Marcos 2 - Bíblia

Jesus Hiktehatshri Hitskalajyawaka Piranapni

¹ Waneya hi hix-hohne hiknohawa Jesus jihlokatnaklu Cafarnaum. Hyijnakpiranyehitka pantshitkalu.

² Waneya wane rapatjexyana hixolune yine. Hiphaptostsiko maleka sreta hi hpoyahotatkana yine. Jesus tokantshi hinkaklewakanata.

³ Waneya yine yanwakatlu Jesus. Satu yineru hiktehatshri ranikyehitluna. Ranikjene quatro jejine.

⁴ Seyni hixolune yine tshinanu hi rumukata hijihlokletna hiktehatshriyma. Hiyahokni ranikluna pantshi hoho hwakwatatshri. Waneya hjihmikakwatluna Jesus hinaple waneya wane swa hkosputajyaluna hiktehatshri hijeko hikoluhamtatshri.

⁵ Waneya Jesus hexinri wanna halixle wane htshinru hiktehatshri: — Mturu, pektunu puknojikatka.

⁶ Waneya wane koxa htuplakanatna pimrine kasruklewaklerune hinanchitkaluru pirana hasruklewatatshine. Wanna wan-tshinahchinikanuta:

⁷ “Klu tshinanhe wane htshina xye jeji? Hektuwaka htshinanwakatlu Hoyakalu. Katu tsonhe himukata hiknokhektunutlu yineru? Satupkalu Hoyakalu tsonu.”

⁸ Waneklukawa potuko Jesus himatatka riwejinriya wan-rixahchinikanutna. Waneya wla htshina: — Klu tshinanhe wan-hixahchinikanuta?

⁹ Hanupothe kihle tshinko? Wla htshinikowaka hiktehatshri: “Pektunu puknojikatka”, ho wla htshinikowaka: “Pyotunotanu, pkochtshekjekotanu pyanutka”?

¹⁰ Seyni himatjempotuxyawakaplu Jeji Whene tshinkaluru hitakkalurutkani xye tshijiya ruknokhektunuxyawakapna yine hiyáhoni wla ntshinanru hiktehatshri:

¹¹ — Pixa wane ntshinyi: Pyotunotanu, pkochtshekjekomtanu pyanutka pipji.

¹² Waneklukawa hyotunomtatka, hkochtshekjekomtatka ruchpakamtatka ptowruneko hetanu. Ptowruneka tsru himyeklu rixna, rimalwutluna Hoyakalu. Waneya wla htshinna wanna: — Hikeklu hohne wane pixkalutu weta.

Jesus Tomhiywaklu Levi Piranapni

¹³ Waneya Jesus hichpakatnaka. Tsru hipowha nwaka hyatka. Hixolune yine yanwakatlu. Waneya Jesus hasrukna.

¹⁴ Riknohamtka pchinika Jesus, retlu Levi Alfeu whene. Htuplakanata tuplawaka hwenuxikolu hyoptoxyawakapa. Waneya Jesus wan-tshinru: — Pomkahitanno. Waneya hpalnamtatka romkahitatkalu.

Jesus Hektune Himinjiywaka Piranapni

¹⁵ Waneya Jesus rasrukleneyma Levi-pji nikawakakwa hwakanata. Wane koxa rawakanatna hixolune jijhawenruklerune hiyrun-koxa hektune. Klu tshinanu romkahitjene hixo.

¹⁶ Waneya kasruklewaklerune hinanchitkaluru pirana hasruklewatatshine, fariseu-ne hajene hexinri Jesus jijhawenrukleruneyma hiyrun-koxa wanna hektuneyma hnika, repomhana Jesus hasruklene, wla htshinna: — Kluneru tshinanhe wannayma hnika, rura wanna jijhawenruklerune, hektuneyma?

¹⁷ Xye hjemini Jesus, wla htshinna: — Pomtalune hi haluklu kpinrewakleru seyni katshinomtalu haluklu. Hi nuna ntshanixyawakapna kihlerune seyni muhlene ntshanixyawaka rehchinikanuwaxyawakapna.

Hix-hohne Mnikkatu Piranapni

¹⁸ Waneya João hasruklene hiyrun-koxa fariseu-ne hohajirewata. Runa satkaka yineru waneya Jesus repomhana, wla htshinruna: — Haklu tshinanhe João hasruklene hiyrunu fariseu-ne hasruklen-koxa hohajirewata seyni pixa hasruklene hi natshita?

¹⁹ Waneya wla htshinna Jesus: — Rumukata natshretnahe hnunrowlu hetatshine hnunrowatatshriymalune? Hike. Wannayma rawakanaxini hnunrowatatshri hi rumukata natshretna.

²⁰ Seyni rapokhohnexinpatka hnunrowpiratatshri hixolune yehi hkochpajikoklunpatka. Waneklu papko halikaka rohajirewatanutkana wanna.

²¹ Hi kihle hipxatkolu mkatshri hitsruka herotu samayma. Klu tshinanu herotu sama himutskirhanunru waneya herotu sama hiskakkakanunru htseruwaswapotutanuna.

²² Hi kihle tsrutsoleji mapa hitakhatkolo vinho-ha hekamhakolha. Wan-rixkoklunutka vinho-ha hipchekkakanunru sac-kakapni. Tuyokhatanuna vinho-hapni waneya sac-kaka koxapni salewnanuna. Seyni vinho-ha herotu, saco herotu tutakhatka.

Jesus Hapnanuxikalur-hohne Yohnik-hijhakalurni

²³ Hsana hyapakanata Jesus hapnanuxikalur-hohne. Waneya Jesus hasruklene jimlakahawamtlu hitakluhawa.

²⁴ Hiyáhoni fariseu-ne wan-tshinru Jesus: — Petanu. Haklu tshinanhe wan-rixana hapnanuxikalur-hohne hinanchitkalur-hohne?

²⁵ Waneya wane htshinna Jesus: — Hikeklu hohnehe het-yonhatlu hanu rixpotuta Davi-ni, hmahaxini hnatshixini wale waleymalune?

²⁶ Tsru sacerdote Abiatar tshinkaluru klu papko hjihloklu Hoyakalupji, waneya Davi-ni niklu pão-kaka Hoyakalu henekachalurupa. Wale hinanchitkaluru hnikni. Sacerdote-ne tsonu himukata nikletanru hnikni waneya rimotsatjene koxa reneklu hnijyawakapluna.

²⁷ Waneya wla htshinna Jesus: — Hapnanuxikalur-hohne repixyawakaplu yine tshinanu hkamhaka. Hoyakalu hi kamhalu jeji hapnanuxikalur-hohne repixyawakapa.

²⁸ Hiyáhoni Jeji Whene haté hapnanuxikalur-hohne yohnik-himukatatshrini.