.

²¹ Waneya xye pirana hjeminna Jesus molene runna rawapyawakapluna Jesus klu tshinanu pimrine wan-tshinna jipukalerhetkoni.

²² Waneya Jerusalém poktshi hyopijyana kasruklewaklerune hinanchitkaluru pirana hasruklewatatshine. Wanna wla tshinyehitlu Jesus: — Waneylu Belzebu tshinkaluru kamtshi pohire. Belzebu himukatleyma tshinanu hetko maleka ruknokna kamtshine.

²³ Waneya htomhinixkana Jesus, wla htshina yapkakluya: — Hanhe rumukata Satanás maleka hiknoklexnawa Satanás?

²⁴ Ptowru tshijne rawa nikawnatshripa, pa hchinikanurutu hmixlenu tshinanna wane tshijne hajene.

²⁵ Hiyrun-koxa pantshi hajene wannakakluko pnu pejnu rixahchinikanutna hi rumukata hwachaletna.

²⁶ Hiyrun-koxa Satanás kamtshi hkamnixiniklunwa pnuko rixahchinikanuxinwana Satanás hayinetene. Hi rumukata pnute yaletanu htowuwle.

²⁷ Yineru hi himukata jihlokletlu satu jeji hixkolupji htshowhuxyaplu rimwaleru hma mostuhapkatkanuklunru hixkolu. Waneklu tsonu rumukata tshowhuretlu hipji hajeru.

²⁸ Halikaka ntshinhi ptowru hixatshri hektuwaka Hoyakalu mukchikhihlenreru hkamhini yineru, ptowru hixatshri hektutu htshinanwakaxiniplu Hoyakalu, ramtakahchinikanuxiko rektunu.

²⁹ Seyni katukta hektutu tshinanwakaxiniplu Hoyakalu Hiwejikaluru hikeklu hohne ramtakahchinikanyehitkona rektunu seyni rektunu hikolukanuwnatshri hikeklu hohne mnikawnakatupni.

³⁰ Jesus wan-tshina klu tshinanu pimrine wan-tshinru, waneylu kamtshi.

Jesus Hinro Himolen-koxa Piranapni

³¹ Waneya Jesus hinro, himolen-koxa Jesus yehi hapokatka. Maleka rawna. Htomhakjixluna.

³² Waneya hixolune yine rixiplatjene wane htshinruna: — Petanu, punro pepurun-koxa maleka rawna. Rujhayina.

³³ Waneya Jesus hepomhana, wla htshinna: — Katnihe nunro hiyrunu nomolene?

³⁴ Waneya reknojtayehitna rixiplatanune. Wla htshina: — Hewitkana nunro hiyrunu nomolene.

³⁵ Hoyakalu halujyawaka kamhatshine wannani nepuru, nepuro, nunro.