Marcos 16 - Bíblia

Jesus Hiwejyawakatnaka Piranapni

¹ Waneya hapnanuxikalur-hohne hiknohatka waneya Maria Madalena tshinkaluro, Salomé tshinkaluro hiyrun-koxa Maria tshinkaluro, Tiago hinro hanjitlo phamluhalo Jesus manni ruyohaxyawakaplona.

² Domingo hohne yetshpotukawa ronoxinixka tkatshi yomletsh-yehi hyatkana.

³ Hatnu hapo hyapamtna wane htshinamtna: — Kathe heruxinwu yomletshi hichyatatshri sotlu?

⁴ Wane htshinna wanna klu tshinanu tsru potuklu sotlu. Seyni ronotamxinixkana retluna rerutkatka sotlu.

⁵ Hiyáhoni hjihlokyomletluna. Waneya retluna makluji klatalu mkatshri hitakatshri, hpotukle sreta htuplakanata. Rimyekpotutna.

⁶ Seyni wale wan-tshina: — Hi himyekanu! Nimatlu Jesus Nazaré hajeru cruz hipnapikatshri hijha. Seyni hi hewitkalu, riwekatnaka. Hetanru rukoluhakanaxyawaka.

⁷ Xawakni hyanu. Pedro, pimrine rasruklen-koxa hinkakanu xye pirana: “Wale kosekamtanhi hixa Galileia tshijne. Wane hexinri htshinyahi pixka.”

⁸ Waneya yomletshi nwaka ruchpajyatkana. Rasukamtna. Tsru piklu rixna. Rutatakna hiyrunu hike runkakna klu tshinanu hpikpotuthonukna.

Jesus Hakanhayehixyawaklo Maria Madalena Piranapni

⁹ Jesus hiwekatnaka domingo prika. Mitshikananhapka Maria Madalena rakanhayehita. Wala honra mitshikananu sete kamtshine takajika.

¹⁰ Wala yatka tunkakapyawakapna Jesus himwakanatatshine klu tshinanu hwamonuwnana, htshiyahakanatna.

¹¹ Seyni hjeminixkaluna Jesus hiwejinritnaka hiyrunu texyawaklu pirana, hi ralixlona.

Jesus, Hepi Rasruklene Yehi Hakanhiywaka Piranapni

¹² Waneya wane pnute Jesus hakanhayehitna hepi rasruklene campo yamtatshine. Seyni Jesus satu yáholu rixnawa.

¹³ Waneya hsatkapna pimrine rasruklene nwaka runkaklewaxyawakapna seyni wanna hi halixlu runkaklexyana.

Jesus Onze Rasruklene Hakanhayehixyawaka Piranapni

¹⁴ Waneya Jesus hapkata hakanhayehletna onze rasruklene. Hnikakanatna. Waneya wale hijretna hmalixlenna tshinanu hiyrunu hchikhajna tshinanna. Klu tshinanu hi ralixtokanutna pimrine Jesus hiwekatshri hetatshine.

¹⁵ Waneya wla htshina: — Ptowru tshijne hyanu hinkakanna kihle piranalu potuko hiwekkaklewatatshri pirana ptowru tshijne hajeneka.

¹⁶ Katukta halixanru hiyrunu h-batiza-xikowakapa riwekkaka hikeklu hohne mnikawnakanepni. Seyni katukta hi halixanru hamhatshripni.

¹⁷ Halixatshinepa pixkontshi renekkotkana xye hetkalurkaka hkamhiywakapna: kamtshine ruknokajyawakapna hita hiwakaya, hiyrun-koxa herotu nrukaka hyanumaxinna.

¹⁸ Hiyrun-koxa ho himnu hkachixinna ho hisa rurinna hike rixanna. Hiyrunu yeyixatshine hoho rutakamyoxinna rutskalhanna.

Jesus Tenhohne Yinri Piranapni

¹⁹ Waneya rali hiynumsaletna Tsru Hixikatshriwa Jesus tenhohne hanikkatka. Hoyakalu potukle sretate htuplata.

²⁰ Waneya rasruklene ptowru sreta hyana runkakletluna kihle piranalu potuko hiwekkaklewatatshri pirana. Hiyáhoni Tsru Hixikatshriwa Jesus hepixlewata hetkalurkakayma rekhixyawakapa halikaka pirana htshinna.